13
ታን አባፐ ከስያ ላኡ ዶአቱዋ በኣድ
1 ሄዋፐ ጉይያን፥ እት ዶአይ አባፐ ከስሽን፥ ታን በኣድ። አዉ ታሙ ካጪነ ላፑ ሁጲ ደኤ፤ አ ታሙ ካጭያ ቦላን ታሙ ካላቻይ ደኤ። አ ሁጲያንካ ቦርያ ሱንꬃይ ጻፈት ኡቴዳ። ዳኔላ 7:3፤ ሳፃ 17:3፣ 7-12 2 ታን በኤዳ ዶአይ ማህያ ማላቴ፤ አ ገዲ ባባንꬃ ጌተትያ ኢታ ዱኣ ገድያ ማላቴ፤ አ ዶናይ ጋሙዋ ዶና ማላቴ። ዳዊ ባረ ዎልቃ፥ ባረ ካዉተꬃ ኦይድያነ ባረ ዎልቃማ ማታ ሄ ዶአዉ እሜዳ። ዳኔላ 7:4-6
3 ሄ ዶኣ ሁጰቱዋፐ እቱ ሀይቄዳዋ ማላትያዋ ታን በኣድ፤ ሽን ዎꬍያ ማይꬃይ ፓጼዳ። ሳኣ አሳይ ኡባይ ማላለቲደ፥ ሄ ዱኣ ጌዱዋ ካሌዳ። 4 ዳዊ ባረ ማታ ዶአዉ እሜዳ ድራዉ፥ አሳይ ኡባይ ዳዊያዉ ጎይኔዳ። ቃይ ሄ አሳይ፥ “ዶኣ ማላይ ኦኔ? አናና ኦለታናዉ ኦን ዳንዳዪ?” ያጊደ፥ ዶአዉ ጎይኔዳ።
5 ሄ ዶአዉ ፓላ የዉዋነ ቦርያ ሃሳይያ ዶናይ እመቴዳ። ኦይታማነ ላኡ አገናዉ ኦꬃና ማላ፥ አዉ ማታይ እመቴዳ። ዳኔላ 7:8፣ 25፤ 11:36 6 ሄ ዶአይ ጾሳ፥ አ ሱንꬃ፥ እ ደኢያሳነ ሳሉዋን ደእያ ኡባቱዋ ቦርያ ዶሜዳ። 7 ሄ ዶአይ ጾሳ አሳቱዋና ኦለቲደ፥ ኡንቱንታ ጾናና ማላ፥ አዉ ማታይ እመቴዳ። ቆሙዋ ኡባ፥ ያራ ኡባ፥ ዱማ ዱማ ቢታ ቃላ ኡባነ ዛርያ ኡባ ሞድያ ማታይ አዉ እመቴዳ። ዳኔላ 7:21 8 ሳአይ መታናፐ ካሰ ሹከቴዳ ዶርሳ ደኡዋ ማጻፋን ሱንꬃይ ጻፈትቤና አሳይ፥ ሳኣን ደእያዌ ኡባይ፥ ሄ ዶአዉ ጎይናና። ማዝ. 69:28
9 ስስያ ሀይꬃይ ደእያ ኡራይ ስሶ።
10 ኦሞደታና አሳይ ደኦፐ፥
ኦንነ ኦሞደታናዋ።
ማሻን ሹከታና አሳይ ደኦፐ፥
ኦንነ ማሻን ሹከታናዋ።
ጌሻቱዋ ዳንዳያይነ፥
አማኑ ሀዋን ኤረታናዋ። ኤር. 15:2፤ 43:11
ታን ሳኣፐ ከስያ ዶኣ በኣድ
11 ሄዋፐ ጉይያን፥ ሀራ ዶአይ ሳኣፐ ከስያዋ ታን በኣድ። ዶርሳ ካጭያ ማላትያ ላኡ ካጪ አዉ ደኤ፤ ሽን ሄ ዶአይ ዳዊያዳን ሃሳዬዳ። 12 ሄ ዶአይ ኮይሮ ዶኣ ዎልቃማ ማታ ኡባ አ ስንꬃን ኦꬄዳ። ሳአይነ ሳኣን ደእያ አሳይ ኡባይ አ ዎꬍያ ማይꬃይ ፓጼዳ ኮይሮ ዶአዉ ጎይናና ማላ፥ ሄ ዶአይ ጎዳቴዳ። 13 ሄ ላኤንꬆ ዶአይ ዎልቃማ ማላታቱዋ ኦꬄዳ፤ ሀራይ አቶ ታማ ሳሉዋፐ አሳ ኡባ ስንꬃ ሳኣ ዎꬃና ጋካናዉ ማላታቱዋ ኦꬄዳ። 14 ኮይሮ ዶኣ ስንꬃን ኦꬃናዉ፥ አዉ እመቴዳ ማላታቱዋን ሳኣን ደእያ አሳ ኡባ እ ባለꬄዳ። ማሻን ማይꬃቶፐነ ፓጻ ደእያ ኮይሮ ዶኣ ቦንቾ ምስልያ ጊግሳናዳን፥ ሳኣ አሳ ኡባዉ ላኤንꬆ ዶአይ ኦዴዳ። 15 ቃይ ኮይሮ ዶኣ ምስሊ ሃሳያናዳንነ ባረዉ ጎይነና ኡባ ዎꬋናዳን፥ ላኤንꬆ ዶአይ ባረ ሸምፑዋ ኮይሮ ዶኣ ምስልያን ሸምፑዋ ገልሳናዉ አዛዘቴዳ።
16 አሳይ ኡባይ ዎጋይነ ቄራይ፥ ማንቁነ ዱሪ፥ ዎማኑነ አይሊ ባረ ኡሸቻ ኩሽያን ዎይ ባረ ዴሙዋን ማላ ዎꬃናዳን፥ ሄ ላኤንꬆ ዶአይ ጎዳቴዳ። 17 ሄ ዶኣ ሱንꬃይ ዎይ አ ሱንꬃ ፓይዱ ደእያ ማላይ ባይና አሳይ ኦንነ ዛልአናዉነ ሻማናዉ ዳንዳየና።
18 አꬌዳ ኤራተꬃይ ሀዋን ደኤ። ኤራይ ደእያ ኦንነ ሄ ዶኣ ፓይዱዋ ብለꬃ ኤሮ፤ አያዉ ጎፐ፥ ሄ ፓይዱ እት አሳ ሱንꬃ። አ ፓይዱ ኡሱፑን ጼታነ ኡሱፑን ታማነ ኡሱፑና።