ጌሻ ማጻፋ ማዝሙርያ 78

ጾሳነ አ አሳ

አሳፍ አኬካን ጻፌዳ ግንጹዋ

1 ታ አሳዉ፥ ታን ህንተና ታማርስያዋ ስስተ፤

ታ ዶናፐ ከስያ ቃላ ሀይዝተ።

2 ታን ኡንቱንቶ ሃሳይያ ዎደ፥

ሌምሱዋን ሃሳያይ፤

በኒደፐ ጌሜዳ የዎቱዋ ቆንጭሳና።

3 ኑን ስሴዳነ ኤሬዳ የዎቱዋ፥

ቃይ ኑ አዎቱ ኑዉ ኦዴዳ የዎቱዋ ሃሳያና።

4 ሄ የዎቱዋ ኑን ኡንቱንቱ ናናቱዋፐ ቆሶኮ፤

መꬍና ጎዳዉ በስያ ጋላታ፥

አ ዎልቃነ ማላልስያ አ ኦሱዋ፥

ይያ የለታዉካ ኑን ኦዳና።

5 እ ያቆባ ዛረቶ አዛዙዋ፥

እስራኤልያ አሳዉ ህግያ እሜዳ።

ካሰ ኑ አዎቱ ባረንቱ ናናቱዋ፥

ሄ ህገቱዋ ታማርሳና ማላ አዛዜዳ።

6 ሄዌነ፥ ካልያ የለታይ፥

ሄ ብሮ የለታና ናናቱ ኤራናዳናነ

ኡንቱንቱካ ባረንቱ ናናቶ ኦዳናዳና።

7 ያትና፥ ሄ ናናቱ ጾሳን አማነታናዳን፤

እ ኦꬄዳባካ ዶገናዳንነ

አ አዛዙዋ ናጋናዳና።

8 ኡንቱንቱ ካሰ ባረንቱ አዎቱዋዳን ዎዛና ሙመነ

ማካላንቻ አሳ ግደናዳንነ

ጾሳን ኤቀናነ አማነተና የለታ ግደናዳና።

9 ኤፍሬማ አሳቱ፥ ኦላዉ፥

ዎንዳፍያና ፖꬃ ጊግሲደ፥

ኦላ ጋላስ ጉየ ስሜድኖ።

10 ኡንቱንቱ ጾሳ ጫቁዋ ናግበይክኖ፤

አ ህግያዳን ሀመተናን እጼድኖ።

11 ኡንቱንቱ እ ኦꬄዳ ዎልቃማ ኦሱዋነ

ኡንቱንታ እ በሴዳ ማላታ ዶጌድኖ።

12 እ ኡንቱንቱ አዎቱዋ ስንꬃን ግብጼ ቢታን፥

ጾኣነ ደምባን ማላታ ኦꬄዳ።

13 አባ ሻኪደ፥ ግዱዋና ኡንቱንታ ፕንꬄዳ፤

እ ሃꬃ ሻኪደ፥

ያነ ሃነ ሻኪደ ጎዳዳን ኤሴዳ።

14 እ ኡንቱንታ ጋላስ ሻርያን፥

ቃማ ታማ ፖኡዋን ካለꬄዳ።

15 እ ባዙዋን ዛላ ጳልቂደ፥

ጪሙዋፐ ዳሮ ሃꬃ ኡንቱንታ ኡሼዳ።

16 ዛላፐ ሃꬃ ፑልትሲደ፥

ሻፋዳን ዱገ ጎግሴዳ።

17 ሽን ኡንቱንቱ አ ቦላ ናጋራ ኦሱዋ ገደ ጉጄድኖ፤

ኡባፐ ꬎቂያ ጾሳ ቦላ፥

ባዙዋን ማካሌድኖ።

18 ባረንቱ አሞቴዳ ቁማ ኦችያዋን

ጾሳ ኤሪደ ፓጬድኖ።

19 ኡንቱንቱ ጾሳ ቦላ ሀዋዳን ያጊደ ሃሳዬድኖ፤

“ባዙዋን ጾሳይ ኑዉ ቁማ አꬃናዉ ዳንዳዪ?

20 ዛላ ሾጭና፥ ፑልቱ ከሲደ፥

ሻፋይ ጎጌዳ፤

ሽን ኡክꬃ እ ኑዉ እማናዉ ዳንዳዪ?

ዎይ ባረ አሳዉ አሹዋ እማናዉ ዳንዳዪ?” ያጌድኖ።

21 መꬍና ጎዳይ ሄዋ ስሴዳ ዎደ፥

ኡንቱንቱ ቦላ ዳሮ ሀንቀቴዳ።

ያቆባ ዛራቱዋ ቦላ ታማይ ኤጼዳ፤

እስራኤልያ ቦላ አ ሀንቁ ዳር ዳር ቤዳ።

22 አያዉ ጎፐ፥ ኡንቱንቱ ጾሳን አማንበይክኖ፤

ዎይ እ አሽያዋን አማነትበይክኖ።

23 ግዶፐነ፥ እ ቦላ ሳሉዋ አዛዚደ፥

ሳሉዋ ፐንግያ ዶዬዳ።

24 ኡንቱንቱ ማናዉ፥ ኡንቱንቶ ማና ቡክሴዳ፤

ሳሉዋ ቁማ ኡንቱንቶ እሜዳ።

25 ኪታንቻቱዋ ኡክꬃ አሳይ ሜዳ፤

ጾሳይ ኡንቱንቶ ቁማ ዳርሲደ እሜዳ።

26 አዋይ ዶልያ ባጋ ጫርኩ ጫርካናዳን ኦꬄዳ፤

ባረ ዎልቃን ገድሳ ባጋ ጫርኩዋ ደንꬄዳ።

27 እ አሳዉ አሹዋ ባና ኬሻ ኪቴዳ፤

ፓልያ ካፎቱዋ አባ ዶና ሻፍያ ኬሻ ቡክሴዳ።

28 ኡንቱንቱ ደእያ ሳን፥

ዱንካንያ ዩሹዋን ዎꬌድኖ።

29 ኡንቱንቱ አሞቴዳዋ ኡንቱንቶ እሜዳ፤

ኡንቱንቱ ሚደ፥ ባረንቱ ጋንጅያ ኩንꬄድኖ።

30 ሽን ኡንቱንቱ ባረንቱ አሞቴዳ አሹዋ ካለናን ደእሺን፥

አሹ ኡንቱንቶ ብሮ ዶናን ደእሺን፥

31 ጾሳ ሀንቁ ኡንቱንቱ ቦላ ዎꬌዳ፤

ኡንቱንቱ ግዶፐ ምኖ አሳቱዋነ

እስራኤልያፐ ያላጋ አሳቱዋ ዎꬌዳ።

32 ሀዌ ኡባይ ሀንናካ፥

ኡንቱንቱ ናጋራ ኦꬅያዋ አግበይክኖ።

ባረ ማላታ ኡባ ኦꬅናካ፥ አማንበይክኖ።

33 ሄዋ ድራዉ፥ እ ኡንቱንቱ ጋላሳቱዋ ጫርኩዋዳን፥

ኡንቱንቱ ላይꬃቱዋካ አኬከናን ꬋይሴዳ።

34 ጾሳይ ኡንቱንቱፐ ዎꬍያ ዎደ፥

አቴዳዋንቱ ናጋራ ፓጺደ፥

ጾሳ ምንꬅ ኮዬድኖ።

35 ኡንቱንቱ ጾሳይ ኡንቱንቶ ዛላ ግዴዳዋነ

ኡባፐ ꬎቂያ ጾሳይ፥

ኡንቱንታ ዎዝያዋ ግዴዳዋ ሀሳዬድኖ።

36 ሽን ኡንቱንቱ ባረንቱ እንጻርሳን አዉ ዎርዶቲደ፥

ባረንቱ ዶናን ጭሜድኖ።

37 ኡንቱንቱ ዎዛናይ ጾሳን ኤቀና፤

እ ኡንቱንቱና ጫቀቴዳ ጫቁዋ አማነትክኖ።

38 ሽን እ ኡንቱንታ ማርያዌ፤

ኡንቱንቱ ኢታተꬃ አቶ ጌዳ።

ኡንቱንታ ꬋይስቤና፤ ዳሮ ገደ ባረ ሀንቁዋ ተኤዳ፤

ባረ ሀንቁዋ ኡላ ኡባና ኡንቱንቱ ቦላ የድቤና።

39 አያዉ ጎፐ፥ ኡንቱንቱ አሹዋ ጻላላ ግድያዋነ

ያ ጫርኬዳሳፐ ሃ ስመና፥

ጫርኩዋ ማላ ግድያዋ ሀሳዬዳ።

40 ኡንቱንቱ ባዙዋን አ ቦላ አፑ ገደ ማካሌድኖ!

መላ ባዙዋን አፑ ገደ ላንጭሴድኖ!

41 ኡንቱንቱ ዛር ዛሪደ፥ ጾሳ ፓጬድኖ፤

እስራኤልያ ጌሻ ሀንቀꬄድኖ።

42 ኡንቱንቱ አ ዎልቃባ ዶጌድኖ፤

እ ኡንቱንቱ ሞርከቱዋፐ ዎዜዳ ጋላሳ፥

43 እ ግብጼ ቢታን ማላታ፥

ጾኣነ ደምባን ማላልስያባ፥

ኦꬄዳ ዎድያ ሀሳይበይክኖ።

44 ኡንቱንቱ ሻፋ ሃꬃቱዋ ሱꬃዉ ላሜዳ፤

ሄዋ ድራዉ፥ ግብጼ አሳቱ፥

ሄ ሻፋቱዋፐ ኡሻናዉ ዳንዳይበይክኖ።

45 ኡንቱንታ ዋይስያ ኡዱንጸቱዋነ

ኡንቱንቱ ቢታ ባይዝያ ሸꬋቱዋ ኪቴዳ።

46 ኡንቱንቶ ዶሌዳ ካꬃ ጎንዶ፥

ኡንቱንቱ ኦꬂደ ዳቡሬዳዋ ቦልያዉ እሜዳ።

47 ኡንቱንቱ ዎይንያ ቱራ ሻቻን፥

ኡንቱንቱ ባላስያ ግያ ምꬃካ ጫርኩዋን ꬋይሴዳ።

48 ኡንቱንቱ ሚዛቱዋ ሻቻን ዎꬌዳ፤

ኡንቱንቱ ዶርሳ ዉድያ፥

ꬉቂያ ዋልቃንꬃን መሬስ ዉርሴዳ።

49 ኡንቱንቱ ቦላ ባረ ሱልያ ሀንቁዋ፥

ላንጭያነ እጹዋ፥

ባይዝያ ኪታንቻቱዋ ጩጉዋን የዴዳ።

50 ባረ ሀንቁዋ አꬅ የዴዳ።

ኡንቱንታ ኢታ ሀርግያዉ አꬂደ እሜዳፐ አትና፥

ሀይቁዋፐ አሽቤና።

51 ግብጼን የለቴዳ ባይራ ናናቱዋ ኡባ ዎꬌዳ።

ካማ ዱንካንያን ደእያ ኮይሮ ናናቱዋ ኡባ ዉርሴዳ።

52 ሽን እ ባረ አሳ ዶርሳዳን ከሴዳ፤

ዉድያዳን ባዙዋን ሄሜዳ።

53 እ ኡንቱንታ ሳሩዋን ካለꬄዳ፤

ሄዋ ድራዉ፥ ኡንቱንቱ ያይበይክኖ፤

ሽን ኡንቱንቱ ሞርከቱዋ አባይ ሙኬዳ።

54 ያቲደ እ ኡንቱንታ ባረ ጌሻ ቢታ፥

ባረ ኡሸቻ ኩሽያን ጾኔዳ ደርያ አሄዳ።

55 እ ኡንቱንቱ ስንꬃፐ ካዉተꬃቱዋ ላጊደ፥

ኡንቱንቱ ቢታ ሻኪደ፥

እስራኤልያ ዛረቶ ግሼዳ።

ባረ አሳ ኡንቱንቱ ጎልያን ዎꬄዳ።

56 ግዶፐነ፥ ኡባፐ ꬎቂያ ጾሳ ቦላ ማካሊደ፥

አ ፓጬድኖ።

አ አዛዙዋካ ናግበይክኖ።

57 ኡንቱንቱ ባረንቱ አዎቱዋዳን፥

ማካላንቻቱዋነ ካዳንቻቱዋ ግዴድኖ።

ጌላ ቶራዳን ዎራ ዎꬌድኖ።

58 ኡንቱንቱ ባረንቱ ጎይንያ ꬎቃ ሳአቱዋን አ ይሎዬድኖ፤

ባረንቱ ኤቃቱዋን አ ቃናትሴድኖ።

59 ያትና፥ ጾሳይ ሀዋ ስሲደ ሀንቀቴዳ፤

እስራኤልያ ሙለካ ካꬌዳ።

60 ሴሎን እ ደኤዳ ሳኣ፥

አሳ ግዶን እ ደኤዳ ባረ ዱንካንያ አጌዳ።

61 ጾሳ ዎልቃዉነ ቦንቾ፥ ማላታ ግዴዳ፥

ታቦታ ሞርከቱዋ ኩሽያን አꬂደ ኦሞድሴዳ።

62 እ ባረ አሳዉ ሀንቀቴዳ፤

እ ኡንቱንታ ማሻዉ አꬂደ እሜዳ።

63 ኡንቱንቱ ዎዳላቱ ኡባይ ኦላን ሀይቄድኖ፤

ያትና፥ ኡንቱንቱ ዎዶሮቱ አስና ገለናን አቴድኖ።

64 ኡንቱንቱ ቄሳቱ ማሻን ዉሬድኖ።

ግዶፐነ፥ ኡንቱንቱ ማቼቱ፥

ባረንቱ አስናቶ ዬከናዳን ድገቴድኖ።

65 ሄዋፐ ጉይያን፥ ጎዳይ ገምእሹዋፐ

ዎይ ዎይንያ ኤሳ ማꬁዋፐ ቤጎትያ አሳዳን ቤጎቴዳ።

66 እ ባረ ሞርከቱዋ ጉየ ዛሪደ ሾጬዳ፤

ኡንቱንታ መꬍናዉ ዬላዬዳ።

67 ዮሴፎ ዱንካንያ ካꬌዳ፤

ኤፍሬማ ዛርያ ዶርቤና።

68 ሽን እ ይሁዳ ዛርያነ

ሲቅያ ጽዮነ ደርያ ዶሬዳ።

69 ሄዋን እ ባረ ጌሻ ጎልያ ሳሉዋዳን ꬎቃን ኬጼዳ፤

ሳኣዳን መꬍናዉ ኤሴዳ።

70 ባረ ቆማ ዳዊታ ዶሪደ፥

ዶርሳ ዉድያ ሄምያ ሳፐ አኬዳ።

71 ዶርሳ ሄምሽን፥ ባረ አሳ ያቆባ፥

ባረ ቡዙዋ እስራኤልያ ሄንꬃናዉ አኪደ አሄዳ።

72 ያትና፥ ዳውት ኡንቱንታ ሱረ ዎዛናፐ ሄሜዳ፤

ቃይ ባረ ሂላ ኩሽያን ካለꬄዳ።

78:2 ማቶሳ 13:35

78:12 ከሳ 7:8—12:32

78:13 ከሳ 14:21-22

78:14 ከሳ 13:21-22

78:15 ከሳ 17:1-7፤ ፓይ. 20:2-13

78:18 ከሳ 16:2-15፤ ፓይ. 11:4-23፣ 31-35

78:24 ዮሃ. 6:31

78:44 ከሳ 7:17-21

78:45 ከሳ 8:1-6፣ 20-24

78:46 ከሳ 10:12-15

78:47 ከሳ 9:22-25

78:51 ከሳ 12:29

78:52 ከሳ 13:17-22

78:53 ከሳ 14:26-28

78:54 ከሳ 15:17፤ ኢያሳ 3:14-17

78:55 ኢያሳ 11:16-23

78:56 ዳና. 2:11-15

78:60 ኢያሳ 18:1፤ ኤር. 7:12-14፤ 26:6

78:61 1 ሳሜላ 4:4-22

78:70 1 ሳሜላ 16:11-12፤ 2 ሳሜላ 7:8፤ 1 ኦዱዋ 17:7