12
ታን ምሽራቶ፥ ናኣነ ዳዊያ በኣድ
1 ሄዋፐ ጉይያን፥ ሳሉዋን ዎልቃማ ማላይ ቤቴዳ። አዋ ማዬዳ እት ምሽራታ፥ አገና ቦላ ኤቄዳዉና፥ ታማነ ላኡ ጾልንትያ ካላቻ ባረ ሁጲያን ዎꬄዳዉና ሄዋን ደአዉ። 2 ሄ ምሽራታ ሻሃራ፤ እዞ የሉዋ ኦይꬃይ፥ ኡንኤꬅና ዋሳዱ።
3 ሀራ እት ዎልቃማ ማላይ ሳሉዋን ቤቴዳ። ታሙ ካጭያና ደእያ ላፑ ሁጲያን ካላቻ ዎꬄዳ እት ዎልቃማ ዞኦ ዳዊ ደኤ። ዳኔላ 7:7 4 ሄ ዳዊ ባረ ዱፍያን ሄዘንꬆ ኩሸ ጾልንትያ ሳሉዋፐ ዳፊደ፥ ሳኣን ኦሌዳ። ሄ ዳዊ የለት ዎꬎሳናካ ናኣ ማናዉ የላና ሀንያ ምሽራት ስንꬃን ኤቄዳ። ዳኔላ 8:10
5 ምሽራታ አቱማ ናኣ፥ አይሁዳ ግደና አሳ ኡባ ብራታ ጻምኣን ሞዳናዋ የላዱ። ሽን ናአይ ጾሳኮነ አ አራታኮ፥ ፑደ ኤለካ አከቴዳ። ኢሳ. 66:7፤ ማዝ. 2:9 6 ምሽራታ እት ሻአነ ላኡ ጼታነ ኡሱፑን ታሙ ጋላሳዉ ምዚደነ ኡሺደ ዎꬃናዉ ጾሳይ ጊግስ ዎꬄዳ ሳኣ ባዙዋ ባቃታዱ።
7 ሄዋፐ ጉይያን፥ ሳሉዋን ኦላይ ደንዴዳ። ምካኤል ባረ ኪታንቻቱዋና እትፐ ዳዊያ ኦለቴዳ፤ ዳዊካ ባረ ኪታንቻቱዋና ግዲደ፥ ዛር ኦለቴዳ። ዳኔላ 10:13፣ 21፤ 12:1፤ ዳኔላ 9 8 ሽን ዳዊ ጾነትና ዳዊያስነ አ ኪታንቻቶ ሳሉዋን ሳአይ ꬋዬዳ። 9 ዎልቃማ ዳዊ፥ ጻላህያ ካፑዋ ዎይ ሴጻና ግያዌ፥ በን ሾሻይ፥ አላምያ ኡባ ባለꬅያዌ ኦለቴዳ፤ እ ባረ ኪታንቻቱዋና እትፐ ዱገ ሳአዉ ኦለቴዳ።
10 ሄዋፐ ጉይያን፥ ታን ሳሉዋፐ ሀዋዳን ያግያ ኮሻ ስሳድ፤
“ጾሳ አቶተꬃይ ሀእ ዬዳ።
ጾሳይ ባረዉ ካተ ግድያዋዳንካ፥
ባረ ዎልቃ በሴዳ፤
አ ክርስቶስ ባረ ማታ በሴዳ።
አያዉ ጎፐ፥
ቃማነ ጋላስ ጾሳ ስንꬃን ኤቂደ፥
ኑ እሻቱዋ ሞትያዌ፥
ሳሉዋፐ ዱገ ኦለቴዳ። ኢዮባ 1:9-11፤ ዛካ. 3:1
11 ኑ እሻቱ ዶርሳ ሱꬃንነ፥
ባረንቱ ቱሙ ማርካተꬃን
ዳዊያ ኦለቲደ ጾኔድኖ።
ቃይ ኡንቱንቱ ባረንቱ ሸምፑዋ አꬅ እምያዎ፥
ቃረትበይክኖ።
12 ሄዋ ድራዉ፥
ሳሉነ ሳሉዋ ግዶን ደእያዋንቱ፥
ናሸትተ።
ሽን ሳአዉነ አባዉ አዬሮ!
አያዉ ጎፐ፥
ጻላህያ ካፑ፥
ባረዉ ጉꬃ ዎዲ አቴዳዋ ኤርያ ድራዉ፥
ዎልቃማ ሀንቁዋን፥
ዱገ ህንተንቱኮ ዎꬌዳ”
ያጌዳ።
13 ቃይ ዳዊ ባረና ዱገ ሳኣ ኦሌዳዋ በኤዳዋፐ ጉይያን፥ ሄ አቱማ ናኣ የሌዳ ምሽራቶ የደርሱዋ ዶሜዳ። 14 ምሽራቶ ሾሻይ ቆሄና ማላ፥ ሄዙ ላይꬃነ ባጋ ማደነ ኡሻደ እዛ ናገትያሳ ባዙዋ ፓላደ ባና ማላ፥ ላኡ ዎልቃማ አርጋንꬃ ቀፊ እዝዉ እመቴዳ። ዳኔላ 7:25፤ 12:7
15 ሄዋፐ ጉይያን፥ ምሽራቶ ድኡ ድኢደ አፋና ማላ፥ ሾሻይ ሻፋ ሃꬃ ኬና ሃꬃ ባረ ዶናፐ ምሽራት ጌዱዋን ጉሴዳ። 16 ሽን ቢታይ ምሽራቶ ማዴዳ፤ ቢታይ ባረ ዶና ዶዪደ፥ ዳዊያ ዶናፐ ከሴዳ ሃꬃ ምት አጌዳ። 17 ዳዊ ምሽራትዉ ዳርስ ሀንቀቲደ፥ እዝ ዘረꬃ ጾሳ አዛዙዋ ናግያ ኡባቱዋነ የሱስ ቆንጭሴዳ ቱሙ አማነትያዋንታ ኦላናዉ፥ 18 ቢደ አባ ዶናን ደእያ ሻፍያን ኤቄዳ።