እቼሸንꬆ ማጻፋ
107
(107—150)
መቱዋ ኡባፐ አሽያ ጾሳ ጋላትተ
1 መꬍና ጎዳ ጋላትተ!1 ኦዱዋ 16:34፤ 2 ኦዱዋ 5:13፤ 7:3፤ እዝራ 3:11፤ ማዝ. 100:5፤ 106:1፤ 118:1፤ 136:1፤ ኤር. 33:11 አያዉ ጎፐ፥
እ ኬካ፤ አገና አ ሲቁ መꬍናሳ።
2 መꬍና ጎዳይ አሼዳዋንቱነ፥
ሞርከቱዋ ኩሽያፐ ዎዜዳዋንቱ፥
ሄዋዳን ጊደ ሃሳይኖ።
3 ኡንቱንታ እ ቢታቱዋፐ፥
አዋይ ዶልያሳፐነ ዉልያሳፐ፥
ሁጲሳነ ገድሳ ባጋፐ
ሺሼዳዋንታ።
4 ኡንቱንቱፐ እቱ እቱ ባዙዋ ቢታን ዩዬድኖ።
ባረንቱ ደእያ ካታማ ብያ ኦግያ፥
ደማናዉ ዳንዳይበይክኖ።
5 ኡንቱንቱ ኮሻቴድኖነ ሳመቴድኖ፤
ኡንቱንቱ ይባቴድኖ።
6 ኡንቱንቱ መቶቴዳ ዎደ፥
መꬍና ጎዳዉ ዋሴድኖ፤
እ ኡንቱንታ ኡንቱንቱ ዋይያፐ አሼዳ።
7 ኡንቱንቱ ደአና ካታማ ጋካናዉ፥
እ ኡንቱንታ ስታ ኦግያና ካለꬄዳ።
8 አገና አ ሲቆነ፥
እ አሳዉ ኦꬄዳ ማላልስያባዉ፥
ኡንቱንቱ መꬍና ጎዳ ጋላትኖ።
9 አያዉ ጎፐ፥ እ ሳመቴዳዋንታ አሌ፤
ኮሻቴዳዋንታካ ሎኦባ ካልሴ።
10 ኡንቱንቱፐ እቱ እቱ
ꬍጵ ጎ ꬉማ ግዶን ኡቴድኖ፤
ኡንቱንቱ ብራታ ሳንሳላታን ዋየቴድኖ።
11 አያዉ ጎፐ፥ ኡንቱንቱ ጾሳ ቃላዉ ማካሌድኖነ፥
ኡባፐ ꬎቂያ ጾሳ ዞርያ ካꬌድኖ።
12 እ ኡንቱንታ ቱጋ ኦሱዋን ዳቡርሴዳ፤
ኡንቱንቱ ኩንዴድኖ፤
ሽን ኡንቱንታ ማድያዌ ꬋዬዳ።
13 ኡንቱንቱ መቶቴዳ ዎደ፥ መꬍና ጎዳዉ ዋሴድኖ፤
እ ኡንቱንታ ኡንቱንቱ ዋይያፐ አሼዳ።
14 ባረቶ ꬉማፐካ ከሴዳ፤
ኡንቱንቱ ቃሸቴዳ ብራታ ሳንሳላታካ ዱꬄዳ።
15 አገና አ ሲቆነ
እ አሳዉ ኦꬄዳ ማላልስያዎ
ኡንቱንቱ መꬍና ጎዳ ጋላትኖ።
16 አያዉ ጎፐ፥ እ ናሃስያፐ ኦሰቴዳ ፐንግያ መንꬄዳ፤
ብራታ ኩልቡዋካ ꬉኬዳ።
17 ኡንቱንቱፐ እቱ እቱ ቦዛ ግዴድኖ፤
ባረንቱ ኦꬄዳ ናጋራ ጋሱዋንነ፥
ባረንቱ ኢታተꬃ ጋሱዋን ቱጋቴድኖ።
18 ኡንቱንቱ ቁማ ኡባ ሸነቲደ፥
ሀይቆ ማቴድኖ።
19 ኡንቱንቱ መቶቴዳ ዎደ፥ መꬍና ጎዳዉ ዋሴድኖ፤
እ ኡንቱንታ ኡንቱንቱ ዋይያፐ አሼዳ።
20 እ ባረ ቃላ ኪቲደ፥ ኡንቱንታ ፓꬄዳ፤
ዱፉዋን ገልያዋፐ አሼዳ።
21 አገና አ ሲቆነ
እ አሳዉ ኦꬄዳ ማላልስያዎ
ኡንቱንቱ መꬍና ጎዳ ጋላትኖ።
22 ኡንቱንቱ አዉ ጋላታ ያርሹዋ ያርሽኖ፤
ቃይ ናሸቻ የꬃን እ ኦꬄዳዋ ኦድኖ።
23 ኡንቱንቱፐ እቱ እቱ፥
ማርካብያን ዎልቃማ አባ ቦላን ቤድኖ።
ኡንቱንቱ ሄ ዎልቃማ አባ ቦላ ባረንቱ ኦሱዋ ኦꬅያዋንታ።
24 ኡንቱንቱ መꬍና ጎዳ ኦሱዋ፥
እ ጪማ ጋርሳን ኦꬄዳ ማላልስያባ በኤድኖ።
25 እ አዛዚደ፥ ጎትያ ደንꬄዳ፤
አባ ሆቢ ቃጼዳ።
26 ኡንቱንቱ ፑደ ሳሉዋ ጩጉደቴድኖ፤
ሄዋፐ ዱገ ጪማ ዎꬌድኖ።
ሄ ኢታ መቱ ጋክና፥ ኡንቱንቱ ዎዛናይ ቶዩ ጌዳ።
27 ኡንቱንቱ ማꬆቴዳ አሳዳን
ꬉበቲደ ጋንድጋሬድኖ፤
ኡንቱንቱ ኤራይካ ጆሌዳ።
28 ኡንቱንቱ መቶቴዳ ዎደ፥ መꬍና ጎዳዉ ዋሴድኖ፤
እ ኡንቱንታ ኡንቱንቱ ዋይያፐ አሼዳ።
29 እ ጎትያ ጮኡ ኦꬄዳ፤
አባ ቤታካ ስርጵ ኦꬄዳ።
30 ጮኡ ጌዳ ድራዉ፥
ኡንቱንቱ ናሸቴድኖ፤
ጾሳይ ኡንቱንታ ኡንቱንቱ አሞቴዳ ካታማ አሄዳ።
31 አገና አ ሲቆነ
እ አሳዉ ኦꬄዳ ማላልስያባዉ
ኡንቱንቱ መꬍና ጎዳ ጋላትኖ።
32 ኡንቱንቱ አ አሳቱዋ ሺቁዋን ꬎቁ ꬎቁ ኦꬅኖ፤
ቃይ ጭማቱዋ ሺቁዋን አ ጋላትኖ።
33 ጾሳይ ሻፋቱዋ መልሴዳ፤
ፑልቶቱካ ጎገናዳን ተኤዳ።
34 ሄዋን ደእያ አሳቱዋ ኢታተꬃ ድራዉ፥
ሞክያ አራዳ ቢታካ፥
ሞከና መላ ቢታዉ ላሜዳ።
35 እ ዛሪደ መላ ባዙዋን ሃꬃይ ኤላናዳን፥
ቃይ መላ ቢታን ፑልቱ ꬉቃናዳን ኦꬄዳ።
36 ኮሸቴዳዋንታ ሄ ሳኣን ዎꬄዳ፤
ኡንቱንቱ ባረንቶ ደእያ ካታማ ኬጼድኖ።
37 ኡንቱንቱ ባረንቱ ጎሻን ዘሪደ፥
ዎይንያ ቶኪደ፥
ዳሮ ሙሩታ ሺሼድኖ።
38 እ ኡንቱንታ አንጅና፥ ኡንቱንቱ ሎይꬅ ጮራቴድኖ፤
ኡንቱንቱ መህያካ ጉꬅቤና።
39 አሳቱ ጾነትያ ዎደነ ኡንቱንቱ ኡቁና፥
መቱዋነ ካዩዋ ጋሱዋን ካዉሽያ ዎደ፥
40 ጾሳይ ካፖቱዋ ካꬌዳዋ በሴ፤
ኦጊ ባይና ባዙዋን ቶይላካታናዳን እ ኡንቱንታ ኦꬄ።
41 ሽን እ ህዬሳቱዋ ቱጋፐ ከሲደ፥
ኡንቱንቱ ጎለ አሳ ዶርሳ ዉድያዳን ጮራዬ።
42 ሱረ አሳቱ እ ኦꬅያዋ በኢደ ናሸቲኖ፤
ሽን ኢታ አሳቱ ኡባይ ጮኡ ጊኖ።
43 አꬌዳ ኤራንቻ ግድያዌ ሀ የዉዋ ቆፖ፤
መꬍና ጎዳ አገና ሲቁዋ አኬኮ።