የሱስ ኪቴዳ ጳዉሎስ ሮመ አሳዉ ጻፌዳ ኪታይ፥ ጳዉሎስ ሮመን ደእያ ዎሳ ጎልያ ጾሞሳናዉ ቆፔዳ ድራዉ፥ እ ባናዉ ኡንቱንቱ ጊጊደ ናጋናዳን ኦꬃናሳ። ጳዉሎሳ ቆፋይ ሮመን ደእያ አማንያዋንቱና ጉꬃ ዎድያ ኦꬄዳዋፐ ጉይያን፥ ኡንቱንቱ ማድና እስፔነ ባናሳ። ክርስትና አማኑዋባ ባረ ኤሬዳዋነ ሄዋ ቃይ አማንያ አሳይ ኦሱዋን ፔሻና ሀኖታ ቆንጭሲደ ጻፌዳ። ጳዉሎሳ ቆፋይ ኩመንꬃ ሀኖታን ቤትያዌ ሀ ኪታና።

ጳዉሎስ ሮመን ደእያ አማንያዋንቶ ሳሮታ አꬆዋፐነ ኡንቱንቶ ዎሳናዋካ ህዶታ እሞዋፐ ጉይያን፥ ኪታዉ ግዶ ቆፋይ “ምሽራቹዋ ቃላይ ጾሳይ አሳ ጽልስያዌ፥ ኮይሩዋፐ ዉርሰꬃ ጋካናዉ አማኑዋና ግድያዋ ኦዴ” (1:17)

ሄዋፐ ጉይያን ጳዉሎስ ሀ ቆፋ አሲደ ጻፌ። አይሁዳቱዋ ግድናካ አይሁዳ ግደና አሳ ግድናካ ኡባይ ናጋራዉ ሞደትያዋንታ ግድያ ድራዉ፥ ኡንቱንቱ ጾሳና ስገታናዉ ኮሼ። አሳይ ጾሳና ስገታናዉ ዳንዳይያዌ የሱስ ክርስቶሳን አማንያዋና። ጾሳና መꬍያ ኦራꬃ እትፐተꬃ አይፊ ኦራꬃ ደኡዋ ግድያዋ ጳዉሎስ አሲደ ኦዴዳ። አማንያ አሳይ ጾሳና ሳሮ ደኤ። ቃይ ጾሳ አያና ባጋና ናጋራነ ሀይቁዋ ዎልቃፐ ብለቴ። ጳዉሎስ ጾሳ ቆፋይነ አማንያ አሳ ደኡዋ ግዶን ኦꬅያ ጾሳ አያና ዎልቃ ቆፋይ አየንቶ ኦዴ (5-8)። ሄዋፐ ካሊደ ቃይ ጳዉሎስ፥ “ጾሳይ አሳ ናናዉ ቆፔዳ ቆፋ ግዶን አይሁዳቱነ አይሁዳ ግደና አሳቱ ዋኒደ እትፐ ዋጸታናዉ ዳንዳያናዋንቴሻ?” ያግያ ኦሻ ዛራናዉ ባጸቲደ ደኤ።

ቃይካ ጳዉሎስ፥ አይሁዳቱ የሱሳ አከናን አጌዳዌ ጾሳ ቆፋ ግድያዋ ኦዴ። አያዉ ጎፐ፥ ሀዋ ማላ ሀኖታን አሳ ዘረꬃይ ኡባይ ጾሳይ የሱሳ ባጋና ቆንጭሴዳ አꬎ ኬካተꬃን እትፐተꬃ ኦꬃናሳ። ግዶ ሽን፥ አይሁዳቱ የሱሳ አካናዉ ዎዲ ያናዋ ጳዉሎስ አማኔ። ዉርሰꬃን ጳዉሎስ ክርስትና ደኡዋ ዋኒደ ደአናዉ በስንቶ ኦዴ። ጾሳዉ ኦꬃናባ፥ አማንያ አሳቱ ባረንቱ ጋድያስነ ባረንቱ ግዶን እቱ እቶ ሲቁዋንነ ማታን ኦꬃናባነ ቆፋ ጋሱዋን ደንድያ ኦሻቱዋባ ቆንጭሲደ ኦዴ።