1 ቃይካ ታን ሀራ ዎልቃማ ኪታንቻይ ሳሉዋፐ ከሲደ፥ ዱገ ዎꬍያዋ በኣድ። ሻርያ እ ማይ ኡቴዳ፤ ቃይ ዙሉ አ ሁጲያ ዩይ አꬍ ኡቴዳ። አ ዴሙካ አዋ ማላ፤ አ ገዲካ ታማ ቱሳ ማላ። 2 ሄ ኪታንቻይ ዶያ ደእያ እት ጉꬃ ጻጸቶ ማጻፋ ባረ ኩሽያን ኦይቄዳ። ባረ ኡሸቻ ገድያ አባ ቦላ ኤሲደ፥ ባረ ሀድርሳ ገድያ ቢታ ቦላ ኤሴዳ። 3 ጉድያ ጋሙዋዳን፥ ዎልቃፐ ጉዴዳ። እ ጉዴዳዋፐ ጉይያን፥ ላፑ ጉጉንꬃቱ አናና ጉንꬃን ሃሳዬድኖ።

4 ኡንቱንቱ ጉሜዳ ዎደ ታን ጻፋናዉ ቆፓድ። ሽን ሳሉዋፐ፥ “ላፑ ጉጉንꬃቱ ሃሳዬዳዋ አሳዉ ቃቶፓነ ጻፎፓ” ያግያ ኮሻይ ታዉ ስሰቴዳ።

5 ሄዋፐ ጉየ፥ አባ ቦላንነ ቢታ ቦላን ኤቂደእሽን ታን በኤዳ ኪታንቻይ፥ ባረ ኡሸቻ ኩሽያ ሳሉዋ ፑደ ምጬዳ። ከሳ 20:11፤ ዛረ. 32:40፤ ዳኔላ 12:7፤ አሞጻ 3:7 6 ሳሉዋነ ሳሉዋን ደእያ ኡባባ፥ ሳኣነ ሳኣን ደእያ ኡባባ፥ አባነ አባን ደእያ ኡባባ፥ መꬌዳ መꬍ መꬍናዉ ደእያ ጾሳ ሱንꬃን ጫቄዳ። ያቲደ፥ “ዎዲ ዉራናዉ ጋምኤና። 7 ሽን ላፑንꬃ ኪታንቻይ ባረ ማላካታ ፑንያ ዎደ፥ ጾሳይ ናባቱዋ ግዴዳ ባረ ቆማቶ ቃላ ኦድ ዎꬄዳዋዳንካ፥ እ ጹሬዳ ቆፋይ ፖለታና” ያጌዳ።

8 ሄዋፐ ጉይያን፥ ሳሉዋፐ ሃሳይሽን ታን ስሴዳ ኮሻይ ላኤንꬁዋ ዛሪደ ታና፥ “አባ ቦላንነ ቢታ ቦላን ኤቄዳ ኪታንቻ ኩሽያን ዶያ ደእያ ጻጸቶ ማጻፋ ባደ አካ” ያግያዋ ስሳድ። ህዝ. 2:8—3:3

9 ታን ሄ ኪታንቻኮ ባደ፥ ጉꬃ ጻጸቶ ማጻፋ ታዉ እማና ማላ፥ አ ኦቻድ። እ ታና፥ “አካደ ማ፤ ማጻፋይ ነ ኡሉዋ ጫምሳናዋ፤ ሽን ነ ዶናን ኤሳዳን፥ እ ማልአናዋ” ያጌዳ።

10 ሄዋፐ ጉየ፥ ታን ኪታንቻ ኩሽያፐ ሄ ጉꬃ ጻጸቶ ማጻፋ አካደ ማድ፤ ታ ዶናን ማጻፋይ ኤሳዳን ማልኤዳ። ሽን ታን ሜዳዋፐ ጉይያን፥ ታ ኡሎ ግዱ ጫሜዳ። 11 ቃይካ ታና፥ “ያራ ኡባ፥ ዛርያ ኡባ፥ ዱማ ዱማ ቢታ ቃላነ ካታቱዋባ ኔን ትምቢትያ ቃንጸናን ሃሳያናዉ በሴ” ያጌዳ።