ጌሻ ማጻፋ ማዝሙርያ 95

95

ጋላሳ ጋላሳ ማዝሙርያ

1 ሃይተ፤ አነ መꬍና ጎዳ ሳቦይተ።

ኑና አሽያ ዛላዉ ናሸቻዉ የጾይተ።

2 አ ስንꬃ ጋላታና ሺቆይተ።

ጋላታ የꬃ ናሸቻን የጾይተ።

3 አያዉ ጎፐ፥ መꬍና ጎዳይ ዎልቃማ ጾሳ፥

ጾሳቱዋ ኡባ ቦላ ዎልቃማ ካትያ።

4 ቢታ ጪማቱ አ ኩሽያን ደኢኖ፤

ደርያ ሁጰቱካ አዋ።

5 አባ ሃꬃይካ አዋ፤

ሄዋ እ መꬌዳ፤

መላ ቢታካ አ ኩሺ ኦꬄዳ።

6 ሃይተ፤ ሆኪደ አነ አዉ ጎይኖይተ፤

ኑና መꬌዳ መꬍና ጎዳ ስንꬃን ጉልባቶይተ።

7 አያዉ ጎፐ፥ እ ኑ ጾሳ።

ኑን አ ቆሩዋን ደእያ አሳቱዋ፤

ኑን እ ሄምያ አ ዶርሳ ዉደቱዋ።

ጾሳይ ህንተና ግያዋ ሀች ስስተ!

8 “ካሰ ህንተ ማይዛ አዎቱ፥

ማሪባ ግያ ሳኣን ሀኔዳዋዳን፥

ሄ ጋላስ ማሳ ባዙዋን እጼዳዋዳን፥

ህንተካ ዞርያ አከናን እጾፕተ።

9 ኡንቱንቱ ታ ኦሱዋ በኢደካ፥

ታና ኤቀቴድኖነ ፓጬድኖ።

10 ታን ሄ የለታ ኦይታሙ ላይꬃ ሻተታድ፤

‘ኡንቱንቱ ኡባ ዎደ ባረንቱ ዎዛናን ባሊኖ፤

ኡንቱንቱ ታ ኦግያ ኤርበይክኖ ያጋድ።

11 ሄዋዳንካ ቃይ፥ ታን ሀንቀታ ጫቃደ፥

ኡንቱንቱ ታ ሸምፑዋሳ ኡባካ ገልክኖ’ ያጋድ” ያጌ።

95:7 እብራ. 3:15፤ 4:7

95:7 እብራ. 3:7-11

95:8 ከሳ 17:1-7፤ ፓይ. 20:2-13

95:11 ፓይ. 14:20-23፤ ዛረ. 1:34-36፤ 12:9-11፤ እብራ. 4:3-5