4
ዎዳላይ:
1 ታ ሲቃቴ፥ ኔን አያ ማላንቻቲ! ኔን ዎታ ሎአይ!
ነ አይፈቱ ነ ሶምኡዋ ካምያ ሻርበ ግዱዋና በእያ ዎደ፥
ሀራጵያዳን ሎኢኖ።
ነ ብናናይ ጋላኣደ ደርያፐ ዎꬍያ ዴሻ ዉድያ ማላ።
2 ነ አቻይ ሜደቲደ፥ ሃꬃን ሜጨቴዳ ኡባይካ ማንትያ የልያ፥
ኡንቱንቱ ግዶን ማይኒ ባይና ዶርሳ ዉድያ ማላ።
3 ነ መተርሻቱ ዞኦ ቃጭና ማላ፤
ነ ሃሳይያ ዎደ ዳሮ ናሸቺኖ።
ነ ላኡ ጋጮቱዋ ሻርቢያ ግዱዋና ጼልያ ዎደ፥
እት ሮማንያ ላኡ ከስ ጳልቄዳዋ ማላቲኖ።
4 ነ ቆꬊ ኦላ ሚሻ ካቃናዉ ግምቤዳ፥
ዳዊታ አዱሳ ግምቢያ ማላቴ፤
ሄ ግምቢ ሻኡ ምኖ ኦላንቻቱዋ ጎንዳሊ ካቀትና፥
አሌቀት ኡቴዳ።
5 ነ ꬋንꬃቱ ማንትያ የለቴዳ፥
ዎራ ጪሻ ግዶን ምያ ገንእያ ማራቱዋ ማላቲኖ።
ሶይዙዋ እትፐተꬃ
(ስቁዋ 4:6—5:16)
6 ቃማይ ዎንታናዉ፥ ኩዋይ ክቻናዉ፥
ካርቢያ ደርያነ እጻና ዞዝያ ባደ ሸምፓሻና።
7 ታ ሲቃቴ፥ ነ አሳተꬃይ ኡባይካ ማላንቻ፤
ኔናን ዎꬅያዌ አያይነ ባዋ።
8 ታ ሙሹራቴ፥ ሊባኖሳ ደርያፐ ዎꬋ።
ጋሙነ ማሂ ጌሱ አማና ደርያፐ፥
ሳኒራ ደርያፐነ ሄርሞነ ኪክያፐ ዎꬋ።
9 ታ ሲቁዋ ምቻቶ ግድያ ታ ሲቃቴ!
ነ አይፍያ ጼሉነ ነ ቆꬍያ አሌቁ፥
ታ ዎዛና ናሸቻን ጎሼዳ።
10 ታ ሲቁዋ ምቻቶ ግድያ ታ ሙሹራተ!
ነ ሲቁ ታና አያ ናሸቺ!
ነ ሲቁ ዎይንያ ኤሳፐ አꬍ ናሸቼ፤
ነ ሽቱ ኡባባፐካ አꬊደ ሳዌ።
11 ታ ሙሹራቴ፥ ነ መተርሻና ኤሳ እልሉ ጾኬ።
ነ ዶናፐ ኤሳይነ ማꬃይ ፑልቴ፤
ነ ማዩ ሊባኖሳ ጺዳይ ሳዊያዋዳን ሳዌ።
12 ታ ሲቁዋ ምቻቶ ግድያ ታ ሙሹራት ዩሹ፥
ድረቲደ ናገትያ አታክልትያ ሳኣ ማላ።
ዩሹ ግምበቴዳ ፑልቱዋ፥
ማታፋይ አታመቴዳ ጎግያ ሃꬃ ማላ።
13 ነ አታክልተቱዋ ግዶን: ሮማኒ፥
ዶረቴዳ አታክልትያ አይፈቱ፥
ሄናይነ ናርዶስያ ግያዋንቱ ደኢኖ።
14 ሄዋዳንካ ቃይ ናርዶሲ፥
ላዲ፥ ሳዉዋ ማታይነ ቃራፋይ፥
ሄዋዳንካ እጻናዳን ሳዊያባቱ ደኢኖ፤
ሄዋዳንካ ቃይ ካርቢ፥
ጎዳረ ኡꬃ ጪሻይነ ዱማ ዱማ ቅማምያ አታክልተቱ ሞኪኖ።
15 ኔን አታክልትያ ሳኣ አልያ ፑልቱዋ ማላ፤
ደኡዋ ሃꬃይ ቤትያ ኦላ ማላ፤
ሊባኖሳ ደርያፐ ጎግያ ሻፋ ማላ ያጌዳ።
ወዶራታ:
16 ሁጲሳ ባጋ ጫርኮ፥ ደንዳ!
ገድሳ ባጋ ጫርኮ፥ ሃያ!
ታ አታክልትያ ቦላ ጫርካ! አ ሳዉ ሄዋን ቶሹኩ ጎ።
ታ ሲቁ ባረ አታክልትያ ግዶ ዮ።
ዳሮ ማልእያ ቴራቱዋ ሞ ያጋዱ።