1 ዶርሳይ ላፑ ማታፋቱዋፐ እቱዋ ዶይሽን በኣድ፤ ቃይ ሸምፑዋና ደእያ ኦይዱ መታቱዋፐ እቱ ጉጉንꬃ ጉንꬃ ማላትያ ኮሻን፥ “ሃያ!” ያግያዋ፥ ታን ስሳድ። 2 ታን እት ቦꬃ ፓራ በኣድ። ሄ ፓራ ቶጌዳዌ ዎንዳፍያ ኦይቄዳ፤ ቃይ አዉ ካላቻይ እመቴዳ። ኦላ እ ጾኒድነ ቃይካ ጾናናዉ ከሴዳ። ዛካ. 1:8፤ 6:3፣ 6

3 ዶርሳይ ላኤንꬆ ማታፋ ዶዬዳ ዎደ፥ ሸምፑዋና ደእያ መታቱዋ ላኤንꬁ፥ “ሃያ!” ያግያዋ፥ ታን ስሳድ። 4 ቃይ ሀራ ዳማ ፓራይ ከሴዳ። አሳይ እቱ እቱዋና ሹከታና ማላ፥ ሄ ፓራ ቶጌዳዎ ሳኣን ሳሮተꬃ ድግያ ዎልቃይ እመቴዳ። ዎጋ ማሻይ አዉ እመቴዳ። ዛካ. 1:8፤ 6:2

5 ዶርሳይ ሄዘንꬆ ማታፋ ዶዬዳ ዎደ፥ ደኡዋን ደእያ መታቱዋ ሄዘንꬁ፥ “ሃያ!” ያግያዋ፥ ታን ስሳድ። ያታደ ካረꬃ ፓራይ ከሴዳዋ በኣድ፤ ቃይ ሄ ፓራ ቶጌዳዌ ባረ ኩሽያን ሚዛንያ ኦይቄዳ። ዛካ. 6:2፣ 6 6 ታን ደኡዋን ደእያ ኦይዱ መታቱዋ ግዶፐ ኮሻ ማላትያባ ስሳድ። ሄ ኮሻይ፥ “እት ጋላሳ ኦሶ ድርጉ ባጋ ኪሉዋ ዛርጋ፤ ቃይ እት ጋላሳ ኦሶ ድርጉ እት ኪሉዋ ባጋ ባንጋ። ሽን ዛይትያነ ዎይንያ ኤሳ ቆሆፓ” ያግያዋ ስሳድ።

7 ዶርሳይ ኦይደንꬆ ማታፋ ዶዬዳ ዎደ፥ ደኡዋን ደእያ መታቱዋ ኦይደንꬁ፥ “ሃያ!” ያግያዋ፥ ታን ስሳድ። 8 ታን ግራጨ ፓራይ ከሴዳዋ በኣድ። ሄ ፓራ ቶጌዳዋ ሱንꬃይ ሀይቁዋ፤ አ ጌዱዋ ስኦሊ ካሌዳ። ሀይቁነ ስኦሊ ሳኣፐ ኦይደንꬆ ኩሽያ ኦላን፥ ኮሻን፥ ሀርግያን፥ ዶኣን ዎꬍሳና ማላ፥ ኡንቱንቶ ማታይ እመቴዳ። ህዝ. 14:21

9 ዶርሳይ እቼሸንꬆ ማታፋ ዶዬዳ ዎደ፥ ኡንቱንቱ ጾሳ ቃላ ኦዴዳ ድራዉነ ባረንቱ ማርካተꬃን አማነቴዳ ድራዉ፥ ሹኬዳ አሳ ሸምፑዋ ያርሹዋ ያርሽያ ሳፐ ጋርሳን በኣድ። 10 ኡንቱንቱ ባረንቱ ቃላ ꬎቁ ኦꬂደ፥ “ኡባ ሞድያ ጎዳዉ፥ ጌሻዉ፥ ቱማንቻዉ፥ ሳኣን ደእያ አሳ ቦላ አዉደ ፕርዳይ? ቃይ ኑ ሱꬃ አዉደ ጭገታይ?” ያጌድኖ። 11 ኡንቱንቶ ሁጲያን ሁጲያን ቦꬃ ማዩ እመቴዳ። ኡንቱንቱዋዳን ሀይቃናዉ በስያ ኡንቱንቱ ላገꬃ ኦሳንቻቱዋ ፓይዱነ ኡንቱንቱ እሻቱዋ ፓይዱ ኩማና ጋካናዉ፥ ኡንቱንቱ አማሬዳ ዎድያ ታክሻና ማላ፥ ኡንቱንቶ ኦደቴዳ።

12 ዶርሳይ ኡሱፑንꬃ ማታፋ ዶዬዳ ዎደ፥ ታን በኣድ፤ ቢታይ ሎይꬅ ቃጼዳ። አዋይፊ ካረꬃ ማዩዋዳን ካረጼዳ፤ አገናይካ ሙለ ሱꬃ ማላቴዳ። 13 ባላስያ ግያ ምꬃት ጋምኤ አይፊ፥ ዎልቃማ ጫርኩ ቃꬅና፥ ሳኣን ቆቆፈትያዋዳን፥ ጾልንታቱ ሳሉዋፐ ሳኣን ቆቆፈቴድኖ። ኢሳ. 34:4 14 ሳሉ ጻጸቶ ማጻፋይ ጻጸትያዋዳን፥ ጻጸቲደ ꬋይ አጌዳ፤ ደር ኡባቱነ ሃꬃን ዶደቴዳ ሳአይ ኡባይ ባረንቱ ደኢያሳፐ ክች አጌድኖ። 15 ሄዋፐ ጉይያን፥ ሳኣ ካታቱ፥ ደርያ ሞድያዋንቱ፥ ሻላቃቱ፥ ዱራቱ፥ ዎልቃማቱ፥ ቃይ ሀራ አሳይ ኡባይ፥ አይለቱ፥ ዎማናቱ፥ ደርያ ከሲደ፥ ጎንጎሉዋ ግዶንነ ደርያን ደእያ ዛላ ጉየ ባጋን ቆሰቴድኖ። ኢሳ. 2:19፣ 21 16 ያቲደ ደረቱዋነ ሹቻ፥ “ካዉተꬃ ኦይድያን ኡቴዳዋ አይፍያፐነ ዶርሳ ሀንቁዋፐ ኑ ቦላ ኩንዲደ፥ ኑና ገንꬄርክቴሻ!ሆሰ 10:8፤ ሉቃሳ 23:30 17 አያዉ ጎፐ፥ ኡንቱንቶ ዎልቃማ ሀንቁዋ ጋላሳይ ጋክ ክቼዳ፤ ሄ ሀንቁዋ ዳንዳያናዌ ኦኔ?” ያጌድኖ። ኢዩ. 2:11፤ ሚልክ. 3:2