1 ሄዋፐ ጉይያን፥ ታን ኦራꬃ ሳሉዋነ ኦራꬃ ሳኣ በኣድ። ኮይሮ ሳሉነ ኮይሮ ሳአይ ꬋዬዳ። አባይካ ꬋዬዳ።ኢሳ. 65:17፤ 66:22፤ 2 ጰጽ. 3:13 2 ጌሻ ካታማታ ኦራꬃ የሩሳላመ፥ ባረ አስናዉ ማያደ ጊጌዳ ገልያ ዎዶሮ ናቲዳን፥ ጊጋ ኡቴዳዉና ሳሉዋፐ ጾሳ ማታፐ ዱገ ዎዉኖ ታን በኣድ። ኢሳ. 52:1፤ 61:10፤ ሳፃ 3:12

3 ዎልቃማ ኮሻይ አራታፐ ሀዋዳን ያጊደ፥ ሃሳይሽን፥ ታን ስሳድ፤ “ጾሳ ጎሊ አሳና ደኤ፤ ጾሳይ አሳና እትፐ ደአና። ኡንቱንቱ አ አሳ ግዳና፤ ጾሳይ ባረ ሁጰዉ ኡንቱንቱና ደአና። እ ኡንቱንቱ ጾሳ ግዳና። ህዝ. 37:27፤ ዎጋ 26:11፣ 12 4 ጾሳይ ኡንቱንቱ አይፍያ አፎꬃ ኡባ ቁጫና። ሀዋፐ ስንꬃናዉ ሀይቁነ ካዩ ዎይ ዋሱነ ሳኩ ባዋ። አያዉ ጎፐ፥ ኤጫባይ ꬋዬዳ” ያጌዳ። ኢሳ. 25:8፤ 35:10፤ 65:19

5 አራታን ኡቴዳዌ፥ “ታን ኡባባ ኦራጽሳይ” ያጌዳ። ቃይካ ጉጂደ ታና፥ “ታን ሃሳይያዌ አማነትያዋነ ቱማ ግድያ ድራዉ ጻፋ” ያጌዳ። 6 ቃይካ ታና ሀዋዳን ያጌዳ፤ “ፖለቴዳ። ታን አልፋነ ኦሜጋ፤ ዶመꬃነ ፖሉዋ። ሳመቴዳ ኦናነ ታን ደኡዋ ሃꬃ ፑልቱዋፐ ጮ ኡሻና። 7 ጾንያ ኡራይ ኦንነ ሀዋ ኡባ ላታና። ታን አዉ ጾሳ ግዳና፤ እካ ታ ናኣ ግዳና። 2 ሳሜላ 7:14፤ ማዝ. 89:26-27 8 ሽን ያይያዋንቱ፥ አማነናዋንቱ፥ ቱናቱ፥ ሸምፑዋ ዎꬍያዋንቱ፥ ዎሹምያዋንቱ፥ ብትያዋንቱ፥ ኤቃዉ ጎይንያዋንቱነ ዎርዶትያዋንቱ ኡባይ ደእያ ሳአይ ታማይነ ኤጽያ ዲኒ ኤጽያ አባ ግዳናዋ። ሄዌ ላኤንꬆ ሀይቁዋ” ያጌዳ።

9 ላፑ ዉርሰꬃ ቦሻቱ ኩሜዳ ላፑ ከረቱዋ ኦይቄዳ ላፑ ኪታንቻቱዋፐ እቱ ታኮ ዪደ ታና፥ “ሃያ። ታን ኔና ገለዉኖ ዶርሳ ማቻቶ በሳና” ያጌዳ። 10 ኪታንቻይ ታና ዳሮ ꬎቃ ደርያ ሁጲያ አያናን ከሲደ ጌሻ ካታማታ፥ የሩሳላማ ሳሉዋፐ ጾሳ ማታፐ ዱገ ዎዉኖ ታና በሴዳ። ህዝ. 40:2 11 ሄ ካታማታ ጾሳ ቦንቹዋን ፖአዉ። ሄ ካታማት ፖኡ ያስጲድያ ጌተትያ አልኦ ሹቻ ማላ፤ ብርሊያዳን ጶላዉ። 12 ሄ ካታማትዉ ታማነ ላኡ ፐንገቱነ ሄ ፐንገቱዋን ታማነ ላኡ ኪታንቻቱ ናግያ ዎልቃማ አዱሳ ድርሳይ ደኤ። ፐንገቱዋን ታማነ ላኡ እስራኤልያ ዛራቱዋ ሱንꬃይ ጻፈት ኡቴዳ። ህዝ. 48:30-35 13 አዋይ ዶልያ ባጋና ሄዙ ፐንገቱ ደኢኖ። ቃይ ህርክ ባጋና ሄዙ ፐንገቱነ ሁጲሳ ባጋና ሄዙ ፐንገቱ ደኢኖ። አዋይ ዉልያ ባጋናካ ሄዙ ፐንገቱ ደኢኖ። 14 ካታማት ድርሳይ ዶርሳይ ኪቴዳ ታማነ ላአቱዋ ሱንꬃይ ጻፈቴዳ ታማነ ላኡ ሹቻቱዋ ቦላ ግምበቴዳ።

15 ታናና ሃሳዬዳ ኪታንቻዉ ካታማቶ፥ እዝ ፐንገቱዋነ እዝ ድርሳ ልክያ ዎርቃ ጋትማይ ደኤ። ህዝ. 40:3 16 ካታማትዉ ኦይዱ ጋጻይ ደኤ፤ ካታማት ጌሳይነ ጎምፓይ እት ማላ። ኪታንቻይ ካታማቶ ባረ ጋትማን ልኬዳ። ካታማታ ላኡ ሻአነ ላኡ ጼቱ ኪሎ ሚትርያ ግዳዱ፤ ካታማት ጌሳይ፥ ጎምፓይነ ꬎቃተꬃይ እት ማላ። 17 ኪታንቻይ ቃይ ድርሳካ ልኬዳ። አሳ ኩሽያን እት ጼታነ ኦይታማነ ኦይዱ ዋꬋ ግዴዳ። ሄዌ ኦንነ ልክያ ኦግያን ኪታንቻይ ልክናዳ።

18 ካታማት ድርሳይ ያስጲድያ ጌተትያ ሹቻን ድረቴዳ። ካታማታ ብርሊያዳን ጶልያ ጌሻ ዎርቃን መታዱ።ኢሳ. 54:11-12 19 ካታማት ድርሳዉ ሂጸቴዳ ሹቻይ ቦንቼቴዳ ሹቻ ኡባን አሌቀቴዳ፤ ኮይሮ ሂጸቴዳ ሹቻይ ያስጲድያ፤ ላኤንꬁ ሳምፔርያ፤ ሄዘንꬁ ከልቀዶንያ፤ ኦይደንꬁ ባሉርያ፤ 20 እቼሸንꬁ ሳርዶንክሳ፤ ኡሱፑንꬁ ሳርድዮና፤ ላፑንꬁ ክርስትሎባ፤ ሆስፑንꬁ ብራል፤ ኡዱፑንꬁ ቶጳዝዮንያ፤ ታሙንꬁ ክርስጵራሲሳ፤ ታማነ እተንꬁ ያክንትያ፤ ታማነ ላኤንꬁ አመተስጽኖስያ።

21 ታማነ ላኡ ፐንገቱ ታማነ ላኡ እንቁዋ ጌተትያ አልኦ ሹቻ፤ እት እት ፐንጊ እት እንቁዋን ኦሰቴዳ። ካታማት ኦጊ ብርልያ ማላ ጌሻ ዎርቃ።

22 ጎዳይ፥ ኡባፐ ዎልቃማ ጾሳይነ ዶርሳይ ካታማት ጌሻ ጎልያ ግድያ ድራዉ፥ ታን ሄ ካታማትን ጌሻ ጎልያ በአበይከ። 23 ካታማትዉ ፖእያ አዋይ ዎይ አገናይ ኮሸና። አያዉ ጎፐ፥ ጾሳ ቦንቹ ሄ ካታማትን ፖኤ፤ ዶርሳይካ ሄ ካታማትዉ ጾምፕያ። ኢሳ. 60:19-20 24 አሳ ዘረꬃይ ካታማት ፖኡዋን ሀመታና። ሳኣ ካታቱካ ባረንቱ ቦንቹዋ ሄ ካታማትኮ አሀና። ኢሳ. 60:3 25 ካታማት ፐንገቱ ኡባ ጋላስካ ዶያ ደአና፤ ኡባካ ጎርደትክኖ። አያዉ ጎፐ፥ ሄዋን ቃማይ ባዋ። 26 አሳ ዘረꬃ ግታተꬃይነ ቦንቹ ሄ ካታማትኮ ሺቃና። 27 ሽን ቱናባይ ዎይ ካዉሻባ ኦꬅያዌ፥ ዎይ ዎርዶትያዌ ኦንነ ሄ ካታማቶ ገለና። ቃይ ዶርሳ ደኡዋ ማጻፋን ሱንꬃይ ጻፈቴዳዋንቱ ጻላላይ ሄ ካታማቶ ገላና። ኢሳ. 52:1፤ ህዝ. 44:9