74
ጋዲ ላአ ከሳናዳን ሺቆ ዎሳ
አሳፍ አኬካን ጻፌዳ ግንጹዋ
1 አቤት ጾሳዉ፥ ኔን ኑና መꬍናዉ አያዉ አጋዲ?
ነ ሀንቁ ነ ቆሩዋን ደእያ ዶርሳቱዋ ቦላ፥
አያዉ ሱሌዴ?
2 ኔን በን ዶሬዳ አሳ፥ ኔን
ነዉ ቡዞ ኦꬃደ ዎዜዳ ዛራቱዋ ሀሳያ።
ኔን ደኤዳ ጽዮነ ደርያ ቆፓ።
3 አነ ነ ጌሻ ጎሊ ኮለቴዳ ሳኣ ያደ ጼላ።
ሞርከቱ አን ደእያባ ኡባ ꬋይሴድኖ።
4 ነ ሞርከቱ ነ ጌሻ ጎልያ ግዶን፥
“ኑን ጾኔዶ” ያጊደ ገሬሬድኖ።
ጾኑዋ ማላታ ያጊደ፥ ባረንቱ ባንድራ ኤሴድኖ።
5 ኡንቱንቱ ምꬃ ቃንጻናዉ ባረንቱ ካልታ፥
ꬎቁ ኦꬂደ፥ ኤቄዳ አሳቱዋዳን ሀኔድኖ።
6 ኡንቱንቱ ማሰቴዳ ሳንቃ ኡባ፥
ባረንቱ ካልታንነ ማዶሻንነ መንꬅ የጌድኖ።
7 ጌሻ ጎልያ ታማን ጹጊደ ꬋይሴድኖ፤
ነዉ ጎይንያ ሳኣ ቱንሴድኖ።
8 ባረንቱ ዎዛናን፥ “ኡንቱንታ ኑን፥
ኡባና ꬋይሳና” ያጊደ ቆፔድኖ።
ቢታን አሳይ ጾሳዉ ጎይንያ ሳኣ ኡባ ታማን ጹጌድኖ።
9 ሄ ዎደ ማላይ ኑዉ እመተናን እጼዳ፤
ትምቢትያ ኦድያዌ እቱነ ባዋ።
ሀዋዳን ሀኒደ፥ ዎይሳ ዎድያ ደአነንቶ፥
ኤርያ አሳይ ኑ ግዶን እቱነ ባዋ።
10 አቤት ጾሳዉ፥ ነ ሞርከቱ፥
ዎይሳ ዎድያ ነ ቦላ ቅሊጫኔ?
ኡንቱንቱ ነ ሱንꬃ መꬍናዉ ቦራኔ?
11 ነ ኩሽያ ሺሻ አካደ አያዉ ጋምአይ?
ነ ኡሸቻ ኩሽያ ነ ቁማዩዋፐ ከሳደ ኡንቱንታ ꬋይሳ።
12 ግዶፐነ፥ አቤት ጾሳዉ፥
ኔን በንፐካ ታ ካትያ፤
ኔን ቢታ ቦላ አቶተꬃ አሃዳ።
13 ነ ዎልቃማ ዎልቃን ኔን አባ ሻካዳ፤
አ ግዶን ደእያ ዳዊያ ሁጰቱዋ ኔን ቆጻዳ።
14 ሌዋታና ግያ ዳዊያ ሁጰቱዋ ቆጻደ፥
አ አሹዋ ባዙዋን ደእያ መታቶ፥
ቁማ ኦꬃደ እሜዳዌ ኔና። ኢዮባ 41:1፤ ማዝ. 104:26፤ ኢሳ. 27:1
15 ኔን ፑልቶቱዋ ዶያ የዳዳ፤
ኡባ ገደ ጎግያ ሻፋቱዋ ቃይ መልሳዳ።
16 ጋላሳይ ነዋ፤ ቃማይካ ነዋ፤
ቃይ አዋነ አግና ኡንቱንቱ ሳኣን ዎꬄዳዌ ኔና።
17 ቢታዉ ዛዋ ዎꬄዳዌ፥
ባልጉዋነ ቦንያ መꬌዳዌ ኔና።
18 ሽን አቤት መꬍና ጎዳዉ፥ ነ ሞርከቱ፥
ኔና ዎት ቅሊጬድኖንቶ፥
ቦዛ አሳቱ ነ ሱንꬃ ዎት ቦሬድኖንቶ ሀሳያ።
19 ነዉ ሞደትያዋንቱ ሸምፑዋ
ኢታ ሞርከቶ አꬃደ እሞፓ።
መቶታንቻቱዋ መꬍናዉ ዶጎፓ።
20 ኑ ቢታን ደእያ ꬉማ ሳአይ ኡባይ፥
ማካላንቻቱዋን ኩሜዳ ድራዉ፥
ኔን ኑዉ ጫቄዳ ጫቁዋ ቆፓ።
21 ናቀቴዳዋንታ ዬላዮፓ፤
ህዬሳቱነ መቶታንቻቱ ነ ሱንꬃ ጋላትኖ።
22 አቤት ጾሳዉ፥ ደንዳ፤ ነ የዉዋ ሞተታ።
ገዞ አሳቱ ጋላሳ ኡባን፥
ነ ቦላ ቅሊጬዳዋ ሀሳያ።
23 ነ ሞርከቱ ነ ቦላ ዋስያ ዋሱዋነ
ኔና እጽያዋንቱ፥
ፓጭ ባይናን ቅሊጭያ ቅሊጩዋ ዶጎፓ።