1 ሄዋ ድራዉ፥ ኔኖ ሀራንቱ ቦላ ፕርድያዎ፥ ነዉ ጋሶይያባይ ባዋ፤ አያዉ ጎፐ፥ ኔን ሀራንቱ ቦላ ፕርዳደ፥ ሄ ኔን ኡንቱንቱ ቦላ ፕርድያዋ ማላ ኦꬆፐ፥ ነ ቦላ ፕርዳሳ። 2 ኑን ሀዋ ማላ ኦሱዋ ኦꬅያዋንቱ ቦላ ጾሳይ ጽሎ ፕርዳ ፕርድያዋ ኤሬቶ። 3 ኔኖ፥ ሀዋ ማላ ኦሱዋ ኦꬅያዋንቱ ቦላ ፕርድያዎ፥ ቃይ ሄ ኔን ፕርድያዋ ማላ ኦꬅያዎ፥ ኔን ጾሳ ፕርዳፐ አትያዋ ማላቲ? 4 ዎይ ጾሳ ዎልቃማ ኬካተꬃ፥ ገንጩዋነ ዳንዳያ ካꬋይሻ? ጾሳይ ኔና ናጋራፐ ዛራናዉ ኮይያ ድራዉ፥ እ ኬካ ግድያዋ ኔን ኤራሳ።

5 ሽን ህንተንቶ ጉዙማ ዎዛናይነ ናጋራፐ ስመና ዎዛናይ ደኤ፤ ሄዋ ድራዉ፥ ጾሳ ሀንቁነ ጽሎ ፕርዳይ ቆንጭያ ጋላስ፥ ኔን ነ ቦላ ሀንቁዋ ካሰዋፐ ዳርሳሳ። 6 ጾሳይ አሳ ኡባዉ አ ኦሱዋ ማላ እማናዋ። ማዝ. 62:12፤ ሌም. 24:12 7 እት እት አሳቱ ሎኦባ ዳንዳያን ኦꬂኖ፤ ቃይ ጋላታ፥ ቦንቹዋነ ባየና ደኡዋ ኮዪኖ፤ ኡንቱንቶ ጾሳይ መꬍና ደኡዋ እማና። 8 ሽን ሀራንቱ ኢታባ ኦꬃናዉ ያረቲኖነ ቱማተꬃ እጺኖ፤ ጾሳይ ኡንቱንቱ ቦላ ባሻነ ሀንቁዋ የዳና። 9 ኢታባ ኦꬅያ አሳይ ኡባይ መቶታናነ ዋየታና፤ ሄዌ ካሰቲደ፥ አይሁዳ አሳ ጋካና፤ ሄዋፐ ቃይ አይሁዳ ግደና አሳ ጋካና። 10 ሽን ጾሳይ ሎኦ ኦሱዋ ኦꬅያ ኡባቶ ጋላታ፥ ቦንቹዋነ ሳሮተꬃ እማና። ካሰቲደ አይሁዳቶ እማና፤ ሄዋፐ ቃይ አይሁዳ ግደናዋንቶ እማና። 11 አያዉ ጎፐ፥ ጾሳ አይፍያን አሳይ ኡባይ እት ማላ። ዛረ. 10:17

12 ሙሴ ህጊ ባይናን ናጋራ ኦꬄዳ ኡባይ ህጊ ባይናን ꬋያና። ሙሴ ህጊ ደእሽን፥ ናጋራ ኦꬄዳ ኡባይ ህግያን ፕርደታና። 13 አያዉ ጎፐ፥ ጾሳ ስንꬃን ህግያ ናግያዋንቱ ጽሊኖፐ አትን፥ ህግያ ስስያዋንቱ ጽልክኖ። 14 አይሁዳ ግደና አሳዉ ህጊ ባዋ፤ ሽን ባረንቱ ትላ ቆፋን ህጊ አዛዝያዋ ኦꬂኖ፤ ኡንቱንቶ ህጊ ꬋዮፐካ፥ ኡንቱንቱ ባረንቱ ሁጰዉ ህገ። 15 ህጊ አዛዝያዌ ኡንቱንቱ ዎዛና ግዶን ጻፈቴዳዋ ኡንቱንቱ ሀኖታይ በሴ፤ እት እት ካላ ኡንቱንቱ ትላ ቆፋይ ኡንቱንቶ ማርካትያ ድራዉነ ቃይ እት እት ካላ ኡንቱንቱ ቆፋይ ኡንቱንታ ሞትያ ድራዉ፥ ዎይ ቃይ ኡንቱንቱና ጋዳትያ ድራዉ፥ ሄዌ ቱማ ግድያዋ ኤርሴ። 16 ታን ታማርሴዳ ምሽራቹዋ ቃላዳን፥ አሳ ዎዛናን ጌሜዳ ቆፋ ጾሳይ የሱስ ክርስቶሳ ባጋና ሀዋዳን ፕርዳና።

17 ሽን ኔን ኔና አይሁዳ ጋሳ፤ ህግያን ዘምፓደ ጾሳን ጬቀታሳ። 18 ኔን ኦꬃና ማላ፥ ጾሳይ ኮይያዌ አየንቶ ኤራ፤ ቃይ ቱማ ግድያዋ ዶራናዉ ህግያፐ ታማራዳ። 19-20 ኔን ቆቃቱዋ ካለꬅያዋ፥ ቃይ ꬉማን ደእያዋንቶካ ፖእስያዋ፥ ኤረናዋንታ ኤርስያዋነ ናናቱዋ ታማርስያዋ ግድያዋ ኤራድ፤ ህግያፐ ኔን ኩመንꬃ ኤራተꬃነ ቱማተꬃ ደምያዋ ኤራሳ። 21 ያትና፥ ኔን ሀራቱዋ ታማርስያዌ ኔና ነ ሁጰዉ አያዉ ታማርስኪ? ኔን፥ “ዉኦፓ” ያጋደ ቃላ ኦዳሳ። ሽን ኔን ነ ሁጰዉ ዉአይየ? 22 ኔን፥ “ዎሹሞፓ” ያጋ። ሽን ኔን ነ ሁጰዉ ዎሹማይ? ኔን ኤቃ ሸነታ። ሽን ኤቃይ ደእያ ጎልያ ቦንቃይ? 23 ጾሳ ህጊ ነዉ ደእያ ድራዉ፥ ኔን ጬቀታሳ፤ ሽን ሄ ህግያ መንꬃደ ጾሳ ዬላያይ? 24 አያዉ ጎፐ፥ ጾሳ ማጻፋይ፥ “አይሁዳ አሳቶ፥ ህንተ ጋሱዋን አይሁዳ ግደና አሳቱዋ ግዶን ጾሳ ሱንꬃይ ባዬ” ያጌ። ኢሳ. 52:5

25 ኔን ህገዉ አዛዘቶፐ፥ ነ ቃጻራይ ማዱዋና ደኤ፤ ሽን ኔን ህግያ መንꬆፐ፥ ኔን ቃጻረቴዳዌ ቃጻረትቤናዋዳን ፓይደቴ። 26 አይሁዳ ግደና አሳይ ቃጻረተናን ህጊ አዛዝያዋ ናጎፐ፥ ጾሳይ አ ቃጻረቴዳዋዳን ፓይደኔ? 27 ህንተንቱ፥ አይሁዳ አሳቱ፥ ህንተንቶ ጻፈቴዳ ህጊ ደኦፐካ ቃይ ህንተ ቃጻረቶፐካ፥ ህግያ ህንተ መንꬅያ ድራዉ፥ አይሁዳ ግደና አሳይ ቦላ ቃጻረታና ꬋዮፐካ፥ ህገዉ አዛዘቲደ፥ ህንተ ቦላ ፕርዳና።

28 አያዉ ጎፐ፥ አይሁዳ አሳ ማላትያ ኡባይ ቱሙ አይሁዳ አሳ ግደና፤ ቃይ አሳይ ባረ አሹዋ አሳተꬃ ቃጻረቴዳ ድራዉ፥ ቱሙ አይሁዳ አሳ ግደና። 29 ሽን ቱሙ አይሁዳ አሳ ግያ ኡራይ ጋርሳ ባጋና አይሁዳ አሳ *አይሁዳ ጉሳይ ጋላተትያዋ ግዲደ ሱንꬃይ ይሁዳፐ ዬዳ። ግዴዳዋ፤ ቃጻረትያዋ ጾሳ አያናን ኦሰትያ ዎዛና ቃጻራፐ አትን፥ ጻፈቴዳ ህግያና ግደና፤ ሄ ኡራይ ባረ ጋላታ ጾሳፐ አክያዋፐ አትን፥ አሳፐ አክቤና። ዛረ. 30:6