1 ቃይካ ሀራ ሳጻን ባረ ኩሽያን ልክያ ዎዶሩዋ ኦይቄዳ እት ብታንያ በኣድ። 2 ታን፥ “ኔን ሀቃ ባይ?” ያጋደ አ ኦቻድ።

እ፥ “ታን የሩሳላመ ጎምፓይነ ጌሳይ አይ ኬሸንቶ በአናዉ፥ ልካናዉ ባይ” ያጌዳ።

3 ሄዋፐ ጉይያን፥ ታናና ሃሳይያ ኪታንቻይ ከሲደ ቤዳ፤ ቃይ አናና ጋከታናዉ ሀራ ኪታንቻይካ ዬዳ። 4 አ ሀዋዳን ያጌዳ፤ “ዎጻ፤ ባደ ሄ ያላጋ ብታንያ፥ መꬍና ጎዳይ ሀዋዳን ያጌ፤ ‘አሳነ መህያ ዳሮተꬃፐ ደንዴዳዋን የሩሳላመ ካታማ ዩሹ ድርሳ ግምቢ ባይና ካታማዳን ደአና። 5 ታን አ ዩሹዋን ታማ ድርሳ ግዳና፤ ታን አ ግዶን ቦንቹዋ ግዳና ያጌ’ ያጋ” ያጌዳ መꬍና ጎዳይ።

6 መꬍና ጎዳይ ባረ አሳ ሀዋዳን ያጌ፤ “ታን ህንተና ኡባ ሳን ላላድ። ሽን ሀእ ሁጲሳ ባጋ ጋድያፐ ባቃቲደ ክችተ!” ያጌ መꬍና ጎዳይ።

7 ቃይካ ጾሳይ፥ “ኔኖ፥ ጽዮኔ፥ ባብሎነ ማጫ ናናቱዋና ደእያነ ከሳ አካደ ሃያ!” ያጌ። 8 አያዉ ጎፐ፥ ኡባፐ ዎልቃማ መꬍና ጎዳይ ባረ ቦንቹዋ ቆንጭሳና ማላ፥ ባረ አሳ ቦንቄዳ ካዉተꬃቱዋኮ ታና ኪቲደ፥ ሀዋዳን ያጌዳ፤ “ህንተና ቦችያዌ ታ አይፍያ ቡሉዋ ቦቼ። 9 በእተ፥ ታን ታ ኩሽያ ኡንቱንቱ ቦላን ደንꬃና፤ ቃይ ኡንቱንቱካ ካሰ ባረንቱ ቆማቱዋን ኦሞደታና” ያጌዳ።

ሄ ዎደ ህንተ ኡባፐ ዎልቃማ መꬍና ጎዳይ ታና ኪቴዳዋ ኤራና።

10 መꬍና ጎዳይ ሀዋዳን ያጌ፤ “ጽዮነ አሳዉ፥ የጽተነ ናሸትተ! አያዉ ጎፐ፥ ታን ያደ ህንተ ግዶን ደአና” ያጌ።

11 ሄ ዎደ ዳሮ አይሁዳ ግደና ካዉተꬃቱ መꬍና ጎዳና ጋከቲደ፥ አ አሳ ግዳና፤ እካ ኡንቱንቱ ግዶን ደአና። ቃይ ህንተካ ኡባፐ ዎልቃማ መꬍና ጎዳይ ታና ህንተኮ ኪቴዳዋ ሄ ዎደ ኤራና። 12 ጌሻ ቢታን መꬍና ጎዳይ ይሁዳ ባረና ጋኬዳ ግሹዋ ኦꬂደ ላታና፤ የሩሳላመካ እ ዛረꬂደ ዶራና።

13 መꬍና ጎዳይ ባረ ደእያ ጌሻ ሳኣን ደንዴዳ፤ ሄዋ ድራዉ፥ አሹዋ ማዬዳ ኡባይ አ ስንꬃን ጮኡ ጎ!