119
ጾሳ ህግያዉ እመቴዳ ሳባ
አለፍ
1 ባረንቱ ኦግያን ቶሺ ባይናዋንቱነ፥
መꬍና ጎዳ ህግያዳን ሀመትያዋንቱ፥
አንጀቴዳዋንታ።
2 እ ኦዴዳዋ ኦꬅያዋንቱነ
ባረንቱ ኩመንꬃ ዎዛናፐ አ ሲቅያዋንቱ፥
አንጀቴዳዋንታ።
3 ኡንቱንቱ ባላባ ኦꬅክኖ፤
ጾሳ ኦግያን ሀመቲኖ።
4 ነ ዎጋዉ አማነቲደ ናጋና ማላ፥
ኔን ኑና አዛዛዳ።
5 ነ አዋዮ አዛዘትያዋን
ታ ኦጊ ምናናዳን አሞታይ።
6 ያቶፐ፥ ነ አዛዙዋ ኡባ ሀይዛደ፥
ታን ኡባካ ዬላትከ።
7 ነ ጽሎ ፕርዳ ታማራደ፥
ታን ኔና ሱረ ዎዛናፐ ጋላታና።
8 ታን ነ አዋዩዋዳን ኦꬃና፤
ታና ኡባካ የጎፓ።
ቤት
9 ያላጋይ ባረ ኦግያ ጌሻ ኦꬂደ
ዎት ናጋናዉ ዳንዳዪ?
ነ ቃላይ ግያዋዳን ደኦፐ ዳንዳዬ።
10 ታን ታ ፖሎ ዎዛናፐ ኔና ኮያይ፤
ነ አዛዞቱዋፐ ዎራ ሀመተናዳን ታና ናጋ።
11 ታን ኔና ናቀናዳን
ነ ቃላ ታ ዎዛናን ዎꬃድ።
12 አቤት መꬍና ጎዳዉ፥ ኔን ጋላተታ!
ነ አዋዩዋ ታና ታማርሳ።
13 ነ ዶናፐ ከሴዳ ፕርዳ ኡባ፥
ታን ታ እንጻርሳን ኦዳይ።
14 ዱረተꬃን ናሸትያዋዳን፥
ታን ኔን ኦዴዳ ቃላን ናሸታይ።
15 ነ ዎጋቱዋ ዛራ ዛራደ ቆፓይነ
ነ ኦግያ ሎይꬃ አኬካይ።
16 ታን ነ አዋዩዋን ናሸታይ፤
ነ ቃላካ ታን ዶግከ።
ጋሜል
17 ታን ፓጻ ደአና ማላነ
ነ ቃላዉ አዛዘታና ማላ፥
ታዉ ነ ቆማው ኬካባ ኦꬃ።
18 ነ ህግያ ግዶን ደእያ ማላልስያ ቱማተꬃ፥
ታን በአና ማላ፥ ታ አይፍያ ዶያ።
19 ታን ሀ ሳኣን እማꬃ፤
ነ አዛዞቱዋ ታፐ ገንꬆፓ።
20 ታን ኡባ ዎደ፥
ነ ፕርዳ ሎይꬃ ላሞታይ።
21 ኦቶረትያዋንቱ፥ ሸቀቴዳዋንታ፥
ነ አዛዙዋፐ ዎራ ሀመትያዋንታ፥
ኔን ሴራሳ።
22 ታን ኔን ኦዴዳዋ ኦꬄዳ ድራዉ፥
ኡንቱንቱ ቦርያነ ኡንቱንቱ ካꬍያ ታ ቦላፐ ድጋ።
23 ሀራይ አቶ ካፓቱ ሺቂደ፥
ታ ቦላ ማቀቶፐካ፥
ታን፥ ነ ቆማይ፥ ነ አዋዩዋ ዛራ ዛራደ ቆፓና።
24 ኔን ኦዴዳ ቃላቱ ታና ናሸቺኖ፤
ኡንቱንቱ ታና ዞሪኖ።
ዳሌጽ
25 ታን ሀይቃና ሀናይ፤
ኔን ጌዳ ቃላዳን ታ ሸምፑዋ አሻ።
26 ታን ታ ኦግያዋ ነዉ ኦድና፥
ኔን ታና ስሳዳ፤
ስም፥ ነ አዋዩዋ ታና ታማርሳ።
27 ነ ዎጋ ኦግያ ታና አኬክሳ፤
ማላልስያ ነ ኦሱዋ
ታን ዛራ ዛራደካ ቆፓና።
28 ካዩ ዳሬዳዋን ታ ሸምፑ ዳቡሬዳ፤
ኔን ጌዳ ቃላዳን ታና ምንሳ።
29 ዎርዶ ኦግያ ታፐ ሃሳ፤
ነ አꬎ ኬካተꬃን ነ ህግያ ታና ታማርሳ።
30 ቱሙዋ ኦግያ ዶራድ፤
ነ ፕርዳ ሀይዛድ።
31 አቤት መꬍና ጎዳዉ፥ ታን
ኔን ኦዴዳዋ ምንሳ ኦይቃድ፤
ስም ታና ዬላዮፓ!
32 ኔን ታ ዎዛና ላአ ከሴዳ ድራዉ፥
ታን ነ አዛዙዋ ኦግያን ዎጻይ።
ሄ
33 አቤት መꬍና ጎዳዉ፥ ነ አዋዩዋ ብለꬃ
ታና ታማርሳ፤
ታን ዉርሰꬃይ ጋካናዉ አ ናጋና።
34 ታን ነ ህግያ ናጋና ማላነ
ታ ኩመንꬃ ዎዛናፐ ታን አዉ አዛዘታና ማላ፥
ኔን ታዉ አኬካ እማ።
35 ነ አዛዙዋ ኦግያን ታና ካለꬃ፤
አያዉ ጎፐ፥ ታን አን ናሸታይ።
36 ታ ዎዛና አሙዋኮ ግደናን፥
ኔን ኦዴዳ ቃላኮ ዛራ።
37 ፓናባ ጼለና ማላ፥
ታ አይፈቱዋ ተአ፤
ነ ኦግያን ታ ደኡዋ ኦራꬃ።
38 ኔን ያየታና ማላ፥
ኔን ገሎ ቃላ ታዉ፥
ነ ቆማዉ ፖላ።
39 ያሽያ ቦርያ ታፐ ድጋ።
ነ ፕርዳይ አይ ማላ ሎኤ!
40 ታን ነ ዎጋ ናጋናዉ አሞታይ፤
ኔን ጽሉዋ ግድያ ድራዉ፥
ታ ደኡዋ ኦራꬃ።
ዋዉ
41 አቤት መꬍና ጎዳዉ፥ አገና ነ ሲቁዋ ታና በሳ፤
ኔን ጌዳ ቃላዳን ታና አሻ።
42 ታን ነ ቃላን አማነትያ ድራዉ፥
ታና ቦርያዋንቶ ዛራናዉ ዳንዳያይ።
43 ታን ነ ፕርዳን ናሸቻ ኦꬅያ ድራዉ፥
ታ እንጻርሳፐ ቱማተꬃ ቃላ ꬋይሶፓ።
44 ታን ኡባ ገደ፥ መꬍ መꬍናዉካ
ነ ህግያዉ አዛዘታና።
45 ታን ነ ዎጋ ፖልያ ድራዉ፥
አኩዋን ሀመታና።
46 ታን ካተቱዋ ስንꬃን ኤቃደ፥
ኔን ኦዴዳባ ኦዳደ ዬላትከ።
47 ታን ዶስያ ነ አዛዞቱዋን ናሸታይ
48 ታን ሲቅያ ነ አዛዞቱዋ ቦንቻይ፤
ነ አዋዩዋካ ዛራ ዛራደ ቆፓና።
ዛዉ
49 ኔን ታዉ፥ ነ ቆማዉ፥
እሜዳ ቃላ ቆፓ፤
ሄ ቃላን ታን ሂዶታ ኦꬃይ።
50 ኔን፥ “ታን ኔና ፓጻ ዎꬃና”
ጌዳ ቃላይ ታ ቱጋ ዎደ ታና ምንꬄዳ።
51 ኦቶራንቻቱ ታና ልክያፐ አꬂደ ሸቂኖ፤
ሽን ታን ነ ህግያፐ ሸርእ ጊከ።
52 አቤት መꬍና ጎዳዉ፥ በኒደፐ ደእያ ነ ፕርዳ ታን ሀሳያይ፤
ሄዋን ታን ምነታይ።
53 ኢታቱ ነ ህግያዉ አዛዘተናዋ በእና፥
ይሉ ታና ዎꬌዳ።
54 ታን ደእያ አላጋ ቢታን፥
ነ አዋዩ ታዉ የꬃ ግዴዳ።
55 አቤት መꬍና ጎዳዉ፥ ታን ቃማ ነ ሱንꬃ ቆፓይ፤
ነ ህግያካ ናጋይ።
56 ነ ዎጋዉ አዛዘትያዌ ታዉ አንጆ ግዴዳ።
ሄት
57 አቤት መꬍና ጎዳዉ፥ ታና ጋኬዳ ሳማይ ኔና፤
ታን ነ ቃላዉ አዛዘታና ያጋይ።
58 ታን ታ ኩመንꬃ ዎዛናፐ ኔና ዎሳይ።
ኔን ጌዳ ቃላዳን ታዉ ቃረታ።
59 ታን ታ ኦግያ አኬካ ጼላደ፥
ኔን ኦዴዳባኮ ስማድ።
60 ታን ነ አዛዙዋ ናጋናዉ፥
ኤሌላናፐ አትና ታክከ።
61 ኢታቱ ታና ዎዶሩዋን ቃቾፐካ፥
ታን ነ ህግያ ዶጋበይከ።
62 ነ ጽሎ ፕርዳ ድራዉ፥ ኔና ጋላታናዉ፥
ታን ቃማ ብላሄ ደንዳይ።
63 ታን ነዉ ያይያዋንቱ ኡባዉነ
ነ ዎጋ ናግያዋንቶ ዳቦ።
64 አቤት መꬍና ጎዳዉ፥ ሳአይ
አገና ነ ሲቁዋን ኩሜዳ፤
ነ አዋዩዋ ታና ታማርሳ።
ጼት
65 አቤት መꬍና ጎዳዉ፥ ነ ጌዳ ቃላዳን፥
ታዉ ነ ቆማዉ ኬካባ ኦꬃዳ።
66 ታን ነ አዛዞቱዋን አማነትያ ድራዉ፥
ሎኦ ፕርዳነ ኤራተꬃ ታና ታማርሳ።
67 ታን ሙረታናፐ ካሰ ዎራ ሀመታድ፤
ሽን ሀእ ነ ቃላዉ አዛዘታይ።
68 ኔን ኬካ፤ ኔን ኬካባ ኦꬃሳ፤
ነ አዋዩዋ ታና ታማርሳ።
69 ኦቶራንቻቱ ታና ዎርዱዋ ኦኪኖ፤
ሽን ታን ነ ዎጋ ታ ኩመንꬃ ዎዛናፐ ናጋና።
70 ኡንቱንቱ ዎዛናይ ኡባካ ዶንጭሎዋንታ፤
ሽን ታን ነ ህግያን ናሸታይ።
71 ታን ሙረቴዳዌ ታዉ ሎኤዳ፤
አያዉ ጎፐ፥ ነ አዋዩዋ ታማራናዉ ታና ማዴዳ።
72 ዳሮ ሻኡ ዎርቃፐነ ብራፐ፥
ነ ዶናፐ ከሴዳ ህጊ ታዉ አꬌ።
ዮድ
73 ታና ነ ኩሺ መꬌዳነ ጊግሴዳ።
ነ አዛዙዋ ታን ታማራና ማላ፥
ታዉ አኬካ እማ።
74 ታን ነ ቃላን ህዶታ ዎꬅያ ኦꬄዳ ድራዉ፥
ነዉ ያይያዋንቱ ታና በኢደ ናሸትኖ።
75 አቤት መꬍና ጎዳዉ፥ ነ ፕርዳይ ጽላ ግድያዋነ
ኔን አማነቴዳዋ ግዶ ድራዉ ታና ሙሬዳዋ ኤራይ።
76 ኔን ታዉ ነ ቆማዉ ጌዳ ቃላዳን፥
አገና ነ ሲቁ ታና ምንሶ።
77 ታን ፓጻ ደአና ማላ፥ ታዉ ቃረታ፤
አያዉ ጎፐ፥ ነ ህጊ ታና ናሸቼ።
78 ኦቶራንቻቱ ዎርዱዋን
ታና ሞትያ ድራዉ፥ ዬላትኖ።
ታና ግዶፐ፥ ታን ነ ዎጋቱዋ
ዛራ ዛራደ ቆፓይ።
79 ነዉ ያይያዋንቱነ፥
ኔን ኦዴዳባ ኤርያዋንቱ ኡባይ፥
ታኮ ዪኖ።
80 ታን ዬላተና ማላ፥
ነ አዋዮ አዛዘትያዋን
ቶሺ ባይናዋ ግዳርክታ!
ካፍ
81 ኔን ታና አሻና ማላ፥
ታን ናጋደ ዳቡራይ፤
ታን ነ ቃላን ህዶታ ኦꬃይ።
82 ኔን ጌዳ ቃላይ ፖለትና
በአናዉ ጼሊደ፥ ታ አይፊ ጋልጄዳ።
ታን፥ “ኔን ታና አዉደ ምንꬃኒሻ?” ያጋይ።
83 ጩዋን ካቄዳ ኦጎሩዋ ግዳደ ጉንዳድ፤
ግዶፐነ፥ ነ አዋዩዋ ባልከ።
84 ታን ነ ቆማይ አዉደ ጋካናዉ ናጎ?
ታና የደርስያዋንታ ኔን አዉደ ፕርዳኒ?
85 ነ ህግያ ናገና ኦቶራንቻቱ፥
ታና ኩድሳና ጊደ፥ ታዉ ኦላ ቦኪኖ።
86 ነ አዛዞቱ ኡባይ አማንꬅያዋንታ።
ታና አሳቱ ዎርዱዋን የደርስያ ድራዉ፥
ሀእ ታና ማዳ!
87 ኡንቱንቱ ታና ዎꬍ ድጌድኖሽን፤
ታን ነ ዎጋ አጋበይከ።
88 አገና ነ ሲቁዋን ታ ደኡዋ ናጋ፤
ሄዌነ፥ ኔን ነ ዶናፐ ኦዴዳዋ ታን ናጋናሳ።
ላሜድ
89 አቤት መꬍና ጎዳዉ፥ ነ ቃላይ መꬍናሳ፤
እካ ሳሉዋን ምኒደ ደኤ።
90 ኔን የለታፐ የለታ ጋካናዉ አማነትያዋ።
ኔን ሀ ሳኣ ባሳደ ኤሳዳ፤
እካ ምኒደ ደኤ።
91 ኔን ጌዳዋዳን ኡባባይካ
ሀች ጋካናዉ ምኒደ ደኤ፤
አያዉ ጎፐ፥ ኡባቱካ ነ ቆማቱዋ።
92 ነ ህጊ ታና ናሸችያባ ግደነንቶ፥
ታ ቱጋ ዎደ ታን ꬋያና ሽን።
93 ነ ዎጋ ኡባካ ዶግከ፤
አያዉ ጎፐ፥ ኔን አን ታና ፓጻ ዎꬃዳ።
94 ታን ነዋቴ፤ ታና አሻ፤
አያዉ ጎፐ፥ ታን ነ ዎጋ ናጋናዉ ኮያይ።
95 ኢታቱ ታና ꬋይሳናዉ ኩኩሊደ ናጊኖ፤
ሽን ታን ኔን ኦዴዳዋ ቆፓይ።
96 ፖሎ ጌተቶባዉ ኡባባዉ ዛዋይ ደእያዋ ታን በኣድ፤
ሽን ነ ህግያዉ ዛዋይ ባዋ።
ሜም
97 ታን ነ ህግያ ዋታ ዶሳይታ!
ጋላሳ ኩመንꬃ ታን ቆፕያዌ አ።
98 ነ አዛዞቱ ኡባ ዎደካ ታናና ደእያ ድራዉ፥
ኡንቱንቱ ታና ታ ሞርከቱዋፐ አꬌዳ ኤራንቻ ከሲኖ።
99 ታን ኔን ኦዴዳዋ ቆፕያ ድራዉ፥
ታና ታማርሴዳ ኡባፐካ አꬌዳ አኬካይ ታዉ ደኤ።
100 ታን ነ ዎጋዉ አዛዘትያ ድራዉ፥
ጭማቱዋፐ አꬃደ አኬካይ።
101 ታን ነ ቃላዉ አዛዘታናዉ ኮይያ ድራዉ፥
ታ ገድያ ኢታ ኦግያ ኡባፐ ናጋድ።
102 ኔን ታና ታማርሴዳ ድራዉ፥
ታን ነ ፕርዳፐ ዎራ ባበይከ።
103 ነ ቃላይ አያ ማልኢ!
ኤሳ እልሉዋፐካ አꬊደ፥
ታ ዶናን ማልኤ።
104 ነ ዎጋፐ አኬካ ደማድ፤
ሄዋ ድራዉ፥ ታን ጌላ ኦግያ ኡባ እጻይ።
ኖን
105 ነ ቃላይ ታ ገድያዉ ጾምፕያ፥
ታ ኦግያዉካ ፖኡዋ።
106 ነ ጽሎ ፕርዳዳን ደአናዉ፥
ታን ጫቄዳ ጫቁዋ ምንꬃና።
107 ታን ዳሮ ቱጋታድ፤
አቤት መꬍና ጎዳዉ፥ ኔን ጌዳ ቃላዳን
ታና ፓጻ ዎꬃ።
108 አቤት መꬍና ጎዳዉ፥ ታ ዶናፐ ከስያ ጋላታ፥ ያርሹዋ አካ፤
ታና ፕርዳ ታማርሳ።
109 ታ ሸምፑ መቱዋ ቦላ ደእንቶካ፥
ታን ነ ህግያ ዶግከ።
110 ኢታቱ ታዉ ግትያ የጌድኖ፤
ሽን ታን ነ ዎጋፐ ሸርእ ጋበይከ።
111 ኔን ኦዴዳባይ መꬍናዉ ታዋ፤
ኤ፥ እ ታ ዎዛናዉ ናሸቻ።
112 ታን መꬍናዉ፥ ዉርሰꬃ ጋካናዉ
ነ አዋዩዋዳን ኦꬃናዉ ቃቻድ።
ሳምከት
113 ታን ላኡ ቆፋይ ደእያ አሳቱዋ እጻይ፤
ሽን ነ ህግያ ሲቃይ።
114 ኔን ታዉ ቆሰታ አትያ ሳነ
ታ ጎንዳልያ፤
ታን ነ ቃላን ህዶታ ኦꬃይ።
115 ታን ታ ጾሳ አዛዙዋ ናጋና ማላ፥
ህንተኖ፥ ኢታባ ኦꬅያዋንቶ፥
ታፐ ሃክተ!
116 ኔን ጌዳ ቃላዳን ታና ምንሳ፤
ያቶፐ፥ ታን ፓጻ ደአና።
ታን ህዶታን ናግያባን ታና ዬላዮፓ።
117 ታና ዘምፕሳ፤ ያቶፐ፥
ታን ሳሮ ደአና፤
ታን ኡባ ዎደ ነ አዋዩዋ ሀይዛና።
118 ነ አዋዩዋፐ ዎራ ብያዋንታ ኡባ ኔን አካካ፤
ኡንቱንቱ ጭሙ ጮ መላ።
119 ሳኣን ደእያ ኢታቱዋ ኡባ
ኔን ፕቱዋዳን ፓይዳሳ፤
ሄዋ ድራዉ፥ ታን ኔን ኦዴዳባ ሲቃይ።
120 ታ ቦላይ ነዉ ያዪደ ኮኮሬዳ፤
ታን ነ ፕርዳዉ ያያይ።
ኤ
121 ልከባነ ጽሎባ ኦꬃድ፤
ታና ኡቁንያዋንቶ ኦሎፓ።
122 ታና ነ ቆማ ማዳናዉ ዋሰ ግዳ፤
ታና ኦቶራንቻቱዋን ኡቁንሶፓ።
123 ኔን፥ “ኔና አሻና”
ጌዳ ጽሎ ቃላ ፖሎ ጋደ ናግሽን፥
ታ አይፊ ጋልጄዳ።
124 ታዉ፥ ነ ቆማዉ፥ ኔን
አገና ነ ሲቁዋዳን ኦꬃ፤
ነ አዋዩዋካ ታና ታማርሳ።
125 ታን ነ ቆማ፤
ኔን ኦድያባ ታን ኤራና ማላ፥
አኬካ ታዉ እማ።
126 አቤት መꬍና ጎዳዉ፥ አሳቱ
ነ ህግያ መንꬄዳ ድራዉ፥
ኔን ፕርዳና ዎዲ ሀአ።
127 ታን ነ አዛዙዋ
ዎርቃፐ አꬃደ ሲቃይ፤
ኤ፥ ጌሻ ዎርቃፐካ አꬃደ ሲቃይ።
128 ሄዋ ድራዉ፥ ታን
ነ ዎጋቱ ኡባይ ግያዋዳን ሀመታይ፤
ጌላ ኦግያ ኡባ ታን እጻይ።
ፐ
129 ኔን ኦዴዳባይ ማላልስያባ፤
ሄዋ ድራዉ፥ ታን አዉ አዛዘታይ።
130 ነ ቃላ ብለꬃይ ፖኡዋ እሜ፤
አኬካይ ፓጬዳዋንቶ አኬካ እሜ።
131 ታን ነ አዛዞ፥
ዳሮ ሳመታደ ታ ዶና ዶያይ።
132 ሃ ታኮ ስማ፤
ነ ሱንꬃ ሲቅያዋንቱ ኡባዉ
ኔን ኦꬅያዋዳን ታዉካ ቃረታ።
133 ኔን ጌዳ ቃላዳን
ታ ሄመታ ሱርሳ፤
አይ ናጋራይነ ታና ሞዶፖ።
134 ታን ነ ዎጋዉ አዛዘታናዉ፥
ታና ኡቁኔዳዋንቱ ኩሽያፐ ዎዛ።
135 ታ ቦላ፥ ነ ቆማ ቦላ፥
ነ ሶምኡዋ ፖእሳ፤
ነ አዋዩዋካ ታማርሳ።
136 ነ ህግያዉ አሳይ አዛዘትቤና ድራዉ፥
ታ አይፍያፐ አፎꬃይ ሻፋዳን ጎጌ።
ጻደ
137 አቤት መꬍና ጎዳዉ፥ ኔን ጽሉዋ፤
ነ ፕርዳይካ ልከ።
138 ኔን ኦዴዳባይ
ጽሉዋነ ኡባ አማነትያዋ።
139 ታ ሞርከቱ ነ ቃላ ቶቼዳ ድራዉ፥
ነ ቃላ ምሹ ታ ጎምፓን ኤጽ ከሴዳ።
140 ኔን ጌዳ ቃላይ ዳሮፐ አማነትያዋ፤
ታን፥ ነ ቆማይ አ ሲቃይ።
141 ታን ጉꬃነ ካቴዳ አሳ፤
ግዶፐነ፥ ታን ነ ዎጋ ዶግከ።
142 ነ ጽሎተꬃይ መꬍናዉ ደኤ፤
ነ ህጊካ ቱማ።
143 መቱነ ቱጋይ ታና ጋኬዳ፤
ሽን ነ አዛዞቱ ታና ናሸቺኖ።
144 ኔን ኦዴዳባይ መꬍናዉካ ጽሉዋ፤
ታን ፓጻ ደአና ማላ፥ አኬካ ታዉ እማ።
ቆፍ
145 አቤት መꬍና ጎዳዉ፥ ኩመንꬃ ዎዛናፐ፥
ነዉ ዋሳድ፤ ታዉ አላ።
ታንካ ነ አዋዩዋ አዛዘታና።
146 ታን ነዉ ዋሳድ፤ ታና አሻ፤
ታንካ ኔን ኦዴዳባ ኦꬃና።
147 ጻልቂ ዶለና ጉራን ደንዳደ፥
“ታና ማዳ” ጋደ ነዉ ዋሳይ።
ኔን ታዉ ጌዳ ቃላን ህዶታ ኦꬃይ።
148 ነ ቃላባ ዛራ ዛራደ ቆፓናዉ፥
ቃማ ኡታ አቃይ።
149 አቤት መꬍና ጎዳዉ፥
አገና ነ ሲቁዋ ድራዉ፥ ታዋ ስሳ፤
ነ ጽሎ ፕርዳዳን ታና ፓጻ ዎꬃ።
150 ኢታባዉ ታና የደርስያዋንቱ፥
ታኮ ማቴድኖ፤
ኡንቱንቱ ነ ህግያፐ ሃኪኖ።
151 ሽን አቤት መꬍና ጎዳዉ፥
ኔን ታ ማታን ደኣሳ፤
ነ አዛዞቱ ኡባይካ ቱማ።
152 ታን በንፐ ዶማደ፥
ኔን ኦዴዳባ ታማራድ፤
አ ኔን መꬍናዉ ምንሳ ኤሳዳ።
ሬሽ
153 ታ ቱጋ በኣደ፥ ታና አሻ፤
አያዉ ጎፐ፥ ታን ነ ህግያ ዶጋበይከ።
154 ታ ድራዉ ሞተታደ ታና ዎዛ፤
ኔን ጌዳ ቃላዳን ታና ፓጻ ዎꬃ።
155 ነ አዋዩዋ ኡንቱንቱ አከና ድራዉ፥
አቶተꬃይ ኢታቱዋፐ ሃኩዋን ደኤ።
156 አቤት መꬍና ጎዳዉ፥ ነ ቃረታይ ዳራ፤
ነ ጽሎ ፕርዳዳን ታና ፓጻ ዎꬃ።
157 ታ ሞርከቱነ ታና የደርስያዋንቱ ዳራ፤
ሽን ታን ኔን ኦዴዳዋፐ ሸርእ ጊከ።
158 ኡንቱንቱ ነ አዛዞቱዋ ናገና ድራዉ፥
ታን ካድያዋንታ በኣደ ሸነታድ።
159 አቤት መꬍና ጎዳዉ፥
ታን ነ ዎጋ ሲቅያ ሲቁዋ ቆፓ፤
አገና ነ ሲቁዋዳን ታና ፓጻ ዎꬃ።
160 ነ ቃላይ ኮይሮፐካ ቱማ፤
ነ ጽሎ ፕርዳይ ኡባይካ መꬍናዉ ደኤ።
ሺን
161 ካፓቱ ታና ጮ የደርሲኖ፤
ሽን ታ ዎዛናይ ነ ቃላዉ ያዬ።
162 ዳሮባ ኦሞዴዳ አሳይ ናሸትያዋዳን፥
ኔን ጌዳ ቃላን ታን ናሸታይ።
163 ታን ዎርዱዋ እጻይነ ሸነታይ፤
ሽን ነ ህግያ ሲቃይ።
164 ነ ጽሎ ፕርዳ ድራዉ፥
ታን ኔና ጋላሳን ላፑ ገደ ጋላታይ።
165 ነ ህግያ ሲቅያዋንቶ
ኩመንꬃ ሳሮተꬃይ ደኤ፤
ኡንቱንታ ኡባካ አያይነ ꬉባናዉ ዳንዳየና።
166 አቤት መꬍና ጎዳዉ፥ ታን
ነ አቶተꬃ ሂዶታን ናጋይ፤
ነ አዛዞቱዋካ ኦꬃይ።
167 ታን ኔን ኦዴዳባ ናጋይ፤
ታን ዳሮፐ አ ሲቃይ።
168 ታን ነ ዎጋዉነ
ኔን ኦዴዳዎ አዛዘታና፤
አያዉ ጎፐ፥ ታ ኦግያ ኡባ ኔን በኣሳ።
ታዉ
169 አቤት መꬍና ጎዳዉ፥ ታ ዋሱ፥
ነ ስንꬃ ጋኮ፤
ኔን ጌዳ ቃላዳን ታዉ አኬካ እማ።
170 ታ ዋትዋቱ ነ ስንꬃ ጋኮ፤
ኔን ጌዳ ቃላዳን ታና አሻ።
171 ኔን ነ አዋዩዋ
ታና ታማርስያ ድራዉ፥
ታ ዶናፐ ጋላታይ ፑልታና።
172 ነ አዛዞቱ ኡባይ ጽሎ ግድያ ድራዉ፥
ታ እንጻርሳይ ነ ቃላባ የጻና።
173 ታን ነ ዎጋ ዶሬዳ ድራዉ፥
ነ ኩሺ ታና ማዳናዉ ጊጌዳዋ ግዶ።
174 አቤት መꬍና ጎዳዉ፥ ኔን
ታና አሻና ማላ ላሞታይ፤
ነ ህጊካ ታና ናሸቼ።
175 ታን ኔና ጋላታና ማላ፥
ታና ፓጻ ዎꬃ፤
ነ ፕርዳይካ ታና ማዶ።
176 ታን ባዬዳ ዶርሳዳን ብቻራይ፤
ታና ነ ቆማ ኮያ፤
አያዉ ጎፐ፥ ታን ነ አዛዙዋ ዶጋበይከ።