94
ጾሳይ ኡባ ቦላ ፕርድያዋ
1 አቤት መꬍና ጎዳዉ፥ ኔን ኩሽያ ጭገትያ ጾሳ።
አቤት ኩሽያ ጭገትያ ጾሳዉ፥ ነ ቦንቹዋ በሳ።
2 አቤት ሳኣ ፕርድያዎ፥ ደንዳ፤
ኦቶራንቻቶ በስያ ሙሩዋ እማ።
3 አቤት መꬍና ጎዳዉ፥ አዉደ ጋካናዉ ጋምአኔ?
ኢታቱ አዉደ ጋካናዉ ናሸታኔ?
4 ኢታ ኦꬅያ ኡባቱ፥
ባረንቱ ኦቶሮ ቃላ ሃሳዪኖ፤
ኡንቱንቱ ጬቀቲኖ።
5 አቤት መꬍና ጎዳዉ፥ ኡንቱንቱ ነ አሳ ሊቂሲኖ፤
ነ ላታ ናቂኖ።
6 ኡንቱንቱ አምኤቱዋነ በተቱዋ ዎꬊኖ፤
አዉ ባይናዋንታካ ዎꬊኖ።
7 ያቲደ ኡንቱንቱ፥ “መꬍና ጎዳይ ኑና በኤና፤
ያቆባ ጾሳይ አኬከና” ያጊኖ።
8 ህንተኖ፥ አሳ ግዶፐ አꬌዳ ዳማቶ፥ አኬክተ!
ህንተኖ ኤያቶ፥ አዉደ ኤራንቻ ግዳንቴ?
9 ሀይꬃ መꬌዳ ጾሳይ ስሰኔ?
አይፍያ መꬌዳዌ በኤኔ?
10 ካዉተꬃ ሴርያዌ ሙረኔ?
አሳ ኤራ ታማርስያዌ ባረዉ ኤረኔ?1 ቆሮ. 3:20
11 መꬍና ጎዳይ አሳ ቆፋይ መላ ግድያዋ ኤሬ።
12 አቤት መꬍና ጎዳዉ፥ ኔን ሴርያዌነ
ነ ህግያፐ ታማርስያ አሳይ አንጀቴዳዋ።
13 ኢታቱ ኩንድያ ኦላይ ቦከታና ጋካናዉ፥
መቱ ጋክያ ጋላሳን ኔን አ ሸምፕሳሳ።
14 መꬍና ጎዳይ ባረ አሳ አገና፤
እ ባረ ላታ አገና።
15 ፕርዳይ ስሚደ ጽሎ ፕርዳ ግዳናዋ፤
ዎዛና ሱረቱ ኡባይ ሄ ጽሎ ፕርዳ ማዳና።
16 ማካላንቻቱዋ ቦላ
ታ ድራዉ ደንድያዌ ኦኔ?
ኢታ ኦꬅያዋንቱና
ታ ድራዉ ኤቀቴዳዌ ኦኔ?
17 መꬍና ጎዳይ ታና ማደነንቶ፥
ታን ኤለካ ዱፉዋን ገላደ ስርጵ ጋና ሽን።
18 አቤት መꬍና ጎዳዉ፥ ታን፥
“ታ ገዲ ሀልጼ” ያጌዳ ዎደ፥
አገና ነ ሲቁ ታዉ ዘምፖ ግዴዳ።
19 ታና ህርጋይ ዎꬍያ ዎደ፥
ኔን ታና ዎፑ ኦꬃደ ናሸቻሳ።
20 ህግያ ባለꬅያ ጌላ ዳናቱዋና
ኔን ዙፐታይ?
21 ጽሎቱዋ ዎꬋናዉ ኡንቱንቱ እትፐ ቶበቲኖ፤
ሱረቱዋ ቦላ ሀይቁዋ ፕርዲኖ።
22 ግዶፐነ፥ መꬍና ጎዳይ ታን ባቃታ አቴዳ ሳኣ፤
ታ ጾሳይ ታን ቆሰትያ ዛላ።
23 ኡንቱንቱ ኢታተꬃ ድራዉ፥ እ ኡንቱንታ ሙራና፤
ኡንቱንቱ ናጋራ ድራዉ፥ እ ኡንቱንታ ꬋይሳና፤
ኤ፥ መꬍና ጎዳይ ኑ ጾሳይ ኡንቱንታ ꬋይሳና።