3
አይሁዳቱ አማነናን አጉሳን ባይዜድኖ
1 ያትና፥ አይሁዳ አሳቱ አያን አይሁዳ ግደና አሳፐ አꬊኖ? ዎይ ቃጻረትያዋን አይ ማዱ ደኢ? 2 ሀዌ አይሁዳቱዋ ኡባባን ሎይꬅ ማዴ፤ ኡባባፐ ካሰ ጾሳይ ባረ ኪታ ሀዳራ አይሁዳቶ እሜዳ።
3 ያትና ኡንቱንቱፐ እቱ እቱ አማነተናዋ ግዶፐ፥ ዋኒ? ሄዋ ድራዉ፥ ጾሳይ አማነተና ያግያዌ? 4 ሄዋ ግደና፤ አሳይ ኡባይ ዎርዳንቻ ግዶፐካ፥ ጾሳይ ግያዌ ቱማ ግዳናዉ በሴ። ጾሳ ማጻፋይ፥ “ኔን ሃሳይያ ዎደ፥ ኔን ጽሎ ግድያዋ ኤርሳናዉ ኮሼ፤ ኔን ሞተትያ ዎደ፥ ሻትማናዉ በሴ” ያጌ። ማዝ. 51:4
5 ሽን ኑ ባይዙ ጾሳ ጽሎ ኦሱዋ ኤርስንቶ፥ ኑን ዋጋኔ? ኑ ቦላ ሀንቁዋ አህያ ጾሳይ ባይዛንቼ? ታን አሳይ ግያዋዳን ጋይ። 6 ሄዌ ዋዪ ሀናና። አያዉ ጎፐ፥ ሄዋዳን ግዶፐ፥ ጾሳይ ሀ አላምያ ቦላ ዎት ፕርዳኔ?
7 ሽን ታ ዎርዱዋን ጾሳ ቱማተꬃይ አ ቦንቾ ዳሮፐ፥ ያትና፥ ሀዋ ጋካናዉ አያዉ ታ ቦላ ናጋራንቻዳን ፕርዲ? 8 ያትና ኑን፥ “ሎኡ ያናዳን፥ አነ ኢታባ ኦꬆይተ” አያዉ ጎኮ? እት እት አሳይ ሀዋ ታና ሞቲደ ቦሬድኖ፤ ኡንቱንቱ ጾሳፐ በስያ ፕርዳ አካና።
አሳይ ኡባይ ናጋራንቻ
9 ሄዋ ድራዉ፥ ኑን ዋጋኔ? ኑን አይሁዳቱ፥ አይሁዳ ግደና አሳፐ ዳሬቶ? ሄዋ ግደና፤ አያዉ ጎፐ፥ አይሁዳቱካ አይሁዳ ግደና አሳቱካ ኡባይ እትፐ ናጋራፐ ጋርሳን ደእያዋ ታን ካሰ ህንተንቶ ኦዳድ።
10 ጾሳ ማጻፋይ ሀዋዳን ያጌ፤ ማዝ. 14:1-3
“ጽሎ አሳይ እቱነ ባዋ።
11 አኬክያ አሳይካ ባዋ፤
ዎይ ጾሳ ኮይያዌካ ባዋ።
12 አሳይ ኡባይ ኦግያፐ ካረ ከሴድኖ፤
ኡባይ ሙለካ ማደናዋ ግዴዳ።
ሎኦባ ኦꬅያ ኦንነ ባዋ፤
ሀራይ አቶ እቱነ ባዋ።
13 ኡንቱንቱ ዶናይ ዶያ ደእያ ዱፉዋ ማላ።
ባረንቱ እንጻርሳን ዎርዶቴድኖ።
ኡንቱንቱ ዶናፐ አሳ ዎꬍያ ሾሻ
ይሻ ማላ ሃሳያይ ከሴ። ማዝ. 5:9
14 ኡንቱንቱ ዶናን ሸቃይነ ጫሞባይ ኩሜዳ። ማዝ. 10:7
15 ኡንቱንቱ ሱꬃ ጉሳናዉ፥
ዳሪ ኤሌሊኖ። ኢሳ. 59:7-8
16 ባይዙነ ኮለꬃይ፥
ኡንቱንቱ ቤዳሳን ሀቃንነ ꬋየና።
17 ኡንቱንቱ ሳሮተꬃ ኦግያካ ኤርክኖ።
18 ቃይ ጾሳዉ ያይያባይ፥
ኡንቱንቱ ቆፋን ባዋ”
ያጌ።ማዝ. 36:1
19 አሳ ኡባ ሃሳያ ድጋና ማላነ ኩመንꬃ ሳኣ ጾሳ ፕርዳፐ ጋርሳዉ አꬃና ማላ፥ ህግያ ግዶን ኦደቴዳ ኡባባይ ህግያፐ ጋርሳን ደእያ አሳዉ ሃሳይያዋ ኑን ኤሬቶ። 20 ጾሳ ስንꬃን ኦንነ ህጊ አዛዝያዋ ኦꬅያዋን ጽለና፤ ህጊ እት አሳይ ናጋራ ኦꬄዳዋ ኤራናዳን ኦꬄ።ማዝ. 143:2፤ ጋላ. 2:16
አሳይ ጽልያዌ አማኑዋና
21 ሽን ጾሳይ አሳ ጽልስያ ኦጊ ህጊ ባይናን ሀእ ቆንጬዳ፤ ህጊነ ናባቱ ሄ ጽሎተꬃባ ማርካቴድኖ። 22 ጾሳይ አሳ የሱስ ክርስቶሳ አማንያዋን ጽልሴ፤ ጾሳይ ሄዋ አ አማንያ ኡባዉ ኦꬄ፤ አይ ሻኮተꬃይነ ባዋ።
23 አያዉ ጎፐ፥ አሳይ ኡባይ ናጋራ ኦꬄዳ፤ ጾሳ ቦንቹካ ኡንቱንቶ ጉጼዳ። 24 ሽን ኡንቱንቱ ጾሳይ እምያ አ አꬎ ኬካተꬃን፥ ባረንታ ዎዝያ ክርስቶስ የሱሳ ባጋና ጮ ጽሌድኖ። 25 የሱሳ ሱꬃን አሳይ አ አማኒደ፥ ባረ ናጋራዉ ማሮተꬃ ደማናዉ፥ ጾሳይ አ እሜዳ፤ ጾሳይ ሄዋ ባረ ጽሎተꬃ በሳናዉ ኦꬄዳ፤ እ በን ዎድያን አሳ ናጋራ ዳንዳዪደ፥ ካꬍ ባሽ አጌዳ፤ ሽን 26 ሀ ዎድያን ባረ ጽሎተꬃ በሳናዉ አሳ ናጋራ አገና፤ ጾሳይ ሄዋ ኦꬅያዋን እ ባረ ሁጰዉ ጽሎ ግድያዋነ የሱሳ አማንያ ኡባ ጽልስያዋ በሴ።
27 ያትና፥ ኑን አያዉ ጬቀታኔ? አይነ ባዋ። አያ ጋሱዋኔ? ኑን ህገዉ ኤኖ ግያዋኔ? ግደና፤ አማኑዋ ህግያናፐ አትን። 28 አያዉ ጎፐ፥ አሳይ አማኑዋን ጽላናፐ አትን፥ ህጊ አዛዝያዋ ኦꬅያዋና ግደና ያጊደ ቆፔቶ።
29 ዎይ ጾሳይ አይሁዳቱዋ ጻላላዉ ጾሴ? አይሁዳ ግደና አሳዉ ጾሳ ግደኔ? ቱማ፥ አይሁዳ ግደናዋንቶካ እ ቃይ ጾሳ። 30 እት ጾሳ ጻላላይ ደኤ፤ አይሁዳቱዋ ኡንቱንቱ አማኑዋን እ ጽልሳና፤ ቃይ አይሁዳ ግደናዋንታካ ኡንቱንቱ አማኑዋን ጽልሳና። ዛረ. 6:4፤ ጋላ. 3:20 31 ያትና፥ ኑን ህግያ አማኑዋን ጋጻ ሱጋኔ? ግደና፤ ህግያ ምንሶይተፐ አትን።