1 ኡባፐ ዎልቃማ መꬍና ጎዳይ ሀዋዳን ያጌ፤ “ሄ ጋላስ ዳዊታ ጎለቱዋነ የሩሳላመን ደእያዋንታ ናጋራፐነ ቱናተꬃፐ ጌሻናዉ ፑልቱ ፑልታና። 2 ሄ ጋላስ ታን ኡንቱንቱ ላኤንꬆ ሀሳየተናዳን፥ ኤቃቱዋ ሱንꬃ ጋድያፐ ꬋይሳና። ቃይ ትምቢትያ ኦድያዋንታነ ቱና አያና ጋድያፐ ꬋይሳና። ታን ኡባፐ ዎልቃማ መꬍና ጎዳይ ሀዋ ኦዳይ። 3 ቃይካ ኦንነ፥ ታን ትምቢትያ ኦድያዋ ጎፐ፥ አ የሌዳ አዉነ አታ አ፥ ‘ኔን መꬍና ጎዳ ሱንꬃን ዎርዱዋ ኦድያ ድራዉ፥ ፓጻ ደአካ’ ያጋና፤ ያጊደ እ ትምቢትያ ኦድሽን፥ አ የሌዳ አዉነ አታ አ ጫዲደ ዎꬋና። 4 ሄ ጋላስ ዎርዶ ትምቢትያ ኦድያ ዎደ፥ ባረ በኤዳ ሳፃ ጋሱዋን ዬላታና፤ ቃይ ጭማናዉ እስክያና ደእያ ዋሩዋካ ማየና። 5 ሽን እ፥ ‘ታን ናአተꬃደፐካ ዶማደ ቢታ ኦꬅያ ጎሻንቻፐ አትና፥ ትምቢትያ ኦድያዋ ግድከ’ ያጋና። 6 እት አሳይ አ፥ ‘ያትና፥ ሀ ነ ቦላን ደእያ ማዱꬃይ አዬ?’ ያጊደ ኦቾፐ፥ እ፥ ‘ሀዌ ታን ታ ላገቱዋ ሶን ማዱጼዳዋ’ ያጋና” ያጌ።

7 ኡባፐ ዎልቃማ ጎዳይ ሀዋዳን ያጌ፤ “ማሻዉ፥ ታዉ ማታ ግድያ ታ ዶርሳ ሄምያዋ ቦላ ቤጎታ! ዶርሳቱ ላለታናዳን፥ ዶርሳ ሄምያዋ ሾጫ። ታንካ ሄ ጉꬃ ዶርሳቱዋ ቦላን ታ ኩሽያ ደንꬃና።ማቶሳ 26:31፤ ማር. 14:27 8 ቢታ ኡባን ደእያ ሄዙ ኩሸ አሳፐ ላኡ ኩሺ ሾጨቲደ ሀይቃና፤ እት ኩሸ ጻላላይ ፓጻ አታና። ታን መꬍና ጎዳይ ሀዋ ኦዳይ። 9 ሀ አቴዳ ሄዘንꬆ ኩሸ አሳ ታን ታማን የጋና፤ ብራይ ታማን ጌይያዋዳን፥ ኡንቱንታ ጌሻና፤ ቃይ ዎርቃይ ፓጨትያዋዳንካ ፓጫና። ሄዋፐ ጉይያን፥ ኡንቱንቱ ታ ሱንꬃን ዎሳና፤ ታንካ ኡንቱንታ ስሳና። ታን፥ ‘ሀዋንቱ ታ አሳቱዋ’ ያጋና። ኡንቱንቱካ፥ ‘መꬍና ጎዳይ ኑ ጾሳ’ ያጋና” ያጌ።