42
Yɛnŋɛlɛ li tunmbyee wi kala
Yurugo koŋgbanŋga
1 We Fɔ wì yo fɔ: «Na tunmbyee wi ŋa,
wo ŋa mi yɛn ma tɔgɔ we;
wo wi yɛn ŋa mì wɔ,
wi kala li yɛn mala ndanla fɔ jɛŋgɛ.
Mìlan yinnɛ li le wi ni,
wi yaa kaa kasinŋge ki nari cɛngɛlɛ woolo pe na.
2 Wi se ka jɔrɔgɔ, wi se kaa magala li yirige ŋgbanga;
pe se kaa yogo logo wa ca nawa koŋgolo ke ni.
3 Wi se ka gbagara kanŋgala na lì kunnu li kaari,
wi se ka fitanla ŋa wi yɛn na finri wi figi;
wi yaa kaa kiti wi kɔɔn mbaa yala kaselege ki ni.
4 Wi fanŋga ki se ka kɔ wi ni, wi wire ti se ka fanla wi na,
fɔ wi ka sa kasinŋge ki kan ki yeresaga ta laga tara ti na.
Lɔrɔ furo tara fɛnnɛ pe yaa ka pe jigi wi taga wi lasiri wi na†42.4: Mati 12.18-21.»
Yanwa mba pì yiri
cɛngɛlɛ woolo pe kan
cɛngɛlɛ woolo pe kan
5 Yɛnŋɛlɛ le, Yawe Yɛnŋɛlɛ le, lo lì naayeri wi da maa sanga ma kari,
ma tara ti jaraga lagapyew, ma yaara nda ti ma fi ti yirige wa ti na,
ma yinwege kan tara woolo pe yeri,
ma yinwege wɔnwɔn pi le mbele pe maa yanri tara ti na pe ni†42.5: Kapye 17.24-25; lì yo fɔ:
6 «Mi Yawe Yɛnŋɛlɛ, muwi mɔ̀ɔ yeri, ma ta maa kasinŋge ki nari;
mi yaa kɔɔn yigi kɛɛ na, mbaa wele ma na.
Mi yaa kɔɔn tɛgɛ mbɔɔn pye na yɔn finliwɛ pi lefɔ mi naa leele pe sɔgɔwɔ,
mbɔɔn pye paa yanwa yɛn cɛngɛlɛ ke kan†42.6: Eza 49.6; Luki 2.32; Kapye 13.47; 26.25,
7 jaŋgo mbe fyɔɔnlɔ pe yɛngɛlɛ ke yɛngɛ,
mbe kasopiile pe wɔ wa kaso wi ni,
mbe mbele pe yɛn ma tɔn wa diwi ni pe tile mbe pe wɔ wa wi ni†42.7: Luki 4.18.
8 «Muwi mi yɛn Yawe Yɛnŋɛlɛ le, ko ki yɛn na mɛgɛ ye;
mi se na gbɔgɔwɔ pi kan wa yɛgɛ yeri,
sɔnmɔ mba pi daga paa na sɔnni, mi se ti poo kan yarisunndo tige woro yeri.
9 Ye wele, kagala ŋgele kàa keli ma yo faa, kè pye ma yɔn fili;
koni mi yɛn na kagala fɔnŋgɔlɔ yɛgɛ yuun ye kan,
sanni ke sa pye, mi yaa ti yege jɛn.»
Dunruya woolo pe ni fuun
pe yaa kaa Yɛnŋɛlɛ li cew tawa
pi sɔnni
pe yaa kaa Yɛnŋɛlɛ li cew tawa
pi sɔnni
10 Ye yurugo fɔnŋgɔ shɔ ye Yawe Yɛnŋɛlɛ li gbɔgɔ,
yaa li sɔnni fɔ wa tara ti kɔsaga ki na,
yoro mbele ye maa tangaŋgala piin tɔnmɔkɔɔrɔ ti ni wa kɔgɔje wi na,
naa kɔgɔje nawa yaara ti ni fuun,
naa lɔgɔ furo tara to naa ti nawa fɛnnɛ pe ni.
11 Gbinri wo naa cara nda wa gbinri wi ni tiri magaŋgala ke yirige mbeli sɔn,
konaa Kedari cɛnlɛ woolo pe kapire ti ni.
Yoro Sela waara lara woolo yaa yɔgɔrimɔ yuuro koo;
ye koro wa yanwira ti go na yaa yɔgɔrimɔ kɔŋgɔlɔ waa.
12 Yaa Yawe Yɛnŋɛlɛ li gbogo,
yoro lɔgɔ furo tara woolo yaa li sɔnni.
13 Yawe Yɛnŋɛlɛ li yɛn na yinrigi paa maliŋgbɔɔn kotogofɔ yɛn,
li yɛn nali kayaŋga ki yinrigi li yɛɛ ni paa maliŋgbɔɔn yɛn;
li yɛn na malaga kɔŋgɔlɔ waa, na magaŋgbɔlɔ yinrigi,
li yɛn na cew taa li juguye pe na.
Yawe Yɛnŋɛlɛ li yaa kali tunŋgo
ki yɔn fili
ki yɔn fili
14 We Fɔ wì yo fɔ: «Mìla pyeri ma mɔ;
mi sila para, mila na yɛɛ yingiwɛ jɛn.
Ɛɛn fɔ koni, mi yɛn na jɛɛn paa kugbɔfɔ selara ma kaa yiri wi ni we,
ŋa wi wɔnwɔn pì gbɔn ma piri wi na, a wila wɔɔn na kologi.
15 Mi yaa ka yanwira naa tinndiye pe tɔngɔ,
mbe yan tipirige naa tige tipirige pyew ki waga;
mi yaa ka gbaanla pe kanŋga mbe pe pye lawaga tara,
mbe lambaara ti waga.
16 Mi yaa ka ti fyɔɔnlɔ paa tanri konɔ la ni,
konɔ na pee jɛn;
konɔ na pee jɛn, pa mi yaa pe yɛgɛ le wa li ni.
Mi yaa ka diwi wi kanŋga mboo pye yanwa wa pe yɛgɛ,
mbe lara nda tì yagara yagara ti yɔn yala.
Ko kagala ŋgele koro mi yaa pye;
mi se ka ke yaga mbapyewe.
17 «Mbele pe ma pe jigi wi taga yarisunndo yanlɛrɛ nda pè tɛ ti na,
pe yaa ka sɔngɔrɔ puŋgo ni, mbe fɛrɛ shɔ fɔ jɛŋgɛ;
poro mbele pe maa ki yuun tugurɔn yarisunndo ti kan fɔ:
‹Yoro ye yɛn we yarisunndo re!› »
Izirayɛli woolo pe yɛn nuŋgbojiile
naa fyɔɔnlɔ
naa fyɔɔnlɔ
18 Yɛnŋɛlɛ lì yo fɔ: «Yoro nuŋgbojiile, yaa nuru!
Yoro fyɔɔnlɔ, yaa wele, yaa yaan!
19 Ambɔ wi yɛn fyɔɔn wo, na na tunmbyee wo ma?
Ambɔ wi yɛn nuŋgbojili wo paa na yɛɛra pitunŋɔ ŋa mì tun wi yɛn?
Ambɔ wi yɛn fyɔɔn wo paa ŋa wì yɛyinŋge ta wi yɛn?
Ambɔ wi yɛn fyɔɔn wo paa Yawe Yɛnŋɛlɛ li tunmbyee wi yɛn?
20 Yè yarilɛgɛrɛ yan, ɛɛn fɔ ye siri jate;
ye nuŋgbogolo ke yɛn ma yɛngɛ ye na, ɛɛn fɔ yee yaraga ko ka logo.»
21 Yawe Yɛnŋɛlɛ li yɛn ma sin, ki kala na,
làa pye na jaa mbe gbɔgɔwɔ kan li lasiri wi yeri, mboo tiyɔnwɔ pi naga.
22 Ɛɛn fɔ Izirayɛli woolo pe mbele, leele pèle pan ma to pe na,
ma pe kɛɛ yaara ti koli, ma pe san mari shɔ pe yeri.
Pe ni fuun pè toori wegbɔgɔ ka ni, a kì pye pɛnɛ ma pe yigi;
pàa pe yigi ma pe tɔn kaso.
Pàa pe kɛɛ yaara ti koli, lere kpɛ sila ta mbe pe shɔ.
Pàa pe san ma pe yarijɛndɛ ti shɔ pe yeri, ɛɛn fɔ lere kpɛ sila ta mbe yo fɔ yeri sɔngɔrɔ pe na.
23 Ɛɛn fɔ ye ni, ambɔ wi yaa nuŋgbolo jan ki kagala ke yeri, mbe ke tɛgɛ wi nawa?
Ambɔ wi yaa nuŋgbolo jan, mbe kagala ŋgele ke yɛn na paan wa yɛgɛ ke logo?
24 Naga yɛn ma, ambɔ wi Zhakɔbu setirige piile pe kɛɛ yaara ti le mbele pè pe san mari shɔ pe yeri pe kɛɛ?
Ambɔ wi pe yarijɛndɛ ti le mbele pèri koli pe kɛɛ?
Naga yɛn ma, Yawe Yɛnŋɛlɛ lo ma wi le? Lo na wè kapege pye li na we.
Wee yɛnlɛ mbe tanga li konɔ li na,
wee yɛnlɛ mbeli lasiri sɛnrɛ ti logo.
25 Ki kala na, naŋgbanwa gbɔɔ yɛn li ni Izirayɛli woolo pe ni,
a lì malaga wa pe na fɔ tipege.
Ki malaga kasɔn kìla pye na sori kɛɛ ki ni fuun ki na, ɛɛn fɔ pe sila kala la kɔrɔ jɛn;
ki kasɔn kìla pe sogo, ɛɛn fɔ pe sila ki kala li yigi kala.