72
ካትያዉ ሺቆ ዎሳ
ሶሎሞና የꬃ
1 አቤት ጾሳዉ፥ ካቲ ነ ሱረተꬃን ፕርዳናዳን፥
ኔን አ ታማርሳ፤
ኑ ካትያዉ ነ ጽሎተꬃ እማ።
2 ያቶፐ፥ እ ነ አሳዉ ጽሎተꬃን ፕርዶ፤
ናቀቴዳዋንቶካ ሱረተꬃን ዳናቶ።
3 ደረቱ ሳሮተꬃ አይፍያ፥
ዞዘቱካ ጽሎተꬃ አይፍያ ነ አሳዉ አይፍኖ።
4 ሄ ካቲ አሳ ግዶን ናቀቴዳዋንቱ ድራዉ ሞተቶ፤
ህዬሳቱዋ እ አሾ፤
ኡቁንያዋንታ እ መንሬꬆ።
5 አዋይነ አግናይ ደእያ ዎደ ኡባን፥
የለታፐ የለታ ጋካናዉ፥ አሳይ አዉ ያዪኖ።
6 ካቲ ሾይቃን ቡክያ እራነ
ጋድያ ካልስያ እራ ማላ ግዶ።
7 እ ደእያ ላይꬃ ኡባን ጽሉ ዳሻና፤
አግናይ ꬋያና ጋካናዉ ሳሮተꬃይ ዳራና።
8 አባፐ አባ ጋካናዉ፥
ቃይ ኤፍራጺሳ ሻፋፐ ሳኣ ጋጻ ጋካናዉ እ ሞዶ። ዛካ. 9:10
9 ባዙዋ አሳቱ አዉ ሆክኖ፤
አ ሞርከቱ ባና ላጭኖ።
10 ታርሴሳነ ሃꬃን ዶደቴዳ ቢታ ካተቱ፥
አዉ ጊራ ጊርኖ።
ሼባነ ሳባ ካተቱ፥
አዉ እሞታ አይኖ።
11 ካተቱ ኡባይ አዉ ጉልባትኖ፤
ካዉተꬃቱ ኡባይ አዉ ኪተትኖ።
12 አ ጼስያ ህዬሳቱዋ፥ ናቀቴዳዋንታነ
ማድያዌ ባይናዋንታ እ አሼ።
13 ህዬሳቶነ ማንቆቶ እ ቃረቴ፤
ህዬሳቱዋ ሸምፑዋ አሼ።
14 ኡንቱንታ ናቁዋፐነ ማካላፐ እ ዎዜ።
ኡንቱንቱ ሱꬃይ አ ስንꬃን አልአ።
15 ካቲ ሸምፑዋ ጋምኦ፤
ሼባ ቢታ ዎርቃይ አዉ እመቶ።
ፓጨናን አዉ ዎሳይ ዎሰቶ፤
ጋላሳ ኡባን እ አንጀቶ።
16 ቢታን ዳሮ ካꬃይ ሞኮ፤
ደረቱ ካꬃን ካመትኖ።
ቢታይ ሊባኖሰ ደሪ ሞክያዋዳን ካꬃ ሞኮ፤
ማታይ ደምባ ኩምያዋዳን አሳይ ካታማ ኩሞ።
17 ካትያ ሱንꬃይ መꬍናዉ ደኦ፤
አዋይ ደኤዳ ኬሻ ኡባን ጼገቲደ፥ ጋምኦ።
አሳይ ኡባይ አ ባጋና አንጀታና፤
ካዉተꬃቱ ኡባይ አ፥ “አንጀታ” ያጊደ አንጃና።
18 ማላልስያባ ባረካ ኦꬅያ መꬍና ጎዳ ጾሳዉ፥
እስራኤልያ ጾሳዉ ጋላታይ ግዶ።
19 አ ቦንቾ ሱንꬃይ መꬍናዉ ጋላተቶ፤
አ ቦንቹ ሳኣ ኡባ ኩሞ።
አመንእ። አመንእ።
20 እሰይ ናኣ ዳዊታ ዎሳይ ሀዋን ፖለቴዳ።