1 ሄዋፐ ጉይያን፥ እቼሸንꬆ ኪታንቻይ ባረ ማላካታ ፑንና ሳሉዋፐ ዱገ ሳኣ ኩንዴዳ ጾልንትያ በኣድ። ሄ ጾልንተዉ ጪሞ ኦላ *ጪሞ ኦላ፦ ሀዋ ጉሳይ ጋርሳ ባጋ ቢታን ዳርስ ጪማቲደ ደእያ ኢታ አያናቱ ባረንቱ ዉርሰꬃ ሙራ ጋላሳይ ጋካናዉ ቃሸቲደ ደኢያሳ። ቁልፒ እመቴዳ። 2 ጾልንቲ ጪሞ ኦላ ዶዬዳ፤ አኮ ጮጭያፐ ከስያ ጩዋ ማላ ጩዋይ ሄ ጪሞ ኦላፐ ከሴዳ። ቃይ አዋይነ ሳአይ ሄ ጪሞ ኦላፐ ከሴዳ ጩዋን ꬉሜድኖ።ዶመꬃ 19:28

3 ጩዋፐ ቦሊ ዱገ ሳኣ ዬዳ። ሳኣን ደእያ ሶጋቶ ደእያ ዎልቃ ማላ ዎልቃይ ቦለዉካ እመቴዳ። ከሳ 10:12-15 4 ጾሳ ማታፋይ ዴሙዋን ባይና አሳ ጻላላ ቆሀናፐ አትን፥ ሳኣን ደእያ ማታ ዎይ አጭያ ምꬃ ግድና ዎይ አይ ምꬃ ግድናካ ቆሄና ማላ፥ ቦለዉ ኦደቴዳ። ህዝ. 9:4 5 ቦሊ ሄ አሳ እቼሹ አገና ግድያዋ ፓጻ ካአና ማላ፥ ማታይ እመቴዳዋፐ አትን፥ አዉ አሳ ዎꬋናዉ ማታይ እመትቤና። ሶጉ አሳ ዱኪደ ሴልስያዋ ኬና ቦሊ ሴልሴ። 6 ሄ ጋላሳቱዋን አሳይ ሀይቁዋ ኮያና፤ ሽን ደመና። ቃይ ሀይቃናዉካ አሞታና፤ ሽን ሀይቁ አሳፐ ባቃታና። ኢዮባ 3:21፤ ኤር. 8:3

7 ቦሊ ኦላዉ ጊግ ኡቴዳ ፓራ ማላቴ። ቦልያ ሁጲያን ዎርቃ ማላትያ ካላቻይ ደኤ፤ አ ዴሙካ አሳ ዴሙዋ ማላቴ። ኢዩ. 2:4 8 አ ብናናይካ ማጫ አሳ ብናናይዳ አዱቄ፤ አ አቻይካ ጋሙዋ አቻ ማላቴ። ኢዩ. 1:6 9 አ ትራይ ብራታን ኦꬄዳ ጎንዳልያ ማላትያዋን ጎዘት ኡቴዳ፤ ቃይ አ ቀፍያ ኮሻይ ኦላ ባናዉ ፕሪጽያ ፓራቱ ጎችያ ጋርያ ኮሻ ማላ። ኢዩ. 2:5 10 አዉ ሶጉዋ ዱፍያ ማላትያ ዱፊ ደኤ፤ አ ዱፍያን ዱክያባይ ደኤ። ሄ ዱፍያን እቼሹ አገና ግድያዋ አሳ ቆሀናዳን፥ አዉ ማታይ እመቴዳ። 11 አ ሞድያ ካቲ ደኤ። ሄ ካቲ ጪሞ ኦላ ኪታንቻ። አ ሱንꬃይካ እብራይስጸ ቃላን አብዶና፤ ቃይ ግሪከ ቃላን አጶልዮና ጌተቴ። አጶልዮና ግያዎ ብለꬃይ፥ ꬋይስያዋ ግያዋ።

12 ኮይሮ አዬሮ ግያዌ አꬌዳ፤ በአ፥ ብሮ ሀራ ላኡ አዬሮ ግያዌ ያናዋ።

13 ኡሱፑንꬃ ኪታንቻይ ባረ ማላካታ ፑኔዳ። ጾሳ ስንꬃን ኤቄዳ ዎርቃፐ መꬌዳ ያርሽያሳን ደእያ ኦይዱ ጋጻ ካጨቱዋፐ እት ኮሻ ስሳድ። ከሳ 30:1-3 14 ሄ ኮሻይ ማላካታይ ደእያ ኡሱፑንꬃ ኪታንቻ፥ “ኤፍራጺሳ ግያ ዎጋ ሻፋን ቃሸቴዳ ኦይዱ ኪታንቻቱዋ ብላ” ያጌዳ። 15 አሳ ዛርያፐ ሄዘንꬆ ኩሽያ ዎꬋናዉ፥ ሀ ሳትያዉ፥ ጋላሳዉ፥ አገናዉነ ላይꬃዉ ጊግስ ዎꬄዳ፥ ኦይዱ ኪታንቻቱ ብለቴድኖ። 16 ኦላ ፓራ ቶግያ አሳ ፓይዱ ላኡ ጼቱ ሚሎነ ግድያዋ ታን ስሳድ።

17 ቃይካ ታን ሳጻን ፓራቱዋነ ሄ ፓራቱዋ ቶጌዳ አሳ በኣድ። አሳዉ ትራን ዎꬅያ ብራታ ጎንዳልያ ማላይ ደኤ። ሄ ትራን ዎꬅያ ብራታ ጎንዳልያ ማላይ ታማዳን ዞኦ፤ ሳማይያ፤ ቃይ ኤጽያ ዲንያ ማላ። ፓራቱዋ ሁጲ ጋሙዋ ሁጲያ ማላ። ኡንቱንቱ ዶናፐ ታማይ፥ ጩዋይነ አድልያ ጪሻ ማላትያ ኤጽያ ዲንያ ታማይ ከሴዳ። 18 ፓራቱዋ ዶናፐ ከሴዳ ታማን፥ ጩዋንነ ኤጽያ ዲንያን ሀ ሄዙ ቦሻቱዋን አሳ ዛርያፐ ሄዘንꬆ ኩሺ ሀይቄዳ። 19 አያዉ ጎፐ፥ ፓራቶ ዎልቃይ ዶናንነ ዱፍያን ደኤ። ኡንቱንቱ ዱፊካ ሁጲያና ደእያ ሾሻ ማላቴ፤ ሄዋን ኡንቱንቱ አሳ ቆሂኖ።

20 ሀ ቦሻቱዋን ሀይቀናን አቴዳ አሳይ ባረ ኩሽያን ኦꬅያዋ አግቤና። ቃይ ዎርቃፐ፥ ብራፐ፥ ናሃስያ ጌተትያ ብራታፐ ሹቻፐነ ምꬃፐ ኦሰቴዳ፥ ጼላናዉ ዎይ ስሳናዉ ዎይ ሀመታናዉ ዳንዳየና ኤቃዉነ ጻላህያዉ ጎይንያዋካ አግቤና። ማዝ. 115:4-7፤ 135:15-17፤ ዳኔላ 5:23 21 አሳይ ኤሪድ ዎꬌዳዋ፥ ዎይ ባረ ብቴዳዋ፥ ዎይ ባረ ዎሹሜዳዋ፥ ዎይ ባረ ዉኤዳዋ አጊደ፥ ባረ ናጋራፐ ስምቤና።