እብራዌ አሳዉ
ጻፈቴዳ ኪታ
ገሉዋ
ሀዌ ጳዉሎስነ ጰጽሮስ ጻፌዳዋዳን ኪታ ግደናን ትምርተ ግዲደ ጻፈቴዳዌ፥ ዎልቃማ ቱጋይ ጋክና፥ አማኑዋ አጋናዉ ማቴዳ አማንያ አሳቱዋሳ (10:32-39)። ሀ ማጻፋ ጻፌዳዌ ኦነንቶ ኤረተና። ሀ ጻፍያ ሁጰ ቆፋይ ኮይሮቲደ ኡንቱንቱን ደእያ ሲቁዋኮ ስማናዳን የሱሳ ꬎቃተꬃ በሲደ ኡንቱንታ ዞሬ። ሄ ጻፊ እብራዌ አማንያዋንቶ ምንስ ኦድያዌ የሱስ ክርስቶስ ቱማነ ጾሳ ፖሎ ቆንጨꬃ ግድያዋና። ሀ አማንያዋንቱ ባረንቱ አማኑዋን ምናና ማላ፥ ኡንቱንታ መንꬄ። እ ሄዋ ኦꬂደ ሄዙ ቱማቱዋ ቆንጭሲደ በሴ:
1. እ አኬዳ መቱዋ ባጋና ባረ አዎ ቱሙ አዛዘቴዳ የሱስ ጾሳዉ መꬍና ናኣ። እ ጾሳ ናኣ ግዴዳ ድራዉ፥ ኤጫ ቃላ ጫቁዋ ዎድያን ትምቢትያ ኦድያዋንቱፐ፥ ኪታንቻቱዋፐነ፥ ሀራይ አትን፥ ሙሴፐካ ሎይꬅ አꬍያዋ።
2. የሱስ ኤጫ ቃላ ጫቁዋ ቄሳቱዋፐ ሎይꬅ አꬍያ፥ መꬍና ቄሳ ግድያዋ ጾሳይ ባረ ሁጰዉ ኦዴዳ።
3. የሱሳ ባጋና አማንያዌ ናጋራፐ፥ ያሻተꬃፐነ ሀይቁዋፐ አቴ። የሱስ ቄሳቱዋ ኡባቱዋ ካፑዋ ግድያ ድራዉ፥ ካሰ እብራዋቱዋ አማኑዋ ዎጋቱዋንነ መሄቱዋ ያርሹዋን ኩዋዳን ቤትያ አቶተꬃ ሀእ ቱማ ግዳናዳን ኦꬄዳ።
ጻፊ እስራኤልያ አሳ ታርክያን ዳሮ ኤረቴዳ አሳ አማኑዋ ሌምሱዋዳን ጎኤቲደ (ሸምፑዋ 11)፥ ሀ ማጻፋ ናባብያ አሳቱ ባረንቱ አማኑዋን ምናናዳን ቆፍሴ። ሄዋዳንካ (ሸምፑዋ 12) ናባብያዋንቱ ባረንቱ አይፍያ የሱሳ ቦላን ትሽ ኦꬅ ዎꬂደ፥ ባረንቱ አማኑዋን ምናናዳንነ አይ ማላ መቱነ ዋዪ ጋኮፐካ፥ ኡንቱንቱ ገንጫናዳን ዞሬ። ዉርሰꬃን ቃይ ዞርያነ አኬክሱዋ ቃላ እምያዋን ዉርሴ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ: ጾሳይ የሱሳን ቆንጬዳዋ 1:1-3
ክርስቶስ ኪታንቻቱዋፐ ቦላ ግድያዋ 1:4—2:18
ክርስቶስ ሙሴፐነ ኢያሱፐ ቦላ ግድያዋ 3:1—4:13
ክርስቶሳ ቄሳተꬃ ꬎቃተꬃ 4:14—7:28
ክርስቶሳ ቃላ ጫቁዋ ꬎቃተꬃ 8:1—9:23
ክርስቶስ ያርሸቴዳዌ ኦዋፐነ ዳርያዋ 9:23—10:39
አማኑዋ ዳሮተꬃ 11:1—12:29
ጾሳ ናሸቹሳ 13:1-19
1
ጾሳይ ባረ ናኣ ባጋና ሃሳዬዳ
1 ጾሳይ በን ዎደ፥ ኑ አዎቱ ናባቱዋ ባጋና ዱማ ዱማ ኦግያንነ ዳሮ ዎድያን ሃሳዬዳ። 2 ሽን ሀ ዉርሰꬃ ዎድያን፥ ኡባባ አ ላትሲደ፥ የለታ አ ባጋና መꬌዳ ባረ ናኣ ባጋና ኑዉ ሃሳዬዳ። 3 ናአይ ጾሳ ቦንቾ ፖኡዋ ጶሌ፤ ቃይ ኩመንꬃ ጾሳ ኤሻ አኪደ፥ ባረ ዎልቃማ ቃላን ሀ ሳኣ ናጌ፤ ያቲደ አሳ ናጋራፐ ጌሺደ፥ ኡባፐ ቦላ ጾሳፐ ኡሸቻ ባጋና *ኡሸቻ ባጋና፦ ቦንቹዋነ ዎልቃሳ ግድያዋ በሴ። ሳሉዋን ኡቴዳ።
ጾሳ ናአይ ኪታንቻቱዋፐ ቦላ
4 ጾሳይ አዉ እሜዳ ሱንꬃተꬃይ ኪታንቻቱዋፐ ꬎቃ ግድያዋዳንካ፥ ኡንቱንቱፐ አ ሎይꬅ ꬎቁ ኦꬄዳ። 5 አያዉ ጎፐ፥ ጾሳይ ባረ ኪታንቻቱዋፐ ኦና፥
“ኔን ታ ናኣ፤
ታን ሀቼ ነዉ አዉዋ ግዳድ”
ጌዴ? ዎይ ቃይ ኦና፥
“ታን አዉ አዉዋ ግዳና፤
እካ ታዉ ናኣ ግዳና”
ጌዴ?ማዝ. 2:7፤ 2 ሳሜላ 7:14፤ 1 ኦዱዋ 17:13 6 ቃይ ጾሳይ ባረ ባይራ ናኣ ሀ ሳኣ የዳና ሀኒደ፥
“ታ ኪታንቻቱዋ ኡባቱካ አዉ ጎይንኖ”
ያጌዳ።ዛረ. 32:43 7 ጸሳይ ኪታንቻቱዋባ ሃሳዪደ፥
“ታን ታ ኪታንቻቱዋ ጫርኩዋ ከሳይ፤
ቃይ ታ ኦሳንቻቱዋካ ታማ ላጩዋ ከሳይ”
ያጌ።ማዝ. 104:4 8 ሽን ባረ ናኣዋ ሃሳዪደ፥
“ጾሳዉ፥ ነ ካዉተꬃ ኦይዲ፥
መꬍ መꬍናዉ ደኤ።
ነ ካዉተꬃ ጽሎተꬃን አሃሳ። ማዝ. 45:6-7
9 ኔን ጽሎተꬃ ሲቃደ፤
ናቁዋ እጻዳ።
ጾሳይ፥ ነ ጾሳይ ኔና፥
ነ ላገቱዋፐ አꬂደ፥
ናሸቻን እልልስያ ዛይትያ ኦኬዳዌ ሀዋሳ”
ያጌ። 10 ጾሳይ ሀዋዳን ያጌ፤
“ጎዳዉ፥ ኮይሮ ኔን ሳኣ መꬋዳ፤
ሳሉዋካ ነ ኩሽያን መꬋዳ።ማዝ. 102:25-27
11 ሄዋንቱ ኡባይ ꬋያና፤
ሽን ኔን ደአና።
ኡንቱንቱ ኡባይካ አፍላዳን ዉራና።
12 ኔን ኡንቱንታ ጋብያዳን ዳኮያና፤
ቃይ ኡንቱንቱ አፍላዳን ላመታናዋንታ።
ሽን ኔን ኔናካ፤
ነ ላይꬃይ ኡባካ ዉረና”
ያጌ። 13 ሽን ጾሳይ ባረ ኪታንቻቱዋፐ እቱዋነ፥
“ታን ነ ሞርከቱዋ ኔን
ገድያን የꬍያዋ ኦꬃና ጋካናዉ፥
ሀዋን ታፐ ኡሸቻ ባጋን ኡታ”
ግቤና።ማዝ. 110:1 14 ኪታንቻቱ ኡባይ ጾሳዉ ኦꬃናዉነ አቶተꬃ ደማና አሳቱዋ ማዳናዉ ጾሳይ ኪቴዳ አያናቱዋ ግድክኖዬ?