4
አብራሃሞ አማኑዋን ጽሌዳ
1 ያትና፥ ኑን ኑዉ አሹዋን ዛረ ግድያ አብራሃሞ አያ ደሜዳ ጋኔ? 2 አያዉ ጎፐ፥ አብራሃሞ ኦሱዋን ጽሌዳዋ ግዶፐ፥ አዉ ጬቀትያባይ ደኤ፤ ሽን ጾሳ ስንꬃን ጬቀታና ዳንዳየና። 3 አያዉ ጎፐ፥ ጾሳ ማጻፋይ ዋጊ? “አብራሃሞ ጾሳ አማኔዳ፤ ጾሳይ ሄዋ አዉ ጽሎተꬃን ፓይዴዳ” ያጌ። ዶመꬃ 15:6፤ ጋላ. 3:6
4 ኦꬅያ ኡራይ አክያ ሚሻ ባረዉ በስና አኬፐ አትን፥ አዉ ጮ እመትያዋዳን ፓይደተና። 5 ሽን ኦሱዋ ኦናን፥ ናጋራንቻ ጽልስያ ጾሳ አማንያ ኡራ፥ ጾሳይ አ አማኑዋን አ ጽልሴ። 6 ሀዋዳንካ፥ አይ ኦሱነ ባይናን፥ ጾሳይ ጽሉዋዳን ፓይዴዳ አሳ ናሸችያባ ዳዊተ ሃሳዬዳ ዎደ ጌዳዌ ሀዋ።
7 “ጾሳይ ኡንቱንቱ ባይዙዋ
አቶ ጌዳዋንቱነ
ኡንቱንቱ ናጋራ ካሜዳዋንቱ
አንጀቴዳዋንታ።ማዝ. 32:1-2
8 ጎዳይ አ ናጋራ ፓይደና አሳይ
አንጀቴዳዋ”
ያጌ።
9 ያትና፥ ሀ ዳዊተ ሃሳዬዳ አንጁ ቃጻረቴዳ አሳ ጻላላሴየ? ዎይ ቃይ ቃጻረትቤና አሳቱዋሴ? አያዉ ጎፐ ኑን፥ “ጾሳ ማጻፋይ፥ ‘አብራሃሞ ጾሳ አማኔዳ፤ ጾሳይ ሄዋ አዉ ጽሎተꬃን ፓይዴዳ’ ያጌ” ጎይተ። 10 ያትና፥ ሀዌ አዉደ ሀኔዴ? አብራሃሞ ቃጻረት ስምነየ? ዎይ ቃጻረታናፐ ካሰኔ? ቃጻረታናፐ ካሰናፐ አትን፥ ቃጻረትና ግደና።
11 ጉየፐ እ ቃጻረቴዳ፤ ጾሳይ አ አማኑዋ ድራዉ፥ እ ቃጻረታናፐ ካሰ አ ጽሎ ኦꬄዳዋ ኤርሳናዉ፥ አ ቃጻራይ ማላ ግዴዳ። ሄዌካ ቃይ ቃጻረተናን ጾሳ አማንያ ኡባቱዋ ጾሳይ ጽሎ ኦꬂደ ፓይዳናዳን፥ ኡንቱንቶ አብራሃሞ አዉዋ ግዳናሳ። ዶመꬃ 17:10 12 እ ቃጻረቴዳዋንቶካ አዉዋ፤ ግዶፐካ፥ ኡንቱንቱ ቃጻረቴዳ ድራሳ ግደና፤ ሽን ኑ አዉዋ አብራሃሞ ቃጻረታናፐ ካሰ አማንያ አማኑዋ ማላ ካልያዋንቶካ አዉዋ።
ጾሳይ እማና ጌዳባይ አማኑዋን አከቴ
13 አብራሃሞስነ አ ዘረꬃዉ ጾሳይ፥ “ሀ ሳኣ ታን ህንተንቶ እማና” ያጌዳዌ፥ አብራሃሞ ጾሳ አማኒደ ጽሌዳ ድራሳፐ አትን፥ ህገዉ እ አዛዘቴዳ ድራሳ ግደና። ዶመꬃ 17:4-6፤ 22:17-18፤ ጋላ. 3:29 14 አያዉ ጎፐ፥ ህገዉ አዛዘትያዋንቱ ጾሳይ እማና ጌዳዋ ላትያዋንታ ግዶፐ፥ አሳ አማኑ ማደናባ ግዴዳ፤ ጾሳይ ጌዳዌካ መላ ግዴዳ፤ 15 ህጊ ጾሳ ቦሻ አሄ፤ ሽን ህጊ ባይናሳን ህግያ መንꬅያባይ ባዋ።
16-17 ሄዋ ድራዉ፥ ህግያ ናግያዋንቱ ጻላላዉ ግደናን፥ ቃይ አብራሃሞ አማኔዳዋዳን፥ አማንያ አብራሃመ ዘረꬃ ኡባዉ ጾሳይ እማና ጌዳዌ፥ ዎይታዳን ቱማታናዌ አማኑዋና። አብራሃሞ ኑዉ ኡባዉ አዉዋ። ጾሳ ማጻፋይ፥ “ታን ኔና ጮራ ካዉተꬃቶ አዎ ኦꬃድ” ግያዋዳን፥ ሀይቄዳዋንቶ ደኡዋ እምያ፥ ባረ አዛዙዋን ባይናባ ደእያባዳን ኦꬂደ ጼስያ፥ እ አማኔዳ ጾሳ ስንꬃን አብራሃሞ ኑዉ ኡባዉ አዉዋ። ዶመꬃ 17:5
18 ጾሳ ማጻፋይ አብራሃሞ፥ “ነ ዘረꬃይ ሀዋ ኬና ግዳና” ያጌዳዋዳን፥ ሀዋ ኬና ግዳና ጊደ፥ ናሸቻን ናጋናዉ ዳንዳየና ዎደ፥ አብራሃሞ አማኒደነ ስንꬃፐ ደማና ጊደ፥ ናሸቻን ናጊደ፥ ጮራ ዘረꬃዉ አዉዋ ግዴዳ። ዶመꬃ 15:5 19 ሄ ዎደ፥ አብራሃሞ የለቶደፐ ጼቱ ላይꬃ ኩማና ሀንያ ጭማ፤ ሽን ባረ ዳቡራንቻ አሳተꬃነ ሳራ ናኣ የላናዉ ዳንዳየናዋ ቆፔዳ ዎደ፥ እ ባረ አማኑዋን ዳቡርቤና። ዶመꬃ 17:17
20-21 ጾሳ እ ቦንቺደ፥ አዉ እማና ጌዳ ጾሳይ ቃይ ፖላናዉ ዳንዳይያዋ ሎይꬅ ኤሪደ ባረ አማኑዋን ምኔዳዋፐ አትን፥ አማነናን እጺደ፥ ጾሳይ እማና ጌዳዋ ስꬍቤና። 22 ሄዋ ድራዉ፥ ጾሳይ ቃይ አ አማኑዋ ጽሎተꬃን ፓይዴዳ።
23 “አዉ ጽሎተꬃን ፓይዴዳ” ግያ ቃላይ አ ጻላላዉ ጻፈትቤና። 24 ሄ ቃላይ ኑ ጎዳ የሱሳ ሀይቁዋፐ ደንꬄዳ ጾሳ አማንያ ኑዉካ ጽሎተꬃን ፓይደታና ማላ ጻፈቴዳ። 25 ጾሳይ አ ኑ ናጋራ ድራዉ፥ ሀይቆ አꬂደ እምና፥ እ ኑና ጽልሳናዉ ሀይቁዋፐ ደንዴዳ። ኢሳ. 53:4-5