1 ሄዋፐ ጉይያን፥ ታን በኣድ። በእተ፥ ዶርሳይ ጽዮነ ደርያ ቦላ ኤቄዳ። አ ሱንꬃይነ አ አቡ ሱንꬃይ ዴሙዋን ጻፈቴዳ፥ እት ጼታነ ኦይታማነ ኦይዱ ሻአ አሳቱ አናና እትፐ ደኢኖ። ህዝ. 9:4፤ ሳፃ 7:3 2 ሳሉዋፐ ኩንꬆ ሃꬃ ጉንꬃነ ዳዳ ጉንꬃ ማላትያ ዎልቃማ ኮሻ ታን ስሳድ። ቃይ ታን ስሴዳ ኮሻይ ዲꬃ ዲጽያዋንቱ ባረንቱ ዲꬃ ዲጽና ስሰትያ ኮሻ ማላቴ። 3 እት ጼታነ ኦይታማነ ኦይዱ ሻአ አሳቱ ካዉተꬃ ኦይድያ ስንꬃን፥ ኦይዱ ፓጻ ደእያ መታቱዋ ስንꬃንነ ጭማቱዋ ስንꬃን ኤቄድኖ። ሳኣፐ ዎዘቴዳ ኡንቱንቱፐ አትን፥ ሀራይ ኦንነ ታማራናዉ ዳንዳየና ኦራꬃ ማዝሙርያ የጼድኖ። 4 ሀዋንቱ ጌሻ አሳቱዋ ግድያ ድራዉ፥ ማጫዋንቱና ጋከቲደ ባረና ቱንስበይክኖ። ዶርሳይ *ዶርሳ፦ የሱሳዉ እመቴዳ ሱንꬃ። ብያሳ ኡባ ኡንቱንቱ ካሊኖ። ኡንቱንቱ ጾሳዉነ ዶርሳዉ ባይራ ግዳናዉ፥ ሳኣ አሳ ግዶፐ ዎዘቴዳዋንታ። 5 ኡንቱንቱ ኡባካ ዎርዶት ኤርክኖ፤ ኡንቱንቱን ባይዙ ባዋ። ሶፎ. 3:13

6 ሳኣን ደእያ አሳ ኡባዉ፥ ዛርያ ኡባዉ፥ ቆሙዋ ኡባዉ፥ ዱማ ዱማ ቢታ ቃላ ኡባዉነ ያራ ኡባዉ መꬍና ዎንጋላ ምሽራቹዋ አዋያናዉ፥ ቦላ ሳሉዋን ፓልያ ሀራ ኪታንቻ ታን በኣድ። 7 ሄ ኪታንቻይ ባረ ቃላ ꬎቁ ኦꬂደ፥ “ጾሳዉ ያይተ፤ አ ቦንችተ። አያዉ ጎፐ፥ ሳኣ አሳ እ ፕርድያ ሳቲ ጋኬዳ። ሳሉዋ፥ ሳኣ፥ አባነ ሃꬃ ፑልቱዋ መꬌዳ ጾሳዉ ጎይንተ” ያጌዳ።

8 ሀራ ላኤንꬆ ኪታንቻይ፥ “ዎልቃማ ባብሎና ኩንዳዱ፤ እዛ ኩንዴዳ ጋሱነካ አሳ ዛርያ ኡባ ኢታ ኦሱዋ ኦስስያ ድራሳ” ያጊደ፥ ኮይሮ ኪታንቻ ካሌዳ። ኢሳ. 21:9፤ ኤር. 51:8፤ ሳፃ 18:2

9 ሄዘንꬆ ኪታንቻይ ባረ ኮሻ ꬎቁ ኦꬂደ፥ ሀዋዳን ያጊደ፥ ኮይሮ ላኡ ኪታንቻቱዋ ካሌዳ፤ “ዶአዉነ አ ምስለዉ ጎይንያ ኦንነ ቃይ አ ማላ ባረ ዴሙዋን ዎይ ባረ ኩሽያን ዎꬅያ ኦንነ ደኦፐ፥ 10 ጾሳይ ባረ ዎልቃማ ሀንቁዋ ቡርጩኩዋን ኩንꬄዳ ሀንቁዋ ዎይንያ ኤሳ እ ኡሻና። ሄዋ ኦꬄዳ ኡባይ ጌሻ ኪታንቻቱዋ ስንꬃንነ ዶርሳ ስንꬃን፥ ታማንነ ኤጽያ ዲንያን ፓጻ ካኤታና። ኢሳ. 51:17፤ ዶመꬃ 19:24፤ ህዝ. 38:22 11 ኡንቱንታ ፓጻ ካእያ ታማ ጩዋይ መꬍ መꬍናዉ ጩዋታና። ዶአዉነ ሄ ዶኣ ምስለዉ ጎይንያ ኦስነ ቃይ ሄ ዶኣ ሱንꬃ ማላታና ደእያ ኦስነ ቃማነ ጋላስ ሸምፑ ባዋ” ያጌዳ። ኢሳ. 34:10

12 ጾሳዉ አዛዘትያነ የሱሳዉ አማነትያ ጌሻቱ ዳንዳይያ ዳንዳያይ ሀዋና።

13 ሄዋፐ ጉይያን ሳሉዋፐ፥ “ሀዋ ጻፋ፤ ሀዋፐ ስንꬃዉ ጎዳን ሀይቂያዋንቱ አንጀቴዳዋንታ” ያግያ ኮሻ ታን ስሳድ።

አያናይ፥ “ቱማ፤ ኡንቱንቱ ባረንቱ ዳቡራፐ ሸምፓና፤ አያዉ ጎፐ፥ ኡንቱንቱ ሎኦ ኪታዉ፥ ጾሳይ ሎኡዋን ዛራና” ያጌ።

14 ቃይካ ታን በኣድ። በእተ፥ ቦꬃ ሻሪ ደኤ። ሻርያ ቦላን አሳ ናኣ ማላትያዌ ኡቴዳ፤ አ ሁጲያን ዎርቃ ካላቻይ፥ ቃይ አ ኩሽያን ቃራ ባጫይ ደኤ። ዳኔላ 7:13 15 ሀራ ኪታንቻይ ጌሻ ጎልያፐ ከሲደ፥ ሻርያ ቦላን ኡቴዳዎ ባረ ቃላ ꬎቁ ኦꬂደ፥ “ቆይቻ ሳቲ ጋኬዳ ድራዉ፥ ነ ባጫ የዳደ ካꬃ ቆይጫ፤ አያዉ ጎፐ፥ ሳኣ ካꬃይ መሌዳ” ያጌዳ። ኢዩ. 3:13 16 ሻርያ ቦላን ኡቴዳዌ፥ ባረ ባጫ ሳኣ የዲደ፥ ሳኣ ካꬃ ጫኬዳ።

17 ቃይካ ሳሉዋን ደእያ ጌሻ ጎልያፐ ሀራ ኪታንቻይ ከሴዳ፤ አዉካ ኩሳ ባጫይ ደኤ።

18 ታማዉ ካፖ ግዴዳ ሀራ ኪታንቻይ ያርሽያ ሳፐ ከሲደ፥ ኩሳ ባጫይ ደእያ ኪታንቻዉ ባረ ቃላ ꬎቁ ኦꬂደ፥ “ዎይንያ አይፊ ቴሬዳ ድራዉ፥ ነ ኩሳ ባጫ የዳደ፥ ሳኣን ደእያ ዎይንያ ቱራፐ ሆንዶዳ አይፍያ ቃንጻ!” ያጌዳ። 19 ሄ ኪታንቻይ ባረ ባጫ ሳኣ የዲደ፥ ሳኣን ደእያ ዎይንያፐ ሆንዶዳ አይፍያ ቃንጼዳ፤ ጾሳ ዎልቃማ ሀንቁዋ ሄ ዎይንያ ጉምእያ ኦላን የጌዳ። 20 ካታማፐ ጋጻን ደእያ ዎይንያ አይፍያ ጉምእያ ኦላን ዎይንያ አይፊ ጉምኤቴ። ሱꬃይ ከሲደ፥ ሄ ዎይንያ ጉምእያ ኦላፐ ሄዙ ጼቱ ኪሎ ሚትርያ ኬና ሃኪደ፥ ፓራዉ ፑሉዋ ጋክያዋ ኬና ꬎቁ ጊደ ኤሌዳ። ኢሳ. 63:3፤ ሴላ 1:15፤ ሳፃ 19:15