1 ኔኖ፥ ልባኖሳ፥ ታማይ ነ ዝጋቱዋ ማና ማላ፥ ነ ፐንገቱዋ ዶያ! 2 ኔኖ ጽድያዉ፥ ዝጋይ ኩንድ ክቼዳ ድራዉ፥ ቃይ ሄ ቦንቹዋ ምꬃቱካ ꬋይክቼዳ ድራዉ፥ አየ ጋደ ዬካ! ህንተኖ ባሳነ ጋድያ ዎላቶ፥ ሄ ኮንሶሴዳ ዎራይ ቃንጸት ክቼዳ ድራዉ፥ አየ ጊደ ዬክተ። 3 ሄንꬃንቻቱ ዝላሳ ስስተ፤ አያዉ ጎፐ፥ ኡንቱንቱ ቦንቹ ꬋዬዳ! ጋሞቱ ጉድያዋካ ስስተ፤ አያዉ ጎፐ፥ ዮርዳኖሳ ዎራይ ꬋይክቼዳ።

4 መꬍና ጎዳይ ታ ጾሳይ ታና ሀዋዳን ያጌዳ፤ “ሄ ሹከታናዉ ደእያ ዶርሳቱዋ ዉድያ ሄማ። 5 ኡንቱንታ ሻምያዋንቱ ሹክኖ፤ ሙረተናን አትኖ። ቃይ ዛልእያዋንቱካ፥ ‘ኑን ዱረቴዶ፤ መꬍና ጎዳይ ጋላተቶ’ ያጊኖ፤ ሀራይ አትና፥ ኡንቱንቱ ሄንꬃንቻቱካ ኡንቱንቶ ቃረትክኖ” ያጌዳ።

6 መꬍና ጎዳይ ሀዋዳን ያጌ፤ “ታንካ ሀዋፐ ስንꬃናዉ ሀ ጋድያን ደእያ አሳዉ ቃረትከ፤ ታን አሳ ኡባ እቱዋ እቱዋ ኩሽያንነ ካትያ ኩሽያን አꬃደ እማና። ኡንቱንቱ ጋድያ ባይዛና፤ ታንካ እት አሳነ ኡንቱንቱ ኩሽያፐ አሽከ” ያጌ።

7 ሄዋ ድራዉ፥ ታን ሹከታናዉ ደእያ ዶርሳቱዋ፥ ኡባ ቃይ ዉድያ ግዶን ቱጋቴዳዋንታ ሄምያዋ ግዳድ። ቃይ ላኡ ጋትማቱዋ አካደ ኡንቱንቱፐ እቱዋ ኬካተꬃ ጋደ ሱንꬃድ፤ ላኤንꬁዋካ እትፐተꬃ ጋደ ሱንꬃድ። ያታደ ዶርሳ ዉድያ ሄማድ። 8 ሄዋፐ ጉይያን፥ ታን እት አግና ግዶን ሄዙ ሄንꬃንቻቱዋ ድጋድ። አያዉ ጎፐ፥ ኡንቱንቱ ሀኖተꬃይ ታዉ ዳንዳየትቤና፤ ያትና፥ ኡንቱንቱካ ታና እጼድኖ። 9 ያታ ስማደ ታን ዶርሳቱዋ፥ “ታን ህንተና ላኤንꬆ ሄምከ፤ ሀይቂያዌ ሀይቆ፤ ባይያዌ ባዮ፤ አትያዌካ እቱ እቱዋና ሜተቲደ ዉሮ” ያጋድ።

10 ስማደ ታን ካዉተꬃቱዋ ኡባና ጫቀቴዳ ጫቁዋ መንꬄዳዋ በሳናዉ ኬካተꬃ ግያ ታ ጋትማ አካደ መንꬃድ። 11 ሄዋ ድራዉ፥ ሄ ጋላስካ ጫቁዋ መንꬅ አጌዳ፤ ያትና፥ ሄ ዎደ ኡንኤት ኡቴዳ ታና ጼልያ ዶርሳቱ በኢደ፥ ሀዌ መꬍና ጎዳ ቃላ ግድያዋ ኤሬድኖ። 12 ታን ኡንቱንቱ፥ “እማናዉ በሰ ጎፐ፥ ታ ድርጉዋ ሀምተ፤ ኮሸና ጎፐካ፥ አግ ባሽተ” ያጋድ። ኡንቱንቱ ታ ድርጉዋ ሀታሙ ጻጋራ ብራ ታዉ እሜድኖ። ማቶሳ 26:15ማቶሳ 27:9-10

13 ያትና፥ መꬍና ጎዳይ ታና፥ “ኡንቱንቱ ሄዋ ከሳና ግ ማየቲደ እሜዳ ሄ ካቴዳ ብራ መꬍና ጎዳ ጎልያ ሻሉዋ ምንጅያ ጎልያ ግዱዋ ኦላ” ያጌዳ። ታን ሄ ሀታሙ ጻጋራ ብራ አፋደ፥ መꬍና ጎዳ ጎልያ ሻሉዋ ምንጅያ ጎልያ ግዶ ኦላድ። 14 ሄዋፐ ጉይያን፥ ታን ይሁዳፐነ እስራኤልያፐ ግዱዋን ደእያ እሻተꬃይ መኤዳዋ በሳናዉ እትፐተꬃ ግያ ታ ላኤንꬆ ጻምኣ መንꬃድ።

15 ቃይካ መꬍና ጎዳይ ታና፥ “ላኤንꬁዋካ አዛላ ሄንꬃንቻ ሚሻቱዋ አካ። 16 አያዉ ጎፐ፥ ታን ሀ ጋድያን እት ሄንꬃንቻ ደንꬃና። ሽን እ ዋየትያ ዶርሳቱዋ ማደና፤ ላለቴዳዋንታ ሺሸና፤ ዎቢያዋ ኮለና፤ ፓጻካ ምዘና። እ ሄዋ አጊደ፥ ሞꬌዳዋንታ ሹክ ሹኪደ ሜ፤ ኡንቱንቱ ሹቁልያካ ቃንጼ። 17 ዶርሳ ዉድያ የግ ባሼዳ ሄ ላፋ ፓና ሄንꬃንቻዉ አየ አና! አ ቀስያነ አ ኡሸቻ አይፍያ ቦላን ማሻይ ዎꬎ። አ ቀሲ ስሎ፤ አ ኡሸቻ አይፊካ ትፕ ጊደ ቶኦ” ያጌዳ።