104
ጾሳዉ ሺቅያ ጋላታ
1 ታ ሸምፓቴ፥ መꬍና ጎዳ ጋላታ!
አቤት መꬍና ጎዳዉ ታ ጾሳዉ፥ ኔን አይ ኬሻ ግቴ!
ኔን ቦንቹዋነ አንጋ ማያዳ።
2 ፖኡዋ አፍላዳን ጉሎታዳ።
ኔን ሳሉዋ ዱንካንያዳን ቶላዳ።
3 ነ ጎልያ ሳሉዋ ጉፋንꬁዋ ቦላን ኬጻሳ።
ሻርያ ፓራ ጋርያ ከሳሳ፤
ጫርኩዋ ቀፍያን ቶጋሳ።
4 ኔን ጫርኮቱዋ ነ ኪታንቻ፥ እብራ. 1:7
ታማ ላጩዋካ ነ ቆማ ከሳሳ።
5 ኔን ሳኣ አ ባሱዋ ቦላ ኤሳዳ፤
እ መꬍ መꬍናዉካ ቃጸና።
6 ዎልቃማ አባይ ቢታ ቦላን አፍላዳን ምጨቴዳ፤
ሃꬃይ ዎልቃማ ደረቱዋ ካሜዳ።
7 ሽን ነ ጎደትና ሃꬃቱ ባቃቴድኖ፤
ነ አዛዙዋ ስሲደ፥ ኤሌሌድኖ።
8 ኡንቱንቱ ዎጋ ደረቱዋፐ ዱገ ዛንጋራ፥
ኔን ኡንቱንቶ ጊግሴዳ ሳኣ ጎጌድኖ።
9 ሃꬃቱ ስሚደ ቢታ ካመናዳን፥
ኡንቱንቱ አꬋናዉ ዳንዳየና ዛዋ ኤሳዳ።
10 ኔን ፑልቶቱዋ ዛንጋራን ፑልትሳሳ፤
ኡንቱንቱ ሃꬃይ ደረቱዋ ግዱዋና ጎጌ።
11 ጎግያዋፐ ባዙዋ ዶአቱ ኡባይ ኡሺኖ፤
ደንባ ሃረቱ ባረንቱ ሳሙዋ አፐ አሊኖ።
12 ሳሉዋ ካፎቱ ሄ ሃꬃ ማታን ባረንቱ ጎልያ ኬጺደ፥
ታሽያ ግዶን የጺኖ።
13 ኔን ዎልቃማ ደረቱዋ ቦላን
ሳሉዋፐ እራ ቡክሳሳ፤
ቢታካ ነ ኩሽያ ኦሱዋ አይፍያን ካልሳሳ።
14 ኔን መህያዉ ማታ፥
አሳዉ ካꬃ ሞክሳሳ።
ሄዌነ፥ አሳይ ቢታ ኦꬂደ፥
ቢታፐ ካꬃ ደማናሳ።
15 አሳ ዎዛና ናሸችያ ዎይንያ፥
ሶምኡዋ ሽጭስያ ዛይትያነ
ዎልቃ ኩንꬅያ ቁማ ሞክሳሳ።
16 መꬍና ጎዳ ምꬃቱ፥
እ ቶኬዳ ሊባኖሳ ዝጋቱ፥
ዳሮ እራ ኡሺኖ።
17 ኡንቱንቱን ካፎቱ ባረንቱ ጎልያ ኬጺኖ፤
ቆለቱካ ጺዳ ቦላ ኬጺደ ደኢኖ።
18 ꬎቃ ደረቱዋ ቦላን ጋራቱ ደኢኖ፤
ቃይ ጉፓለቱ ሹቻ ጎንጎሉዋን ቆሰቲኖ።
19 ዎድያ ፓይዱዋ ኤርሳና ማላ፥
ኔን አግና መꬋዳ።
አዋይ ባረ ዉልያ ዎድያ ኤሬ።
20 ኔን ቃማ መꬋዳ፤
ꬉማን ዶአይ ኡባይ ከሴ።
21 ዎዳላ ጋሞቱ ሻንካቲደ ጉዲኖ፤
ኡንቱንቱ ባረንቶ ምያዋ ጾሳፐ ኮዪኖ።
22 አዋይ ከስያ ዎደ፥
ጉየ ስሚደ ባረንቱ ጌሱዋን ግሲኖ።
23 ሄ ዎደ አሳይ ባረ ኦሶ ከሴ፤
ሳአይ ቃማና ጋካናዉ ኦꬄ።
24 አቤት መꬍና ጎዳዉ፥ ነ ኦሱ አይ ኬሻ ዳሬ!
ነ አꬌዳ ኤራተꬃን ኔን ኡንቱንቱ ኡባ መꬋዳ፤
ሳአይ ኔን መꬌዳዋን ኩሜዳ።
25 አባይ ህንን ሄዌሽ፤ እ ዎልቃማነ አኮ፤
ፓይዱ ባይና ቃጽያ መታቱዋን፥
ግታቱዋንነ ጉꬃቱዋን ኩሚደ ደኤ።
26 ሄዋ ቦላን ማርካባቱ ቢኖ፤ ኢዮባ 41:1፤ ማዝ. 74:14፤ ኢሳ. 27:1
ቃይ ኔን መꬌዳ ሌዋታና ግያ ዳዊ አን ካኤ።
27 ኔን ኡንቱንታ ኮሽያ ዎድያን
ኡንቱንቶ ቁማ እማና ማላ፥
ኡንቱንቱ ኡባይ ኔና ጼሊኖ።
28 ኔን ኡንቱንቶ እምና፥ ኡንቱንቱ ማጺኖ፤
ኔን ነ ኩሽያፐ የግና፥
ኡንቱንቱ ሎኦባ ካሊኖ።
29 ኔን ነ ሶምኡዋ ገንꬅያ ዎደ ዳጋሚኖ።
ነ ሸምፑዋ ኔን አክያ ዎደ ሀይቂደ፥
ባረንቱ ቢታዉ ስሚኖ።
30 ሽን ኔን ነ ሸምፑዋ ኪትያ ዎደ፥
ሀራቱ መቲኖ፤ ቢታካ ኦራꬃሳ።
31 መꬍና ጎዳ ቦንቹ መꬍናዉ ደኦ፤
መꬍና ጎዳይ ባረ ኦሱዋን ናሸቶ።
32 እ ቢታ ጼልና፥ ቢታይ ቃጼ፤
ቃይ እ ደረቱዋ ቦንችና፥ ደረቱ ጩዋቲኖ።
33 ታን ታ ደኡዋ ኡባን መꬍና ጎዳዉ የጻና፤
ታን ደኤዳ ላይꬃ ኡባን ታ ጾሳ ሳባና።
34 ታን መꬍና ጎዳን ናሸትያ ድራዉ፥
ታ ቆፋይ አ ናሸቾ።
35 ናጋራንቻቱ ቢታፐ ꬋይኖ፤
ሀዋፐ ስንꬃዉ ኢታቱ ደኦፕኖ።
ታ ሸምፓቴ፥ መꬍና ጎዳ ጋላታ! መꬍና ጎዳ ጋላትተ!