36
Nagaranchcha Iitatetsaanne S'oossaa Lo"otetsa
Zammaaretuwaa Kaappoo Yes'etteedda, Med'inaa Godaa K'oomaa Daawita Mazimuriyaa
1 Iita Asay bare wozanaan de'iyaa iitatetsaa kooshshaa hayzzee.Rom. 3:18
S'oossaw yayyiyaawe Aa k'ofaan baawa.
2 Ayaw gooppe, I barena loytsi nashshee;
hewoo I bare nagaraa demmanawunne is's'anaw danddayenna.
3 Aa doonaappe kesiyaa haasayay geniyaanne wordduwaa.
Aad'd'eeda eraabaanne lo"obaa ootsiyaawaa I aggeeda.
4 I bare hiis'an de'iiddekka geniyaabaa ootsanaw halchchee.
I lo"o gidenna ogiyaan ek'k'eedda;
I iitabaa is's'enna.
5 Abeet Med'inaa Godaw, aggena ne siik'uu salotuwaa gakkee;
ne tumatetsaykka bolla shaariyaadan d'ok'k'ee.
6 Ne s'illotetsay ubbaappe d'ok'k'a deretuwaa mala;
ne pirddaykka ubbaappe zik'k'a c'iimmaa mala.
Abeet Med'inaa Godaw, neeni asaakka do'aakka naagaasa.
7 Abeet S'oossaw, aggena ne siik'uu ayiba al"obee!
Asay ne k'efiyaa giddo bak'ati attee.
8 Unttunttu ne soo gidon palaho maaddappe miide kalliino;
ne keekkatetsaa shaafaappe neeni unttuntta ushshaasa.
9 Ayaw gooppe, de'uwaa pulttuu ne matan de'ee;
Ne poo'uwaan nuuni poo'uwaa be'eetto.
10 Neena eriyaawantta neeni siik'iyaa siik'uwaanne
suuretoo keekkiyaa keekaa aggoppa.
11 Otoranchcha gedii taana yed'd'oppo;
nagaranchchatuwaa kushii taana yederssoppo.
12 Iita asatuu kunddeeddawantta be'ite;
unttunttu kunddeeddino; denddanawukka danddaykkino.