1 ያትና፥ ኑን ዋጋኔ? ጾሳ አꬎ ኬካተꬃይ ዳራናዳን፥ ናጋራን ምኒደ ደአኔ? 2 ግደና፤ ኑን ናጋራ ኦና ማላ ሀይቂድጌዶ። ያትና፥ ኑን ሀዋፐ ስንꬃዉ ዎት አ ግዶን ደአኔ? 3 ዎይ ኑን ኡባቱ ክርስቶሳ የሱሳና እትፐ ግዳናዉ፥ ጻማቀቴዳ ዎደ፥ አ ሀይቁዋንካ አናና እትፐ ግዳናዉ ጻማቀቴዳዋ ኤርክቴ? 4 ሄዋ ድራዉ፥ ክርስቶስ ባረ አዉዋ ቦንቾ ዎልቃን ሀይቁዋፐ ደንዶዋዳን፥ ኑንካ ኦራꬃ ደኡዋ ደአናዉ፥ አ ሀይቁዋ አናና ሻካናዉ ጽንቃታን አናና እትፐ ሞገቴዶ።

5 አያዉ ጎፐ፥ ኑን እ ሀይቄዳዋዳን ሀይቂደ፥ አናና እቱዋ ግዶፐ፥ ሀዋዳንካ፥ ሀይቁዋፐ እ ደንዶዋዳን ኑንካ ደንዲደ፥ አናና እቱዋ ግዳና። 6 ኑን ሀዋፐ ስንꬃዉ ናጋራዉ አይለ ግደና ማላ፥ ቃይ ኑ ናጋራንቻ አሳተꬃ ዎልቃይ ꬋያና ማላ፥ ኑ ኤጫ አሳተꬃ ክርስቶሳና ማስቃልያ ቦላ ምስማርያን ꬍሸት ካቀቴዳዋ ኤሬቶ። 7 አያዉ ጎፐ፥ እት ኡራይ ሀይቂያ ዎደ ናጋራ ዎልቃይ አ ሞደና፤ ሽን 8 ኑን ክርስቶሳና ሀይቄዳዋ ግዶፐ፥ አናና ቃይ ደአናዋ አማኔቶ። 9 አያዉ ጎፐ፥ ክርስቶስ ሀይቁዋፐ ደንዴዳዋ፥ ቃይ ላኤንꬁዋ እ ሀይቀናዋነ ሀይቁ ስንꬃፐ አ ሞደናዋ ኑን ኤሬቶ። 10 እ እት ካላካ ሀይቄዳ፤ ናጋራዉ አ ቦላ ዎልቃይ ባዋ፤ ሽን እ ሀ ደእያ ደኡዋ ጾሳዉ ደኤ። 11 ሀዋዳን ቃይ ህንተ ናጋራ ኦናዳን፥ ህንተንታ ሀይቄዳዋዳን ቆፕተ፤ ሽን ጎዳ ክርስቶሳ የሱሳ ባጋና ጾሳዉ ህንተ ፓጻ ደእያዋዳን፥ ህንተንታ ቆፕተ።

12 ሄዋ ድራዉ፥ ህንተ ህንተንቱ አሳተꬃ አሞ አዛዘታና ማላ፥ ናጋራይ ሀይቂያ ህንተ አሳተꬃ ሞዶፖ። 13 ቃይ ህንተ አሳተꬃፐ እት ሳነ ኢታ ኦሱዋ ኦꬃናዉ ናጋራዉ እሞፕተ፤ ሽን ሀይቁዋፐ ደንዴዳ አሳዳን ህንተንታ ጾሳዉ እምተ፤ ቃይ ህንተ ኩመንꬃ አሳተꬃካ ጽሎ ኦሱዋ ኦꬃናዉ ጾሳዉ እምተ፤ 14 አያዉ ጎፐ፥ ናጋራይ ህንተንታ ሞዳናዉ ዳንዳየና፤ ህንተ ጾሳ አꬎ ኬካተꬃ ጋርሳና ደኢታፐ አትን፥ ህግያፐ ጋርሳና ደእክታ።

15 ያትና፥ ዋናኔ? ጾሳ አꬎ ኬካተꬃ ጋርሳና ደኢኖፐ አትን፥ ህግያፐ ጋርሳና ደኤና ድራዉ፥ ናጋራ ኦꬃኔ? ግደና፤ 16 ህንተ ህንተንታ እት ኡራዉ አዛዘታናዉ፥ አይልያዳን ኦꬂደ እምያ ዎደ፥ ሄ ህንተንታ አዛዝያዎ አይለቱዋ ግድያዋ ኤሪታ፤ ዎይ ህንተ ህንተንቶ ሀይቁዋ አህያ ናጋራዉ ኤኖ ጊታ፤ ዎይ ህንተ ህንተንታ ጽሎ ኦꬅያ አዛዞ ኤኖ ጊታ። 17 ሽን ጾሳዉ ጋላታይ ግዶ፤ አያዉ ጎፐ፥ ናጋራዉ ካሰ ህንተ አይለ፤ ሽን ጉየፐ ህንተ አኬዳ ትምርትያ ግዶን ደእያ ቱማተꬃዉ ህንተ ኩመንꬃ ዎዛናፐ አዛዘቴድታ። 18 ህንተንቱ ናጋራ አይለተꬃፐ ከሲደ፥ ጽሎተꬃዉ አይለ ግዴድታ።

19 ህንተንቱ መታን ዳቡራንቻ ግድያ ድራዉ፥ ታን ኦስካ ገልያ ሃሳያ ሃሳያይ፤ ህንተ ካሰ ህንተ ኩመንꬃ አሳተꬃ ናቁዋ ኦꬃናዉ፥ ቱናተꬃዉነ ናቆ አይለ ኦꬂደ እሜድታ፤ ሀእ ሄዋዳንካ ህንተ ኩመንꬃ አሳተꬃ ጌሻባ ኦꬃናዉ፥ ጽሎተꬃዉ አይለ ኦꬂደ እምተ።

20 ህንተንቱ ናጋራዉ አይለቲደ ደእያ ዎደ፥ ጽሎተꬃይ ህንተንቶ ጎዳ ግደና። 21 ህንተንታ ሀእ ዬላይያ የዋቱዋ ሄ ዎደ ኦꬄዳዋፐ አይ ማዱዋ ደሜድቴ? አያዉ ጎፐ፥ ሄ የዋቱዋ ዉርሰꬃይ ሀይቁዋ። 22 ሽን ናጋራ አይለተꬃፐ ህንተ ከሲደ፥ ጾሳዉ ኤኖ ጌድታ፤ ቃይ ህንተ ኦꬅያ ኡባባን ህንተንታ ኡባካ አዉ አꬂደ እሜድታ። ሄዌ ህንተንቶ ዎረ፤ ሄዋ ዉርሰꬃይ መꬍና ደኡዋ። 23 አያዉ ጎፐ፥ ናጋራ ጋቲ ሀይቁዋ። ሽን ጾሳይ ኑ ጎዳ ክርስቶሳ የሱሳ ባጋና እምያ እሞታይ መꬍና ደኡዋ።