84
ጾሳ ጎልያ ላሞቱሳ
ዛማረቱዋ ካፖ ሱሱላቱዋን የጸቴዳ፥ ቆረ ናናቱ ጻፌዳ ማዝሙርያ
1 አቤት ኡባፐ ዎልቃማ መꬍና ጎዳዉ፥
ኔን ደኢያሳይ አያ ሎኢ!
2 ታን መꬍና ጎዳ ጌሻ ጎልያ ዳባባ ላሞታይ፤
ታ ኩመንꬃ አሳተꬃይ ደኡዋ ጾሳዉ ናሸቻን የጼ።
3 አቤት ኡባፐ ዎልቃማ መꬍና ጎዳዉ፥
ታ ካትያዉ፥ ታ ጾሳዉ፥
ነዉ ያርሽያ ሳኣ ማታን፥
ሱንያ ካፋታ ባረዉ ደኢያሳ ደማዱ።
ሀራጳታካ ባረዉ ቁቁልያ ጎልያ ያን ኬጻዱ።
4 ነ ጌሻ ጎልያን ደእያዋንቱነ
መꬍናዉ ኔና ሳቢያዋንቱ አንጀቴዳዋንታ።
5 ዎልቃ ኔፐ ደምያዋንቱ፥
ባረንቱ ዎዛናን ጽዮነ አፍያ ኦግያ ባናዉ
አሞትያዋንቱ አንጀቴዳዋንታ።
6 ዬኩዋ ዛንጋራና ኡንቱንቱ አꬍያ ዎደ፥
ሄ ሳአይ ፑልቱዋ ከሴ።
ባꬌሳ እራይካ ቡኪደ፥
ያን ደልእያ ግስሴ።
7 ኡንቱንቱ ብያ ዎደ፥ ዎልቃ ጉጅ ጉጂደ ባና።
ኡንቱንቱ ጾሳ ስንꬃን ጽዮነን ቤታና።
8 አቤት ኡባፐ ዎልቃማ መꬍና ጎዳዉ ጾሳዉ፥
ታ ዎሳ ኔን ስሳ።
አቤት ያቆባ ጾሳዉ፥ ሀይዛ።
9 አቤት ጾሳዉ፥ ኑ ጎንዳልያ በአ፤
ኔን ዶሬዳ ካትያ ነ ኬካ አይፍያን ጼላ።
10 ታን ሀራ ሳኣን ሻኡ ጋላሳ ደአናፐ
ጾሳ ጎልያን እት ጋላሳ ደእያዌ ሎአ።
ኢታቱዋ ዱንካንያን ደአናዋፐ
ታ ጾሳ ጎልያ ፐንግያ ናግያዌ ታዉ ሎአ።
11 መꬍና ጎዳይ ጾሳይ ኑዉ ጎንዳለነ ፖኡዋ፤
መꬍና ጎዳይ ኑዉ ቦንቹዋነ ኬካተꬃ እሜ።
ሱረተꬃን ሀመትያዋንታ እ ሎኦባ ኡባ ድገና።
12 አቤት ኡባፐ ዎልቃማ መꬍና ጎዳዉ፥
ኔናን አማነትያዋንቱ አንጀቴዳዋንታ።