92
ጋላታ ማዝሙርያ
ማዝሙርያ፥ ሳምባታ ጋላሳዉ የጽያዋ.
1 መꬍና ጎዳ ጋላትያዌ ሎአ።
አቤት ኡባፐ ꬎቂያ ጾሳዉ፥
ነ ሱንꬃ ሳቢያዌ ሎአ።
2 ዎንታን አገና ነ ሲቁዋ፥
ቃማን ነ አማነትያዋ ግድያዋ አዋይያዌ ሎአ።
3 ታሙ ባቀꬃን ዋጸቴዳ ዲꬃነ፥
ማስንቁዋን ዲጽያዌ ሎአ።
4 አያዉ ጎፐ፥ አቤት መꬍና ጎዳዉ፥
ነ ዎልቃማ ኦሱዋን
ታና ናሸቼዳ ድራዉ፥
ነ ኩሽያ ኦሱዋ ድራዉ፥
ታን ናሸቻዉ የጻይ።
5 አቤት መꬍና ጎዳዉ፥ ነ ኦሱ አይ ኬሻ ግቴ!
ነ ቆፋይ አይ ኬሻ ጪሜ!
6 ኤያ አሳይ ኤራናዉ ዳንዳየና፤
ዶንጭሌዳ አሳይካ አኬካናዉ ዳንዳየና።
7 ሄዌነ፥ ኢታቱ ማታዳን ድጮፐካ፥
ኢታ ኦꬅያ ኡባቱ ዳሾፐካ፥
ኡንቱንቱ መꬍናዉ ꬋያና።
8 ሽን አቤት መꬍና ጎዳዉ፥
ኔን መꬍናዉ ኡባፐ ꬎቃ።
9 አቤት መꬍና ጎዳዉ፥ ነ ሞርከቱ ꬋያናዋነ
ኢታ ኦꬅያ ኡባቱ ትስክ ጋናዋ ኑን ኤረቶ።
10 ታ ካጭያ ባዙዋ መንꬃ ካጭያዳን ꬎቂሳዳ፤
ሎኦ ዛይትያ ታና ኦካዳ።
11 ታ ሞርከቱ ጾነቴዳዋ ታ አይፍያን በኣድ፤
ታ ኢታ ሞርከቱዋ ዋሱዋ ታ ሀይꬃን ስሳድ።
12 ጽሎቱ ዛምባዳን ዳሻና፤
ቃይ ሊባኖሳ ዝጋዳን ድጫና።
13 ኡንቱንቱካ መꬍና ጎዳ ዳባባን ቶከቴዳ ምꬃ ማላ፤
ኡንቱንቱ ኑ ጾሳ ጌሻ ጎልያን ዳሻና።
14 ኡንቱንቱ ኤጪደካ አይፋና፤
ኡንቱንቱ መꬍናዉ እርጻነ ፓጻ።
15 ኡንቱንቱ፥ “መꬍና ጎዳይ ሱረ፤
እ ታዉ ዎጋ ዛላ፤ ኢታተꬅ አን ባዋ” ያጋና።