ሄዘንꬆ ማጻፋ
73
(73—89)
ጽሎ ፕርዳ ጾኑዋ
አሳፋ የꬃ
1 ጾሳይ እስራኤልያዉ ቱሙዋፐ ሎአ፤
ዎዛና ጌሻቶ እ ኬካ።
2 ሽን ታና ግዶፐ፥ ታ ገዲ፥
ꬉበታናዉ ጉꬃ አቴዳ፤
ታ ገዲ ሀልጻናዉ ማቴዳ።
3 አያዉ ጎፐ፥ ኢታ አሳቶ ሳሮተꬃይ ደእያዋ በኣደ፥
ሄ ኦቶራንቻቱዋ ዱረተꬃን ታን ቃናታድ።
4 ኡንቱንቶ ቱግ ባዋ።
ኡንቱንቱ ቦላይ ፓጻነ ምና።
5 ኡንቱንቱ ሀራ አሳይ ቱጋትያዋዳን ቱጋትክኖ፤
ኡንቱንቱ ሀራ አሳዋዳን መቱዋን ሾጨትበይክኖ።
6 ሄዋ ድራዉ፥ ኡንቱንቱ ኦቶሩዋ፥
አሌቁዋዳን ቆꬍያን አꬂኖ፤
ማካላ አፍላዳን ማዪኖ።
7 ኡንቱንቱ ዎዛናይ ኢታባ ፑልቴ።
ኡንቱንቱ ቆፋይ ኢታ ሀልቹዋ ኩሜዳ።
8 ኡንቱንቱ ቅሊጪኖነ ኢታባ ሃሳዪኖ፤
ኡንቱንቱ ባረንቱ ኦቶሩዋን፥
ሀራቱዋ ኡንኤꬃናዉ ናሲኖ።
9 ኡንቱንቱ ሳሉዋን ደእያ ጾሳ፥
ባረንቱ ዶናን ጫሺኖ።
ሳኣን ደእያ አሳ ቦላካ፥
ባረንቱ እንጻርሳን ኦቶሩዋ ሃሳዪኖ።
10 ሀራይ አቶ፥ ጾሳ አሳይካ ኡንቱንቱኮ ስማና፤
ኡንቱንቱ ኦድያዋካ ኤለ አማናና።
11 ኡንቱንቱ፥ “ጾሳይ ኑባ አይነ ኤረና፤
ኡባፐ ꬎቂያ ጾሳይ አይነ በኤና” ያጊኖ።
12 ስም ኢታቱ ሀዋ ማላ፤
ኡንቱንቱ ኡባ ገደካ እንጀትና ደኢኖ፤
ኡንቱንቱ ጉጅ ጉጅ ዱረቲኖ።
13 ያቶፐ፥ ታን ታ ዎዛና ጌሻ ኦꬄዳዌነ
ታን ታ ጽሎተꬃ በሳናዉ፥
ታ ኩሽያ ሜጨቴዳዌ ቱሙዋፐ መላ።
14 ጋላሳ ኩመንꬃን ታን መቱዋን ሾጨታድ፤
ዎንታን ዎንታን ሙረታድ።
15 ታን ኢታቱዋዳን፥ ኡንቱንቱ ግያዋ ጌደንቶ፥
ታን ነ አሳዉ አማነተናዋ ግዳና።
16 ታን ሀ ኡባ የዉዋ ኤራናዉ ቆፕያ ዎደ፥
ታዉ ኤረተና ዴጾባ ግዴዳ።
17 ሽን ታን ጾሳ ጌሻ ሳኣ ገሌዳ ዎደ፥
ኢታቱዋ ዉርሰꬃ ካጫ አኬካድ።
18 ኡንቱንታ ኔን ቱሙዋፐ ሀልጽያ ሳኣን ኡትሳሳ፤
ኔን ኡንቱንታ ኩንድሳሳነ ባይዛሳ።
19 ኡንቱንቱ አኬከናን ꬋዬድኖ፤
ዳጋማን እቱ አተናን ሙለ ዉሬድኖ።
20 እት አሳይ ቤጎትያ ዎደ፥
እ አኩሙዋን በኤዳባይ ዶገትያዋዳን፥
አቤት ጎዳዉ፥ ኔን ደንድያ ዎደ፥
ኡንቱንቱ ዶገታና።
21 ታን ይሎቴዳ ዎደነ
ታ ዎዛናን ሴለቴዳ ዎደ፥
22 አይነ አኬከናን ዶንጭላድ፤
ታን ነ ስንꬃን ሚዛ ማላ ግዳድ።
23 ሽን ታን ኡባ ገደካ ኔናና ደአይ፤
ታ ኡሸቻ ኩሽያ ኔን ኦይቃዳ።
24 ነ ዞርያን ታና ካለꬃሳ፤
ሄዋፐ ጉይያን ኔን ታና ቦንቾ አፋና።
25 ታዉ ሳሉዋን ኔፐ አትና፥
ሀራይ ኦን ደኢ?
ታን ኔፐ አትና፥
ሳኣን ሀራባ አያነ አሞትከ።
26 ታ ዎልቃይነ ታ ዎዛናይ ዳቡራናዉ ዳንዳዬ፤
ሽን ጾሳይ ታ ዎዛና ምንስያዋነ፥
መꬍናዉ ታና ጋኬዳ ሳማ።
27 ኔፐ ሃክያዋንቱ ꬋያና፤
ኔና አማነተናዋንታ ኡባ ኔን ዉርሳና።
28 ሽን ታና ግዶፐ፥
ታን ጾሳ ማታን ደእያዌ ታዉ ሎአ።
ታን ኡባ ሞድያ መꬍና ጎዳ፥
ታዉ ባቃታ አትያ ሳኣ ኦꬃድ።
ሄዋ ድራዉ፥ አ ኦሱዋ ኡባ ታን ኦዳና።