37
Iitatuwaanne Lo"atuwaa Wurssetsaa
Daawita Mazimuriyaa
1 Iitaa ootsiyaawanttu diraw yilotoppa.
Nagaraa ootsiyaawantta k'anaattoppa.
2 Ayaw gooppe, unttunttu maataadan ellekka melana;
shulleedda bonc'c'iyaadan unttunttu k'ok'k'ofetana.
3 Neeni Med'inaa Godaan ammanetta; lo"obaa ootsa.
Yaataade biittan palahina de'a.
4 Med'inaa Godaan nashetta;
I new ne wozanaa amuwaa immana.
5 Ne ogiyaa hadaraa Med'inaa Godaw imma.
An ammanetta; I new ootsana.
6 I ne s'illotetsaa wontta s'alk'k'iyaadan,
k'ay ne yewuwaa pirddaa gallassaa seeta awaadan poo'issana.
7 Med'inaa Godaa sintsan c'o"u gaade,
I ootsanaw, danddayan naaga.
Unttunttu iita halchchuu polettina,
duretteedda asatuwaa bolla yilotoppa.
8 Hank'k'uwaa agga; yiluwaappe te'etta.
Yilotoppa; ayaw gooppe, hewe metuwaan yeggee.
9 Iitaa ootsiyaawanttu d'ok'ollettiide d'ayana;
shin Med'inaa Godaan hidootaa ootsiyaawanttu biittaa laattana.
10 Iitaa ootsiyaawanttu guutsa wodiyaappe guyyiyaan de'ikkino;
neeni unttuntta koyinttokka unttunttu beettikkino.
11 Shin ashkketuu biittaa laattana;Mat. 5:5
unttunttu gitaa sarotetsaan nashettiide de'ana.
12 Iita Asay s'illo asaa bolla mak'etteenne
bare achchaa garc'c'ee.
13 Shin Goday iitatuwaa bollan miic'c'ee;
ayaw gooppe, unttunttu pirddaa gallassay yiyaawaa I eree.
14 Iita asatuu hiyyeesatuwaanne metootanchchatuwaa ungganawunne
suuretetsan hamettiyaawantta wod'anaw,
Barenttu mashshaa shoddeeddinonne
barenttu wonddaafiyaa dafeeddino.
15 Shin unttunttu mashshay unttunttu wozana ayifiyaan gelana;
unttunttu wonddaafiikka me"ana.
16 S'illoo de'iyaa guutsabay
c'ora iita asatoo de'iyaa darobaappe lo"a.
17 Ayaw gooppe, iitatuwaa wolk'k'ay me"ana;
shin s'illotuwaa Med'inaa Goday zemppissee.
18 Suure asatuwaa ogiyaa Med'inaa Goday eree;
unttunttu laataykka med'inaw unttunttuwaa gidana.
19 Iita wodiyaan suure asatuu yeellatikkino;
koshaa wodiyaan unttunttu kallana.
20 Shin iita asatuu hayk'k'ana.
Med'inaa Godaa morkketuu gam"enna dembbaa c'iishshaa mala;
unttunttu c'uwaadan d'ayana.
21 Iita Asay tal"i akkiide c'iggena;
shin s'illo Asay k'arettiide immee.
22 Med'inaa Godaan anjjetteedawanttu biittaa laattana;
shin shek'k'etteeddawanttu d'ok'olletti d'ayana.
23 Asaa ogii Med'inaa Godaa nashechchooppe,
Goday Aa tangguwaa kaaletseenne minisee.
24 I d'ubettooppekka kunddenna;
ayaw gooppe, Med'inaa Goday Aa kushiyaa oyk'k'iide zemppisee.
25 Taani kase yalaga; ha"i simmi c'imaad;
shin s'illo Asay c'oo attina,
woy Aa naanatuu miyaawaa d'ayi woosishin,
taani ubbakka be'a erikke.
26 I ubbaa wodekka keeka;
c'oo tal"ee.
Aa naanatuukka haratoo anjjo gidanawantta.
27 Iitaappe haakka; lo"obaa ootsa.
Yaatooppe, neeni adussa laytsaa de'ana.
28 Ayaw gooppe, Med'inaa Goday s'illobaa dosee.
S'oossaa asatuwaa I aggena;
s'illotuu med'inaw naagettiino.
Shin iitatuwaa zeretsay d'ok'ollettana.
29 S'illotuu biittaa laattananne
yaan med'inaw de'ana.
30 S'illuwaa doonay aad'd'eeda eraa odee;
Aa ins's'arssaykka s'illobaa haasayee.
31 Aa S'oossaa higgii Aa wozanaan de'ee;
Aa gediikka aappe halis's'ena.
32 Iita Asay s'illo asaa wochcheenne
wod'anaw koyee.
33 Shin Med'inaa Goday s'illo asaa Aa kushiyan aggena;
pirddaw ek'k'iyaa wodekka Aa bolla pirddissenna.
34 Med'inaa Godaan hidootaa wotsaade, Aa ogiyaa naaga.
Neeni biittaa laattana mala,
I neena darssana.
Iita asatuu d'ok'ollettiide d'ayishina,
neeni be'ana.
35 Taani itti dagantsiyaa iita bitaniyaa,
wolaadan daasheeddawaa be'aad.
36 Shin taani he saanna
simmaade aad'd'iyaa wode I d'ayeedda;
Koyinakka I beettibeenna.
37 Ane lo"o asaa akeeka; suure asaa be'a;
ayaw gooppe, saro asaw poluu lo"ana.
38 Shin bayzzanchchatuu ubbaa d'ayana;
iitatuwaa poluukka d'ok'olletti d'ayana.
39 S'illotuwaa atotetsay Med'inaa Godaappe yee;
metuwaa wode I unttunttoo naagetti attiyaa sa'aa.
40 Med'inaa Goday s'illotuwaa maaddeenne ashshee.
Unttunttu aakko bak'ateedda diraw,
I unttuntta iitatuwaappe wotsi akkeenne ashshee.