1 ሀዌ እስራኤልያባ ኦድያ መꬍና ጎዳ ቃላ። ሳሎቱዋ ምጬዳዌ፥ ሳኣካ መꬌዳዌ፥ አሳ ግዶንካ አያና መꬌዳ መꬍና ጎዳይ ሀዋዳን ያጌ፤ 2 “በአ፥ ታን የሩሳላመ ካታማ አ ዩሹዋን ደእያ አሳ ኡባ ኡሽና ጋንድጋርስያ ዎይንያ ኤሳ ትግያ ዋንጫ ማላ ኦꬃና፤ የሩሳላመ ዶደትያ ዎደ፥ ይሁዳ ካታማቱካ ዶደታና። 3 ሄ ጋላስ ታን የሩሳላመ ካታማ አሳ ኡባዉ ዴጾ ሹቻ ማላ ኦꬃና፤ አ ደንꬅያ ኡባይ ባረዉ ደሸታና። ቃይ ሳኣ ካዉተꬃቱ ኡባይ አ ኦለታናዉ እትፐ ሺቃና። 4 ሄ ጋላስ ታን ፓራ ኡባ ዳጋንꬃና፤ ፓራ ቶግያዋንታካ ጎሻና። ሄዋ ታን መꬍና ጎዳይ ኦዳይ። ይሁዳ አሳ ታን ታ ኬካ አይፍያን ጼላና፤ ሽን ሞርከቱዋ ፓራቱዋ ኡባካ ቆቅሳና። 5 ሄ ዎደ ይሁዳን ካለꬅያዋንቱ ባረንቱ ዎዛናን፥ ‘የሩሳላመ አሳይ ኡባፐ ዎልቃማ መꬍና ጎዳን፥ ባረንቱ ጾሳን፥ ምኖተꬃ ደሜድኖ’ ያጋና።

6 “ሄ ጋላስ ታን ይሁዳን ካለꬅያዋንታ ምꬃ ዶርያ ግዶን ደእያ ጺፋነ ምርቀቱዋ ግዶን ላጮትያ ጾምፕያ ኦꬃና። ኡንቱንቱ ባረንቱ ኡሸቻን ሀድርሳንነ ባረንቱ ዩሹዋን ደእያ አሳ ኡባ ማና፤ ሽን የሩሳላመ ካታማይ አሳይ ሳሮ ደኢያሳ ግዳናዋ።

7 “ዳዊታ ጎልያ ቦንቹነ የሩሳላመን ደእያዋንቱ ቦንቹ ይሁዳ አሳ ቦንቹዋፐ አና ማላ፥ ታን መꬍና ጎዳይ ካሰታደ ይሁዳ አሳዉ ጾኑዋ እማና። 8 ሄ ጋላስ ኡንቱንቱ ግዶን ዳሮ ላፋ ግያ አስካ ዳዊታ ማላ ምኖ ግዳናዳን፥ ታን መꬍና ጎዳይ የሩሳላመን ደእያዋንቶ ጎንዳለ ግዳና። ዳዊታ ጎለቱካ ጾሳ ማላ፥ ኡንቱንታ ካለꬅያ መꬍና ጎዳ ኪታንቻ ማላ ግዳና። 9 ሄ ጋላስ ታን የሩሳላመ ኦላናዉ ደንድያ ካዉተꬃቱዋ ኡባ ꬋይሳናዉ ደንዳና።

10 “ታን ዳዊታ ጎለቱዋ ቦላነ የሩሳላመን ደእያ አሳ ቦላ አꬎ ኬካተꬃነ ዎሳ አያና ጉሳና፤ ሄዋ ድራዉ፥ ኡንቱንቱ ባረንቱ ጫዴዳዋ በእያ ዎደ፥ አሳይ ባረ መጽ እት ናአዉ ዬክያዋዳን ዬካና፤ ቃይ ባረ ባይራ ናአዉካ ካዮትያ አሳዳን ካዮታና። ዮሃ. 19:37፤ ሳፃ 1:7ማቶሳ 24:30፤ ሳፃ 1:7 11 ሄ ጋላስ የሩሳላመን ዬከትያ ዬኩ ማግዶ ደምባን ሀዳድ-ርሞናስ ዬከቴዳ ዬኩዋ ኬሻ ዎልቃማ ግዳናዋ። 12 ቢታን ደእያ እት እት ዛሪ ባረዉ ባረዉ ዬካና፤ ዳዊታ ዛራቱ ባረዉ፥ ኡንቱንቱ ማቼቱካ ባረዉ፥ ናታና ዛራቱ ባረዉ፥ ኡንቱንቱ ማቼቱካ ቃይ ባረዉ ዬካና። 13 ቃይካ ሌዊያ ዛራቱ ባረዉ፥ ኡንቱንቱ ማቼቱካ ባረዉ፥ ሽምአ ዛራቱ ባረዉ፥ ኡንቱንቱ ማቼቱካ ባረዉ ዬካና። 14 ቃይ አቴዳ ዛሪ ኡባይካ ባረዉ ባረዉ ዬካና፤ ኡንቱንቱ ማቼቱካ ባረዉ ባረዉ ዬካና” ያጌ።