1 ጪሞ ኦላ ቁልፕያነ ዎልቃማ ሳንꬃላታ ባረ ኩሽያን ኦይቄዳ እት ኪታንቻይ ሳሉዋፐ ይያዋ ታን በኣድ። 2 ኪታንቻይ ዳዊያ፥ ሄ በን ሾሻ፥ ጻላህያ ካፑዋ ዎይ ሴጻና ግያዋ ኦይቄዳ፤ ያቲደ ሻአ ላይꬃዉ ቃቼዳ። ዶመꬃ 3:1 3 ኪታንቻይ ጪሞ ኦላን አ የጊደ፥ ሻአ ላይꬃይ ዉራናዉ፥ አሳ ዘረꬃ ላኤንꬁዋ ባለተና ማላ፥ ሄ ጪሞ ኦላ ቁልፕ ጎርዲደ አታሜዳ። ሄዋፐ ጉይያን፥ ዳዊ አማሬዳ ዎድያ ብለታናዉ በሴ።

4 ሄዋፐ ጉይያን፥ ታን አራታቱዋነ ኡንቱንቱን ኡቴዳዋንታ በኣድ፤ ኡንቱንቶ ፕርድያ ማታይ እመቴዳ። የሱስ ቆንጭሴዳ ቱሙዋነ ጾሳ ቃላ አዋዬዳ ድራዉ፥ ባረንቱ ቆꬍያ ቃንጸቴዳ አሳ ሸምፑዋካ ታን በኣድ። ኡንቱንቱ ዶአዉ ዎይ ዶኣ ምስለዉ ጎይንበይክኖ። ኡንቱንቱ ዶኣ ማላ ባረንቱ ዴሙዋን ዎይ ባረንቱ ኩሽያን ዎꬅቤይክኖ። ኡንቱንቱ ሀይቁዋፐ ደንዲደ፥ ክርስቶሳና እትፐ ካተቱዋዳን ሻአ ላይꬃዉ ሞዴድኖ። ዳኔላ 7:9፣ 22 5 ሀይቄዳዋንቱፐ ጮራቱ ሻአ ላይꬃይ ዉራና ጋካናዉ፥ ሀይቁዋፐ ደንድበይክኖ። ሄዌ ኮይሮ ደንዱዋ። 6 ኮይሮ ደንዱዋን ደንዴዳዋንቱ አንጀቴዳዋንታነ ጾሳ አሳቱዋ። ኡንቱንቱ ቦላ ላኤንꬆ ሀይቆ ዎልቃይ ባዋ። ኡንቱንቱ ጾሳዉነ ክርስቶሳዉ ቄሳቱዋ ግዳና፤ ኡንቱንቱ አናና እትፐ ሻአ ላይꬃዉ ሞዳና።

7 ሻአ ላይꬃይ ዉሬዳዋፐ ጉይያን፥ ሴጻናይ ቃሹዋፐ ብለታና። 8 እ ሳኣን ኡባ ሳን ደእያ አሳ ዘረꬃ ባለꬃናዉ ከሳና፤ ሄዌ ጎጋነ ማጎጋ ጌተትያዋ። ሴጻናይ አባ ሻፍያ ኬና ዘረꬃ ኦላዉ ሺሻና። ህዝ. 7:2፤ 38:2፣ 9፣ 15 9 ሄ ዛራቱ ቢታ ኡባ ማዪደ ጌሻቱዋ ሄራነ ጾሳይ ሲቅያ ካታማቶ ዩይ አꬍ ኤቄድኖ። ሽን ታማይ ሳሉዋፐ ዎꬊደ፥ ኡንቱንታ ሜዳ።

10 ዶአይነ ዎርዶ ናቢ የገቴዳ ኤጽያ ዲንያ ታማ አባን ጻላህያ ካፑ፥ አሳ ዘረꬃ ባለꬄዳዌ፥ የገቴዳ። ኡንቱንቱ ቃማነ ጋላስ መꬍ መꬍናዉ ፓጻ ካኤታና።

11 ሄዋፐ ጉይያን፥ ታን ዎልቃማ ቦꬃ አራታነ ሄ አራታን ኡቴዳዋ በኣድ። ሳአይነ ሳሉ አ ስንꬃፐ ባቃቴድኖ፤ ላኤንꬆ ቤትበይክኖ። ዳኔላ 7:9-10 12 ሀይቄዳዋንቱ፥ ꬎቁ ግያዋንቱነ ጉꬃቱ አራታ ስንꬃን ኤቄዳዋንታ ታን በኣድ። ማጻፋቱ ዶየቴድኖ፤ ሀራ ማጻፋይ፥ ደኡዋ ማጻፋይካ ዶየቴዳ። ሀይቄዳዋንቱ ባረንቱ ኦሱዋዳን፥ ማጻፋቱዋን ጻፈት ኡቴዳዋዳንካ ፕርደቴድኖ። 13 አባይ ባረ ግዶን ደእያ ሀይቄዳዋንታ እሜዳ፤ ሀይቁነ ስኦሊ ባረንቱ ግዶን ደእያ ሀይቄዳዋንታ እሜድኖ። ኡባይካ ባረንቱ ኦሱዋዳን ፕርደቴድኖ። 14 ሄዋፐ ጉይያን፥ ሀዩነ ስኦሊ ታማ አባን የገቴድኖ። ሄ ታማ አባይ ላኤንꬆ ሀይቁዋ። 15 ደኡዋ ማጻፋን ባረ ሱንꬃይ ጻፈትቤና አሳይ ኦንነ ታማ አባን የገቴዳ።