ጳዉሎስ
ፕልሞናዉ
ጻፌዳ ኪታ
ገሉዋ
ፕልሞን ኤረቴዳ አማንያ አሳ፤ እ ቆላስያሳ ዎሳ ጎልያ አሳ ግደናን ዋዪ አጋና። ፕልሞናዉ አናስሞሳ ግያ አይሊ ደኤ። ሄ አይሊ ባረ ጎዳፐ በቲደ ቤዳ ዎደ፥ ቃሾ ጎለን ደእያ ጳዉሎሳና ጋከቴዳ። አናስሞስ ጳዉሎሳ ባጋና የሱሳ አማኔዳ። ጳዉሎስ ፕልሞናዉ ጻፌዳ ኪታይ ፕልሞን ጉየ ስም ቢደ ደእያ ባረ ቆማና ስገታናዳን፥ ሄዋ ሀሳይስያዋ። ሄዋ ቦላካ ሀእ አናስሞስ አማንያ አሳ ግዴዳ ድራዉ፥ ሀዋፐ ስንꬃዉ አማንያ እሻዳን አ ሞክ አካናፐ አትን፥ ቆማዳን አ ጼለናዳን አዉ ኦዴ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1-3
ፕልሞናዉ ጳዉሎሳ ጋላታ 4-7
ጳዉሎስ አናስሞሳ ድራዉ ሺሼዳ ምኖ ኦሻ 8-22
ዉርሰꬃ ቁትያ 23-25
1
1 ታን ጳዉሎስ፥ የሱስ ክርስቶሳ ድራዉ ቃሹዋን ደእያዌነ ኑ እሻ ጽሞቶስ፥ ኑናና ኦꬅያ ኑን ሲቅያ ፕልሞናዉ፥ 2 ነ ጎለን ሺቅያ አማንያዋንቶ፥ ኑ ምቻት አፍብስነ ኑናና እትፐ ደእያ ክርስቶሳ ዎታዳራ አርክፖሳዉ ሀ ዳብዳቢያ ጻፌቶ። ቆል. 4:17
3 ጾሳ ኑ አዉዋፐነ ኑ ጎዳ የሱስ ክርስቶሳፐ አꬎ ኬካተꬃይነ ሳሮተꬃይ ህንተንቶ ግዶ።
ፕልሞና ሲቁዋነ አማኑዋ
4-5 ኔን ጾሳ አሳቱዋ ሲቅያዋነ ጎዳ የሱሳ አማንያዋ ታን ስስያ ድራዉ፥ ጾሳ ዎሳደ ኔና ሀሳይያ ዎደ ኡባን፥ ታ ጾሳ ጋላታይ። 6 ኔን ነ አማኑዋ ሀራቱዋና ሻክያዌ ኑዉ ክርስቶስ የሱሳ ባጋና ይያ ሎኦባ ኡባ ኤርሳና ማላ፥ ታን ጾሳ ዎሳይ። 7 አያዉ ጎፐ፥ ጾሳ አሳቱዋ ዎዛናይ ነ ኪታን ምኔዳ ድራዉ፥ ታ እሻዉ፥ ታን ነ ሲቁዋን ዳሮ ናሸቻነ መንꬁዋ ደማድ።
አናስሞስ ፕልሞናኮ ስሜዳ ስሙዋ
8 ሄዋ ድራዉ፥ ኔን ኦꬃናዉ በስያዋ ኦꬃና ማላ፥ ታን ኔና አዛዛናዉ ክርስቶሳ ባጋና ጻሎፐካ፥ 9 ታን ጳዉሎስ ጭሜዳዌ፥ ክርስቶስ የሱሳዉ ሀእካ ቃሹዋን ደእያዌ፥ ሲቁዋ ድራዉ፥ ኔና ዎሳይ። 10 ታን ቃሹዋን ደኣደ አዉ አዉዋ ግዴዳ ታ ናኣ አናስሞሳ *አናስሞሳ፦ ግያ ሱንꬃ ብለꬃይ፥ ግሪክያ ቃላን ጎእያዋ ዎይ ማድያዋ ጉሳ። ድራዉ፥ ኔና ዎሳይ። ቆል. 4:9 11 እ ካሰ ኔና ጎኤና፤ ሽን ሀእ ኔናካ ታናካ ቱሙ ጎኤ።
12-13 ታን ዎዛናፐ ዶስያ አናስሞሳ ኔኮ የዶዌ ታ ዎዛና የዶዋ። ታን ዎንጋላ ድራዉ ቃሸታ ኡታ ደእሽን፥ ኔና ኮቺደ፥ ታና ማዳና ማላ፥ ታ ማታን አ አሻናዉ ኮያይ። 14 ሽን ኔን ነ ሸንያዳን ኦꬃናዋ ኮያይፐ አትን፥ ኔናና ዞረተናን ዎልቃን አይነ ኦꬃናዉ ኮይከ።
15 አናስሞስ ጉꬃ ዎድያ ኔፐ ሻከቴዳዌ፥ ኦን ኤር ስሚደ፥ ኡባ ዎደካ ኔናና ደአናሰንቶነ። 16 ስም ሀዋፐ ስንꬃዉ አናስሞስ አይልያ ግደና፤ ሽን አይልያፐ እ ሎይꬅ አꬌ፤ እ ታዉ አይ ኬና ሲቆ እሼ! ቃይ እ ነዉ አሳ ባጋናካ ጎዳ ባጋናካ አይ ኬና አꬌዳ እሻ ግዳንዴሻ!
17 ስም ኔን ታና ነ ላገꬃ ግያዋ ግዶፐ፥ ታና ሞክያዋዳን፥ አ ሞካ። 18 እ ነዉ ባይዜዳባይ ዎይ አ ቦላ ነዉ አጩ ደኦፐ፥ ታፐ ጭጋ አካ። 19 ሄ አጩዋ ታን ጭጋና ጋደ፥ ታን ጳዉሎስ ታ ኩሽያን ጻፋይ። ኔን ታዉ ነ ሸምፑዋ አጮታ ኡቴዳዋ ታን ኔና ሀሳይሳናዉ ኮሸና።
20 ኤ፥ ታ እሻዉ፥ ጎዳ ባጋና ኔፐ ማዱዋ ደማናዉ ኮያይ። ክርስቶሳ ባጋና ታና መንꬃ። 21 ታን ጌዳዋፐ ዳሩዋ ኔን ኦꬃናዋ ኤራደ፥ ቃይ ነ ታዉ አዛዘታናዋካ አማናደ፥ ሀዋ ነዉ ጻፋይ።
22 ቃይ ህንተንቱ ኤለካ ታዉ እማꬃይ ሸምፕያ ጎልያ ጊግስተ። አያዉ ጎፐ፥ ጾሳይ ህንተንቱ ዎሳን ታና ህንተንቶ ጉየ ዛሪደ እማና ጋደ ቆፓይ።
ዉርሰꬃ ሳሮታ
23 ክርስቶስ የሱሳ ድራዉ፥ ታናና ቃሹዋን ደእያ ኤፓፍር ኔና ሳሮ ሳሮ ጌ። 24 ቃይ ታናና እትፐ ኦꬅያ ማርቆስ፥ አርስጽሮኮስ፥ ዴማስነ ሉቃስ ኔና ሳሮ ሳሮ ጊኖ።
25 ጎዳ የሱስ ክርስቶሳ አꬎ ኬካተꬃይ ህንተንቱ አያናና ግዶ።