103
ጾሳ ሲቁዋ
ዳውት ጻፌዳዋ
1 ታ ሸምፓቴ፥ መꬍና ጎዳ ጋላታ!
ታ ኩመንꬃ አሳተꬃዉ፥ አ ጌሻ ሱንꬃ ጋላታ።
2 ታ ሸምፓቴ፥ መꬍና ጎዳ ጋላታ!
እ ነዉ ኦꬄዳ ኬካተꬃ ኡባ ዶጎፓ።
3 እ ነ ናጋራ ኡባ አቶ ጌ፤
እ ነ ሀርግያ ኡባፐ ኔና ፓꬄ።
4 እ ኔና ዱፉዋን ገለናዳን አሼ፤
አገና ሲቁዋንነ ማሮታን ኔና አንጄ።
5 አርጋንꬃዳን ኔን ያላጋና ማላ፥
እ ነ ደኡዋ ኡባን ኔና ሎኦባ ካልሴ።
6 መꬍና ጎዳይ ናቀቴዳዋንቶ
ጽሎባ ኦꬄነ ሱርያን ፕርዴ።
7 እ ባረ ኦግያ ሙሳ፥
ባረ ኦሱዋ እስራኤልያ አሳዉ ኤርሴዳ።
8 መꬍና ጎዳይ ቃረትያዋነ ማርያዋ፤ ያቆባ 5:11
እ ሀንቀታናዉ ኤሌለናዋነ
አገና ሲቁ ዳሩዋ።
9 እ ኡባ ገደ ሴረና፤ መꬍናዉ ሀንቀተና።
10 እ ኑና ኑ ናጋራዳን ኦꬅቤና፤
ኑ ኢታተꬃዳን ኑዉ ዛርቤና።
11 ሳሉ ሳኣፐ ꬎቂያዋዳን፥
መꬍና ጎዳዉ ያይያዋንቶ አገና አ ሲቁ ዳራ።
12 አዋይ ዶልያሳፐ አዋይ ዉልያሳይ ሃክያዋዳን፥
መꬍና ጎዳይ ኑ ባይዙዋ ኑፐ ሃሴ።
13 አዉ ባረ ናናቶ ቃረትያዋዳን፥
መꬍና ጎዳይ ባረዉ ያይያዋንቶ ቃረቴ።
14 አያዉ ጎፐ፥ ኑን አያፐ መቴደንቶ እ ኤሬ፤
ኑን ቢታ ግድያዋ እ አኬኬ።
15 አሳ ግዶፐ፥ አ ደኡ ማታ ማላ፤
እ ባዙዋ ጪሻዳን ጪሼ፤
16 ጫርኩ አ ቦላ ጫርክና ꬋዬዳ፤
እ ዶሌዳ ሳአይ ኤረተና።
17 ሽን መꬍና ጎዳዉ ያይያዋንቶ፥
አገና አ ሲቁ መꬍናፐ መꬍና ጋካናሳ።
አ ጽሎተꬃይካ ናኣ ናአዉ ጋካናሳ።
18 አ ጫቁዋ ናግያዋንቱሳነ
አ አዛዙዋ ፖላናዉ ሀሳይያዋንቱሳ።
19 መꬍና ጎዳይ ሳሎቱዋን ባረ ካዉተꬃ አራታ ኤሴዳ፤
አ ካዉተꬃይ ኡባ ሞዴ።
20 ህንተኖ፥ አ ኪታንቻቶ፥
አ አዛዙዋ ፖልያ ዎልቃማቶ፥
እ ግያዋ ስስስያዋንቶ፥
መꬍና ጎዳ ጋላትተ!
21 ህንተኖ ሳሉዋን ደእያ ምኖቶ፥
አ ሸንያ ኦꬅያ ቆማቶ፥
መꬍና ጎዳ ጋላትተ!
22 ህንተኖ፥
እ ሞድያ ሳኣ ኡባ መታቶ፥
ኡባይካ መꬍና ጎዳ ጋላትተ!
ታ ሸምፓቴ፥ መꬍና ጎዳ ጋላታ!