83
እስራኤልያ ሞርከቱዋ ቦላ ሺቄዳ ዎሳ
አሳፋ ማዛሙርያ፥ የꬃ
1 አቤት ጾሳዉ፥ ጮኡ ጎፓ፤
ስርጵ ጎፓ፤
አቤት ጾሳዉ፥ ሙሞፓ።
2 በአ! ነ ሞርከቱ ነ ቦላ ደንዲኖ፤
ኔና እጽያዋንቱ ነ ቦላ ማካሊኖ።
3 ኡንቱንቱ ነ አሳ ቦላን ጌማን ያኢኖ፤
ኔን ሲቅያ አሳቱዋ ቦላ ማቀቲኖ።
4 ኡንቱንቱ፥ “ሃይተ፥ ኡንቱንቱ ካዉተꬃ ꬋይሶይቴ፤
እስራኤልያ ግያ ሱንꬃ፥
መꬍናዉ ሀሳየተናዳን ኦꬆይተ” ያጊኖ።
5 ኡንቱንቱ እት ዎዛና ግዲደ፥
እትፐ ማቀቲኖነ፥
ነ ቦላ ጫቁዋ ጫቀቲኖ።
6 ጫቀትያዋንቱነ
ኤዶማነ እስማኤላ አሳቱዋ፥
ሞኣባ ዛራቱዋነ አጋር ዛራቱዋ፤
7 ገባላ አሳቱዋ፥ አሞና አሳቱዋ፥
አማሌቃ አሳቱዋ፥
ፕልስጼማ አሳቱዋነ ጺሮሳ አሳቱዋ።
8 አሶረ አሳቱካ ኡንቱንቱና እትፐ ጋከቴድኖ፤
አሶራቱካ ሎጸ ዛረቶ ዎልቃማ ማዱዋ ግዴድኖ።
9 ኔን ምድያማ አሳቱዋ ቦላነ
ስሳራነ ያብና ቦላ፥
ቂሾና ሻፋን ኦꬄዳዋዳን ኡንቱንቱ ቦላ ኦꬃ።ዳና. 4:6-22፤ 7:1-23
10 ኡንቱንቱ ኤንዶረን ꬋዬድኖ፤
ኡንቱንቱ አሃይ ሞገተናን ቢታን ዎቄዳ።
11 ኡንቱንቱ ካፖቱዋ፥
ኔን ኦሬባነ ዛኤባ ኦꬄዳዋዳን ኦꬃ፤ዳና. 7:25፤ 8:12
ኡንቱንታ ሞድያዋንታ
ኔን ዘባሀነ ጻልሙናአ ꬋይሴዳዋዳን ꬋይሳ።
12 ሄዋንቱነ፥ “ኑን ጾሳ አሳ ቢታ
ኑዉ ቡዞታና” ያጌዳዋንታ።
13 አቤት ታ ጾሳዉ፥ ኡንቱንታ ባናዳን ላላ፤
ጫርኩ አፍያ ሱላዳን ኦꬃ።
14 ጻራጋይ ዎራ ሚደ ዉርስያዋዳን፥
ታማ ላጩ ደርያ ማይያዋዳን፥
15 ሄዋዳንካ ነ ኡሹዋን ኡንቱንታ የደርሳ፤
ነ ጎትያን ኡንቱንታ ዳጋንꬃ።
16 አቤት መꬍና ጎዳዉ፥ አሳይ ነ ሱንꬃ ኮያና ማላ፥
ኔን ኡንቱንቱ ሶምኡዋ ዬላ ማይዛ።
17 ኡንቱንቱ መꬍናዉ ዬላትኖነ ህርግኖ፤
ካዉሺደ ꬋይኖ።
18 ነ ሱንꬃይካ መꬍና ጎዳ ግድያዋ፥
ነ ጻላላይ ኡባፐ ꬎቃ ጾሳ፥
ሳኣ ኡባ ሞድያዋ ኡንቱንቱ ኤርኖ።