1-2 ኡንቱንቱ ሞድያዋንቶነ ማታይ ደእያዋንቶ ሞደታናዉ፥ አዛዘታናዉነ ሎኦ ኦሱዋ ኡባ ኦꬃናዉ ጊገታናዳን ኡንቱንታ ሀሳይሳ፤ ቃይ ኡንቱንቱ ኦ ቦላንነ ኢታ ቃላ ሃሳየና ማላ፥ ኦናናነ ዋላቀተና ማላ፥ አሳ ኡባ አሽከተꬃነ ስጋተꬃ በስያዋንታ ግዳናዳን ዞራ። 3 አያዉ ጎፐ፥ ኑን ካሰ ኑ ሁጰዉካ ኤያቱዋ፥ አዛዘተናዋንታ፥ ባልያዋንታነ አሞነ ዱማ ዱማ ናሸቻዉ አይልያዳን ሞደትያዋንታ፤ ቃይ ኢታተꬃንነ ቃናትያን ደእያዋንታ፤ አሳን እጸትያዋንታነ እቱ እቱዋካ እጽያዋንታ። 4 ሽን ኑና አሽያ ጾሳ ኬካተꬃይነ አሳ እ ሲቅያ ሲቁ ቆንጬዳ ዎደ፥ 5 እ ባረ ማሮተꬃዳንካ፥ ኦራꬃ የለቱሳን ሀኔዳ ጌዩሳንነ ጌሻ አያናን ኦራጼዳዋን ኑና አሼዳዋፐ አትን፥ ኑን ጽሎ ኦሱዋ ኦꬄዳዋና ግደና። 6-7 ጾሳይ ባረ አꬎ ኬካተꬃን ኑን ጽላናዳንነ፥ እ እማና ጌዳ መꬍና ደኡዋ ላታናዳን፥ ኑና አሽያ የሱስ ክርስቶሳ ባጋና ጌሻ አያና ኑ ቦላ ዳርሲደ ትጌዳ። 8 ሀ ሃሳያይ አማነቴዳዋ፤ ጾሳ አሳቱ ሎኦ ኦሱዋ ኦꬃናዉ ጊጋናዳን፥ ሀ የዉዋ ኡንቱንቶ ኔን ምንሳደ ኦዳናዉ ኮያይ፤ ሀዋንቱ አሳዉ ሎአነ ጎእያዋንታ። 9 ሽን ኤያተꬃ ፓሉማፐ፥ ዛርያ ፓይድያዋፐ፥ ዋላሳፐነ ህግያባን ዋላቀትያዋፐ ናገታ። አያዉ ጎፐ፥ ሄዋንቱ ጎኤናዋንታነ ማደናዋንታ። 10-11 ሻኮተꬃ መꬍያ ኡራይ ጌላ አሳ ግድያዋነ ባረ ሁጲያን ፕርዲደ ናጋራ ኦꬅያዋ ኤራደ፥ እት ገደ ዎይ ላኡ ገደ አ ሴሬዳዋፐ ጉይያን፥ ሄዋ ማላትያ አሳፐ ሻከታ።

12 ታን አርጸማሳ ዎይ ትክቆሳ ኔኮ ኪትያ ዎደ፥ ኔን ታኮ ንቆጲልዮና ያናዉ ምና። አያዉ ጎፐ፥ ታን ባልጉዋ *ባልጉዋ፦ ግሪከ ቃላንካ እራይ ቡክያ ዎድያ ግድያዋ ኦዴ። እንግልዜꬁዋን ዊንተር ግያዋ። ያን ሻጫናዉ ቆፋ ቃቻድ። 13 ህግያ ኤርያ ዜናስነ አጲሎስ ኦግያ ብያ ዎደ፥ ኡንቱንቶ አያይነ ፓጨና ማላ፥ ኡንቱንታ ሎይꬃ ማዳ። 14 ኑ አሳይካ ማደና አሳ ግዲደ አተና ማላ፥ ባረንታ ሎይꬅ ኮሽያዋ ደማናዉ፥ ሎኦ ኦሱዋ ምኒደ ኦꬅያዋ ታማርኖ።

15 ታናና ደእያ ኡባቱ ኔና ሳሮ ሳሮ ጌድኖ። ኑና አማኑዋን ሲቅያዋንታ ሳሮ ሳሮ ጋ። ጾሳ አꬎ ኬካተꬃይ ህንተናና ኡባና እትፐ ግዶ። አመንእ።