1 ሄዋፔ ጉዪያን፥ ታኒ ቤዓዲ። ቤዒቴ፥ ዶርሳይ ፂዮኔ ዴሪያ ቦላ ኤቄዳ። ኣ ሱንꬃይኔ ኣ ኣቡ ሱንꬃይ ዴሙዋን ፃፌቴዳ፥ ኢቲ ፄታኔ ኦይታማኔ ኦይዱ ሻዓ ኣሳቱ ኣናና ኢቲፔ ዴዒኖ። ሂዝ 9፡4፤ ሳፅ 7፡3 2 ሳሉዋፔ ኩንꬆ ሃꬃ ጉንꬃኔ ዳዳ ጉንꬃ ማላቲያ ዎልቃማ ኮሻ ታኒ ሲሳዲ። ቃሲ ታኒ ሲሴዳ ኮሻይ ዲꬃ ዲፂያዋንቱ ባሬንቱ ዲꬃ ዲፂና ሲሴቲያ ኮሻ ማላቴ። 3 ኢቲ ፄታኔ ኦይታማኔ ኦይዱ ሻዓ ኣሳቱ ካዉቴꬃ ኦይዲያ ሲንꬃን፥ ኦይዱ ፓፃ ዴዒያ ሜꬌታቱዋ ሲንꬃኒኔ ጪማቱዋ ሲንꬃን ኤቄዲኖ። ሳዓፔ ዎዜቴዳ ኡንቱንቱፔ ኣቲን፥ ሃራይ ኦኒኔ ታማራናው ዳንዳዬና ኦራꬃ ማዚሙሪያ ዬፄዲኖ። 4 ሃዋንቱ ጌሻ ኣሳቱዋ ጊዲያ ዲራው፥ ማጫዋንቱና ጋኬቲዴ ባሬና ቱኒሲቤይኪኖ። ዶርሳይ *ዶርሳ፡ ዬሱሳው ኢሜቴዳ ሱንꬃ። ቢያሳ ኡባ ኡንቱንቱ ካሊኖ። ኡንቱንቱ ፆሳሲኔ ዶርሳሲ ባይራ ጊዳናው፥ ሳዓ ኣሳ ጊዶፔ ዎዜቴዳዋንታ። 5 ኡንቱንቱ ኡባካ ዎርዶቲ ኤሪኪኖ፤ ኡንቱንቱን ባዪዙ ባዋ። ሶፍ 3፡13

6 ሳዓን ዴዒያ ኣሳ ኡባው፥ ዛሪያ ኡባው፥ ቆሙዋ ኡባው፥ ዱማ ዱማ ቢታ ቃላ ኡባዉኔ ያራ ኡባው ሜꬊና ዎንጋላ ሚሺራቹዋ ኣዋጃናው፥ ቦላ ሳሉዋን ፓሊያ ሃራ ኪታንቻ ታኒ ቤዓዲ። 7 ሄ ኪታንቻይ ባሬ ቃላ ꬎቁ ኡዲዴ፥ «ፆሳው ያዪቴ፤ ኣ ቦንቺቴ። ኣዪሲ ጎፔ፥ ሳዓ ኣሳ ኢ ፒርዲያ ሳቲ ጋኬዳ። ሳሉዋ፥ ሳዓ፥ ኣባኔ ሃꬃ ፑልቱዋ ሜꬌዳ ፆሳው ጎዪኒቴ» ያጌዳ።

8 ሃራ ላዔንꬆ ኪታንቻይ፥ «ዎልቃማ ባቢሎና ኩንዳዱ፤ ኢዛ ኩንዴዳ ጋሱኔካ ኣሳ ዛሪያ ኡባ ኢታ ኦሱዋ ኦሲሲያ ዲራሳ» ያጊዴ፥ ኮይሮ ኪታንቻ ካሌዳ። ኢሳ 21፡9፤ ኤርም 51፡8፤ ሳፅ 18፡2

9 ሄዜንꬆ ኪታንቻይ ባሬ ኮሻ ꬎቁ ኡዲዴ፥ ሃዋዳን ያጊዴ፥ ኮይሮ ላዑ ኪታንቻቱዋ ካሌዳ፤ «ዶዓዉኔ ኣ ሚሲሌው ጎዪኒያ ኦኒኔ ቃሲ ኣ ማላ ባሬ ዴሙዋን ዎይ ባሬ ኩሺያን ዎꬂያ ኦኒኔ ዴዖፔ፥ 10 ፆሳይ ባሬ ዎልቃማ ሃንቁዋ ቡርጩኩዋን ኩንꬄዳ ሃንቁዋ ዎዪኒያ ኤሳ ኢ ኡሻና። ሄዋ ኦꬄዳ ኡባይ ጌሻ ኪታንቻቱዋ ሲንꬃኒኔ ዶርሳ ሲንꬃን፥ ታማኒኔ ኤፂያ ዲኒያን ፓፃ ካዔታና። ኢሳ 51፡17፤ ዶም 19፡24፤ ሂዝ 38፡22 11 ኡንቱንታ ፓፃ ካዒያ ታማ ጩዋይ ሜꬊ ሜꬊናው ጩዋታና። ዶዓዉኔ ሄ ዶዓ ሚሲሌው ጎዪኒያ ኦሲኔ ቃሲ ሄ ዶዓ ሱንꬃ ማላታና ዴዒያ ኦሲኔ ቃማኔ ጋላሲ ሼምፑ ባዋ» ያጌዳ። ኢሳ 34፡10

12 ፆሳው ኣዛዜቲያኔ ዬሱሳው ኣማኔቲያ ጌሻቱ ዳንዳዪያ ዳንዳያይ ሃዋና።

13 ሄዋፔ ጉዪያን ሳሉዋፔ፥ «ሃዋ ፃፋ፤ ሃዋፔ ሲንꬃው ጎዳን ሃይቂያዋንቱ ኣንጄቴዳዋንታ» ያጊያ ኮሻ ታኒ ሲሳዲ።

ኣያናይ፥ «ቱማ፤ ኡንቱንቱ ባሬንቱ ዳቡራፔ ሼምፓና፤ ኣዪሲ ጎፔ፥ ኡንቱንቱ ሎዖ ኪታው፥ ፆሳይ ሎዑዋን ዛራና» ያጌ።

14 ቃሲካ ታኒ ቤዓዲ። ቤዒቴ፥ ቦꬃ ሻሪ ዴዔ። ሻሪያ ቦላን ኣሳ ናዓ ማላቲያዌ ኡቴዳ፤ ኣ ሁጲያን ዎርቃ ኣኪሊሊ፥ ቃሲ ኣ ኩሺያን ቃራ ባጫይ ዴዔ። ዳን 7፡13 15 ሃራ ኪታንቻይ ጌሻ ጎሊያፔ ኬሲዴ፥ ሻሪያ ቦላን ኡቴዳዎ ባሬ ቃላ ꬎቁ ኡዲዴ፥ «ቆይቻ ሳቲ ጋኬዳ ዲራው፥ ኔ ባጫ ዬዳዴ ካꬃ ቆይጫ፤ ኣዪሲ ጎፔ፥ ሳዓ ካꬃይ ሜሌዳ» ያጌዳ። ኢዩ 3፡13 16 ሻሪያ ቦላን ኡቴዳዌ፥ ባሬ ባጫ ሳዓ ዬዲዴ፥ ሳዓ ካꬃ ጫኬዳ።

17 ቃሲካ ሳሉዋን ዴዒያ ጌሻ ጎሊያፔ ሃራ ኪታንቻይ ኬሴዳ፤ ኣዉካ ኩሳ ባጫይ ዴዔ።

18 ታማው ካፖ ጊዴዳ ሃራ ኪታንቻይ ያርሺያሳፔ ኬሲዴ፥ ኩሳ ባጫይ ዴዒያ ኪታንቻው ባሬ ቃላ ꬎቁ ኡዲዴ፥ «ዎዪኒያ ኣይፊ ቴሬዳ ዲራው፥ ኔ ኩሳ ባጫ ዬዳዴ፥ ሳዓን ዴዒያ ዎዪኒያ ቱራፔ ሆንዶዳ ኣይፊያ ቃንፃ!» ያጌዳ። 19 ሄ ኪታንቻይ ባሬ ባጫ ሳዓ ዬዲዴ፥ ሳዓን ዴዒያ ዎዪኒያፔ ሆንዶዳ ኣይፊያ ቃንፄዳ፤ ፆሳ ዎልቃማ ሃንቁዋ ሄ ዎዪኒያ ጉሚዒያ ኦላን ዬጌዳ። 20 ካታማፔ ጋፃን ዴዒያ ዎዪኒያ ኣይፊያ ጉሚዒያ ኦላን ዎዪኒያ ኣይፊ ጉሚዔቴ። ሱꬃይ ኬሲዴ፥ ሄ ዎዪኒያ ጉሚዒያ ኦላፔ ሄዙ ፄቱ ኪሎ ሚቲሪያ ኬና ሃኪዴ፥ ፓራው ፑሉዋ ጋኪያዋ ኬና ꬎቁ ጊዴ ኤሌዳ። ኢሳ 63፡3፤ ሴል 1፡15፤ ሳፅ 19፡15