1 ክንክርያ ጌተትያ ካታማን ደእያ አማንያ አሳና ኦꬅያ ኑ ምቻታ ፔባ ሎኦ ማጫ አሳ ግድያዋ ታን ህንተንታ ኤርሳይ። 2 ህንተንቱ እዞ ጌሻቱ ጎዳ ሱንꬃን ሞክያዋዳን ሞክተ፤ ቃይ እዛ ህንተንቱፐ ኮይያዌ አያ ግዶፐካ፥ እዞ ማድተ፤ አያዉ ጎፐ፥ እዛ ባረ ሁጰዉ ጮራ አሳ ማዳዉ፤ ቃይ ታና ታ ሁጰዉካ ዳርሳ ማዳዉ።

3 ክርስቶሳ የሱሳ ኦሱዋ ታናና እትፐ ኦꬅያ ጵርስቂልዉነ እዝ አስና አቂላስ ታ ሳሮቶዋ ኦድተ። 4 ኡንቱንቱ ታ ሸምፑዋ ድራዉ፥ ባረንቱ ሸምፑዋ አꬅ እሜድኖ። ኡንቱንታ ታ ጻላላ ግደናን፥ አይሁዳ ግደና አሳ አማንያ አሳይ ኡባይካ ጋላቴ። 5 ቃይ ኡንቱንቱ ጎልያ አማንያ አሳይ ሺቅያሳ ኦꬂደ ጋከትያ አሳ ኡባ ሳሮ ጊተ። ኢስያ ጋድያን ክርስቶሳ ኮይሮ አማኔዳ ታ ሲቅያ ኤፓነቶሳዉ፥ ታ ሳሮቶዋ ኦድተ። 6 ህንተንቶ ሎይꬃ ዳቡሬዳ ማይራሞ ሳሮትተ። 7 ታናና ቃሾ ጎለን ደኤዳ ታ ዳቦ ግዴዳ አይሁዳቱዋ፥ አንድሮንቆሳነ ዩንያሳ ሳሮትተ። የሱስ ኪቴዳዋንቱ ግዶን ኡንቱንቱ ሎይꬅ ኤረቴዳዋንታ። ቃይ ኡንቱንቱ ክርስቶሳ ታፐ ካሰና አማኔድኖ።

8 ጎዳና እትፐተꬃን ደእያ ታ ሲቆ ላግያ አምፕልያቶሳዉ ታ ሳሮቶዋ ኦድተ። 9 ክርስቶሳ ኦሱዋ ኑናና እትፐ ኦꬅያ ኡርባኖሳነ ታን ሲቅያ እስጻኩሳ ሳሮትተ። 10 ክርስቶሳና እ ደእያዌ ኤረትና ፓጭያ ጾኔዳ አጰሊሳዉ ታ ሳሮቶዋ ኦድተ፤ አርስጾብሎሳ ሶይ አሳዉካ ታ ሳሮቶዋ ኦድተ። 11 ታ ዳቦ ግዴዳ አይሁዳዊያ ሄሮድዮናነ ክርስቶሳ አማንያ ናርሲሰሳ ሶይ አሳ ሳሮትተ።

12 ጎዳ ኦሱዋን ዳቡርያ ትሩፋይናነ ትሩፎሶ ጌተትያ ማጫዋንታ ሳሮትተ፤ ቃይ ጎዳዉ ዳሮ ዳቡራደ ኦꬅያ ሲቅያ ፐርሲሶ ሳሮትተ። 13 ጎዳ ኦሱዋን ሎይꬅ ኤረቴዳ ሩፎሳየዉነ ታና ባረ ናኣዳን ማዴዳ አ ዳይዉ ታ ሳሮቶዋ ኦድተ። 14 ታ ሳሮቶዋ አስንክሪቶሳዉ፥ ፕሌጎናዉ፥ ሄርሜሳዉ፥ ፓትሮባሳዉነ ኡንቱንቱና ደእያ አማንያ እሻቱዋ ኡባዉ ኦድተ። 15 ፕሌጎና፥ ዩሎ፥ ኔርያ፥ አ ምቻቶ፥ ኦሉምፖሳነ ኡንቱንቱና ደእያ ጾሳ አሳቱዋ ኡባ ሳሮትተ።

16 ጌሻ አሳዉ በስያ የረታ የረቲደ፥ እቱ እቱዋ ሳሮትተ፤ ክርስቶሳን አማንያዋንቱ ኡባቱ ህንተንታ ሳሮ ያጌድኖ።

17 ታናዳን አማንያዋንቶ፥ አሳ ግዶን ሻኮተꬃ መꬍያዋንታ፥ አሳ አማኖ ꬉቦ ግድያዋንታነ ህንተ ታማሬዳ ትምርትያና ጋከተናዋ ታማርስያዋንታ አኬካናዳን፥ ታን ህንተንታ ዎሳይ። ኡንቱንቱኮ ሺቆፕተ። 18 አያዉ ጎፐ፥ ሄዋ ማላባ ኦꬅያዋንቱ ባረንቱ ኡሎ ኦꬂኖፐ አትን፥ ኑ ጎዳ የሱስ ክርስቶሳዉ ኦꬅክኖ፤ ባረንቱ ላብያ ሃሳያንነ ቅꬍያን ኢታባ ቆፐና አሳ ዎዛና ባለꬂኖ። 19 ዎንጋላዉ ህንተ አዛዘቴዳዋ አሳይ ኡባይ ስሴዳ። ሄዋ ድራዉ፥ ታን ህንተባን ናሸታይ፤ ሽን ሎኦተꬃዉ ህንተ አꬌዳ ኤራንቻ ግዳናዳንነ ቃይ ኢታባዉ አሽከ ግዳናዳን ኮያይ። 20 ሳሮተꬃ ጾሳይ ሴጻና ህንተ ገድያፐ ጋርሳና ሃከና ማታ ዎደ ጋጫና።

ኑ ጎዳ የሱስ ክርስቶሳ አꬎ ኬካተꬃይ ህንተንቱና ግዶ።

21 ታናና ኦꬅያ ጽሞቶሰ ህንተንታ ሳሮ ያጌ፤ ቃይ ሀዋዳንካ፥ ታ ዳባቱ ሉቅዮስ፥ ያሶንነ ሶሲጳጽሮስ ህንተንታ ሳሮ ያጊኖ።

22 ታን፥ ጻርጽዮስ፥ ሀ ዳብዳቢያ ጻፌዳዌ፥ ህንተንቶ ጎዳ ሱንꬃን ሳሮታ ኪታይ።

23 አማንያ አሳይ ኡባይ አ ሶይን ሺቅያ ታ ሲራ ጋዮስ ህንተንታ ሳሮ ያጌ፤ ካታማ ሚሻ ኦይቂያ ኤራስጾስነ ኑ እሻይ ቁዋርጾስ ህንተንታ ሳሮ ያጊኖ። 24 ኑ ጎዳ የሱስ ክርስቶሳ አꬎ ኬካተꬃይ ህንተንቱና ኡባና ግዶ። አመንእ።

25 ኑን ጾሳ ጋላቴቶ። ታን ዎንጋላ ባጋና የሱስ ክርስቶሳባ ኦዴዳዋዳንነ ዳሮ ዎድያፐ ጌሚደ፥ ሀእ ቆንጬዳ ቱማተꬃዳን፥ ህንተ አማኑዋን ህንተንታ ጾሳይ ምንሳናዉ ዳንዳዬ። 26 ሽን ሀእ ናባቱ ጻፌዳዋ ባጋና ቱማተꬃይ ቆንጭያን ኤረታናዳን ኦꬄዳ፤ ቃይ አሳ ኡባይ ጾሳ አማኒደ አዛዘታናዳን፥ መꬍና ጾሳ አዛዙዋን፥ ሀ አላምያን ደእያ አሳ ዘረꬃ ኡባዉ ቆንጬዳ።

27 አꬌዳ ኤራተꬃይ አ ጻላላዉ ደእያ እት ጾሳዉ የሱስ ክርስቶሳ ባጋና መꬍናዉ ቦንቹ ግዶ። አመንእ።