1 ሄዋ ድራዉ፥ ኑን አማኑዋን ጽሌዳዋን፥ ኑ ጎዳ የሱስ ክርስቶሳ ባጋና ኑዉ ጾሳና ሳሮተꬃይ ደኤ፤ 2 ቃይ እ ኑና ሀእ ኑን ደእያ ጾሳ አꬎ ኬካተꬃ ግዶ አማኑዋን አሄዳ፤ ያትና፥ ኑን ጾሳ ቦንቹዋ ሻካናዉ ኑዉ ደእያ ህዶታን ጬቀቴቶ።

3-4 ሄዋ ጻላላ ግደና፤ ኑን ኑ ዋይያንካ ናሸቴቶ፤ አያዉ ጎፐ፥ ዋይያፐ ዳንዳያይ፥ ቃይ ዳንዳያፐ ፓጭያን ምንያዌ፥ ፓጭያን ምኖታፐ ህዶታይ ይያዋ ኑን ኤሬቶ። 5 ጾሳይ ኑዉ እሜዳ ጌሻ አያና ባጋና ባረ ሲቁዋ ኑ ዎዛናን ጉሴዳ ድራዉ፥ ሄ ኑን ደማናዉ ናሸቻን ናግ ኡቴዳዌ ኑና ዬላየና።

6 አያዉ ጎፐ፥ ኑን ብሮ ዎልቃይ ባይናዋንታ ግዲደ ደእሽን፥ ጾሳይ ዶሬዳ ዎዲ ጋክና፥ ክርስቶስ ናጋራንቻቱዋ ድራዉ ሀይቄዳ። 7 ጽሎ ኡራ ድራዉ፥ እት ኡራይ ሀይቃናዌ ዳሮ መቶባ፤ ሽን ሎኦ አሳ ድራዉ ሀይቃናዉ፥ “ኤኖ” ግያ ኡራይ ኦን ኤር ቤተናን አገና። 8 ሽን ኑን ብሮ ናጋራንቻ ግዲደ ደእሽን፥ ክርስቶስ ኑ ድራዉ ሀይቄዳ፤ ሄዌ ጾሳይ ኑና አይ ኬና ሲቅንቶነ አ ሲቁዋ ኤርሴ። 9 ስም ኑን ሀእ አ ሱꬃን ጽሌዳዋ ግዶፐ፥ አ ባጋና ጾሳ ሀንቁዋፐ አታና። 10 አያዉ ጎፐ፥ ኑን ጾሳና ካሰ ሞርከ፤ ሽን አ ናኣ ሀይቁዋን አናና ስገቴዶ። ሄዋፐ አꬂደ፥ ሀእ ኑን ጾሳና ስገቴዳዋፐ ጉይያን፥ እ ፓጻ ግድያ ድራዉ ኑና አሻና። 11 ሽን ሄዋ ጻላላ ግደና፤ ሀእ ኑና ጾሳና ስገꬄዳ ኑ ጎዳ የሱስ ክርስቶሳ ባጋና ኑና ጾሳባይ ናሸቼ።

12 ሄዋ ድራዉ፥ ናጋራይ ሀ ሳኣ እት አሳ ባጋና ገሌዳ፤ ሄ ናጋራይ ባረናና ሀይቁዋ አሄዳ፤ ሄዋ ጋሱዋን፥ አሳይ ኡባይ አዳማ ባጋና ናጋራ ኦꬄዳ ድራዉ፥ ሀይቁ አሳ ዛርያ ኡባ ጋኬዳ። ዶመꬃ 3:6 13 ህጊ እመታናፐ ካሰ፥ ሀ አላምያን ናጋራይ ደኤ፤ ሽን ህጊ ባይና ዎደ ናጋራይ ፓይደተና። 14 ሽን አዳማ ዎድያፐ፥ ሙሴ ዎድያ ጋካናዉ፥ ሀይቁ አሳ ኡባ ሞዴዳ፤ ሀራይ አቶ አዳም ጾሳ ህገዉ አዛዘተናን እጼዳዋዳን፥ ናጋራ ኦꬅቤናዋንታካ ሀይቁ ሞዴዳ።

አያዉ ጎፐ፥ አዳም ያናዎ ሌምሱዋ። 15 ሽን ጾሳ እሞታይ አዳማ ናጋራ ኬና ግደና ድራዉ፥ ኡንቱንቱ እት ማላ ግድክኖ፤ እት ብታንያ ናጋራ ድራዉ፥ ጮራ አሳይ ሀይቄዳዌ ቱማ፤ ሽን ጾሳ አꬎ ኬካተꬃይነ አ እሞታይ እት አሳ አꬎ ኬካተꬃ ባጋና፥ የሱስ ክርስቶሳ አꬎ ኬካተꬃ ባጋና ጮራ አሳዉ ዳሬዳ። 16 ጾሳ እሞታይ ናጋራ ኦꬄዳ ብታንያ ባጋና ዬዳዋ ማላ ግደና፤ አያዉ ጎፐ፥ አዳም እት ናጋራ ኦꬄዳዋፐ ጉይያን፥ ጾሳይ አ ባይዜዳዋዳን ፕርዴዳ፤ ሽን አሳይ ዳሮ ናጋራ ኦꬄዳዋፐ ጉይያን ጾሳይ፥ “ህንተንቱ ባይዝበይክታ” ጊደ፥ ባረ አꬎ ኬካተꬃ ኡንቱንታ በሴ። 17 አያዉ ጎፐ፥ እት ብታንያ ናጋራ ጋሱዋን፥ አ ናጋራ ባጋና፥ ሀይቁ ካዉቴዳዌ ቱማ፤ ሽን እት ኡራይ፥ የሱስ ክርስቶስ ኦꬄዳባይ አይ ኬና ዳሬ፤ ጾሳ ዳሮ አꬎ ኬካተꬃነ ጽሎተꬃ እሞታ አክያ ኡባይ ክርስቶሳ ባጋና ጾኒደ ደአና።

18 ስም እት ኡራይ ናጋራ ኦꬄዳ ጋሱዋን አሳ ኡባ ቦላ ባይዜዳዋዳን ፕርዳይ ዬዳ። ሄዋዳንካ እት ኡራይ ጽሎባ ኦꬄዳ ጋሱዋን፥ ጾሳይ አሳ ኡባ፥ “ባይዝበይክታ” ጊደ ኡንቱንቶ ደኡዋ እሜዳ። 19 አያዉ ጎፐ፥ እት ኡራይ አዛዘተናን እጼዳ ጋሱዋን፥ ዳሮ አሳይ ናጋራንቻ ግዴዳ፥ ሀዋዳንካ ቃይ እቱ ኤኖ ጌዳዋን ጮራ አሳይ ጽላና።

20 ናጋራ ዳርሳናዉ፥ ህጊ ዬዳ፤ ሽን ናጋራይ ዳርያ ዎደ ጾሳ አꬎ ኬካተꬃይ ሎይꬅ ዳሬዳ። 21 ናጋራይ ሀይቁዋ ዎልቃን ካዉቴዳዋዳን፥ ሀዋዳንካ ቃይ ጾሳ አꬎ ኬካተꬃይ ጽሎተꬃ ዎልቃን ካዉቲደ፥ ኑ ጎዳ የሱስ ክርስቶሳ ባጋና፥ ኑና መꬍና ደኦ ካለꬄ።