80
እስራኤልያ ካዉተꬃይ ዛር ኤቃናዳን ሺቆ ዎሳ
ዛማረቱዋ ካፖ አሳፍ የጼዳ፥ ጪሻ ግያ ዋꬃን የጸቴዳ ማዛሙርያ፥ ማርካተꬃ
1 አቤት እስራኤልያ ሄንꬃንቻዉ፥
ዮሴፎ አሳ ዉድያዳን ካለꬅያዎ፥ከሳ 25:22
ክሩበቱዋ ግያ ኪታንቻቱዋፐ፥
ቦላና ደእያ አራታን ኡቴዳዎ፥ ፖአ፥ ኔን ኑና ስሳ።
2 ኤፍሬማ፥ ቢንያማነ ምናሰ ስንꬃን ቆንጫ።
ነ ዎልቃ ደንꬃደ ኑና አሻናዉ ሃያ።
3 አቤት ጾሳዉ፥ ኑና ዛራ፤
ኑን አታናዳን፥ ነ ሶምኡዋ ኑዉ ፖእሳ።
4 አቤት ኡባፐ ዎልቃማ መታ ኡባ ጎዳዉ፥ ጾሳዉ፥
ነ አሳ ዎሳ ቦላ አዉደ ጋካናዉ ሀንቀታይ?
5 ኔን ኡንቱንታ ዬኩዋ ቁማዳን ምዛዳ፤
ቃይ አፎꬃ ሃꬃዳን ኡሻዳ።
6 ኑ ሾሮቱ ኑ ቢታ አካናዉ፥
ባረንቱ ግዶን ዋላቀታናዳን ኦꬃዳ፤
ኑ ሞርከቱ ኑ ቦላ ሚጬድኖ።
7 አቤት ኡባፐ ዎልቃማ ጾሳዉ፥ ኑና ዛራ፤
ኑን አታናዳን፥ ነ ሶምኡዋ ኑዉ ፖእሳ።
8 ኔን ግብጼፐ ዎይንያ አኑዋ አሃዳ፤
አይሁዳ ግደና አሳቱዋ የደርሳዳ፥ ኡንቱንቱ ቢታን አ ቶካዳ።
9 ኔን ዎራ ቡꬃዳ፤
ያትና፥ ጻጱዋ የድ ዳሺደ፥
ቢታ ኡባ ጋኬዳ።
10 ደረቱ አ ኩዋን፥
ልባኖሳ ዝጋቱ አ ታሸቱዋን ካመቴድኖ።
11 ባረ ታሸቱዋ ሜድተራነ አባ ጋካናዉ፥
ቃይ ባረ ጼራቱዋ ኤፍራጺሳ ሻፋ ጋካናዉ የዴዳ።
12 ያትና፥ ኦግያና አꬍያ ኡባይ፥
አ አይፍያ ዱꬃናዳን፥
አ ዩሹዋን ደእያ ግምቢያ አያዉ ኮላዲ?
13 ባዙዋ ጉዱንꬃይ አ ቦላ ዱሪደ ባይዜ፤
ቃይ ጋደን ዎጽ ቃጽያ መታቱ ኡባይ አ ሚኖ።
14 አቤት መታ ኡባ ጾሳዉ፥
ኔን ኑኮ ስማ።
ሳሉዋና ዱገ ጼላደ በአ፤
ሀ ዎይንያ ናጋ።
15 እ ነ ኡሸቻ ኩሺ ቶኬዳ ጻጱዋ፤
ኔን ነዉ ጋደ ድቼዳ ፑትያ።
16 ነ ሞርከቱ ነ ዎይንያ ቡꬄድኖ፤
ታማን ጹጌድኖ።
ሄዋ ድራዉ፥ ኔን ኡንቱንታ ነ ሀንቁዋ ሱሉዋን ꬋይሳ።
17 ነ ኩሺ፥ ነ ኡሸቻን ደእያ አሳ፥
ኔን ነዉ ጋደ ድቼዳ አሳ ናጎ።
18 ያቶፐ፥ ኑን ኔፐ ጉየ ስሞኮ።
ኑና ፓጻ ዎꬃ፤ ነ ሱንꬃ ኑን ጋላታና።
19 አቤት ኡባፐ ዎልቃማ መꬍና ጎዳ ጾሳዉ፥
ኑና ዛራ፤ ኑን አታናዳን፥
ነ ሶምኡዋ ኑዉ ፖእሳ።