81
ባላ ማዝሙርያ
ዛማረቱዋ ካፖ ሱሱላቱዋን የጸቴዳ፥ አሳፍ ጻፌዳዋ
1 ኑዉ ዎልቃ ግድያ ጾሳዉ፥
ህንተ ቃላ ꬎቁ ኦꬂደ የጽተ፤
ያቆባ ጾሳ ሳቢተ።
2 የꬃ ዶምተ፤ ካራቡዋ ባቂተ፤
ዲꬃንነ ማስንቁዋን ሎአ የꬃ ስስተ።
3 አግናይ ጼርያ ዎደነ፥
አግናይ ዶይስያ ዎደ
ባላ ጋላሳን ማላካታ ፑንተ። ፓይ. 10:10
4 ሀዌ እስራኤልያዉ ህግያ፤
ያቆባ ጾሳፐ እመቴዳ ዎጋ።
5 ግብጼ ቢታ እ ሾጬዳ ዎደ፥
ዮሴፎ አሳዉ ሀ ዎጋ አዋዬዳ።
ታን ኤረና ኮሻ ሀዋዳን ያግያዋ ስሳድ።
6 “ህንተ ሀሽያፐ ቶኩዋ ዎꬃድ፤
ህንተ ኩሽያ ጹብያፐ ሸምፕሳድ።
7 ህንተ መቱዋ ዎደ ታና ጼሴድታ፤
ህንተና አሻድ፤ ከሳ 17:7፤ ፓይ. 20:13
ታን ጉምያ ሻርያ ግዶን ጌሜዳሳፐ ህንተና አላድ።
ማሪባ ግያ ፑልቱዋ ማታን ታን ህንተና ፓጫድ።
8 ታ አሳዉ፥ ታን ህንተና ሴርያዋ ስስተ፤
ሀእ እስራኤላቶ፥ ሀይዜርክተ!
9 ህንተ ግዶን አላጋ ጾስ ደኦፖ፤ ከሳ 20:2-3፤ ዛረ. 5:6-7
ሀራ ጾሳዉ ጎይኖፕተ።
10 ታን፥ መꬍና ጎዳ ህንተ ጾሳ፥
ህንተና ግብጼ ቢታፐ ከሳደ አሄዳዋ።
ነ ዶና ሎይꬃ ሀንጋ፤
ታን ኔና ዳርሳደ ባርሳና።
11 “ሽን ታ አሳቱ ታ ቃላ ስስበይክኖ፤
እስራኤላቱ ታዉ አዛዘትበይክኖ።
12 ሄዋ ድራዉ፥ ታን ኡንቱንቱ ባረንቱ ቆፋ ካላና ማላ፥
ኤኖ ጌና ዎዛናዉ አꬃደ እማድ።
13 ታ አሳይ ታና ስሴደንቶ፥
እስራኤላቱ ታ ኦግያ ካሌደንቶ አዬ ደኢ!
14 ታን ኡንቱንቱ ሞርክያ ኤለ ጾናና ሽን፤
ኡንቱንቱ ባልጋራቱዋ ቦላ ታ ኩሽያ ዎꬃና ሽን።
15 መꬍና ጎዳ እጽያዋንቱ አ ስንꬃን ሆካና፥
ኡንቱንቱ ሙሩካ መꬍናሳ ግዳናዋ።
16 ታን ህንተና ሎኦ ዛርጋ ምዛና፤
ቃይ ኤሳ፥ ሹቻ ጎንጎሉዋፐ ካልሳና” ያጌ።