43
Yawe Yɛnŋɛlɛ lo nuŋgba li yɛn
Izirayɛli woolo pe shɔfɔ we
Izirayɛli woolo pe shɔfɔ we
1 Koni, Zhakɔbu setirige piile, Yawe Yɛnŋɛlɛ na lì ye da,
lo na lì ye gbegele yoro Izirayɛli woolo wele,
pa lì yo yɛɛn fɔ: «Yaga ka fyɛ, katugu mì ye go shɔ;
muwi mì ye yeri ye mɛgɛ ki na, ye yɛn na woolo.
2 Ali na ye kaa tɔnŋgbɔɔ kɔɔn mbe yiri, mi yaa pye ye ni,
ali na yaga gbaan wi pari mboo kɔn mbe yiri, wi se ye li;
ali na ye kaa tanri wa kasɔn ki nandogomɔ, ki se ye sogo,
kasɔn yinnɛ li se ye sogo.
3 «Katugu muwi mi yɛn Yawe Yɛnŋɛlɛ, ye Yɛnŋɛlɛ le;
muwi mi yɛn yoro Izirayɛli woolo Yɛnŋɛlɛ kpoyi le, ye shɔfɔ we.
Mi yaa Ezhipiti tara ti kan, ti pye ye go shɔgɔ sara,
mbe Etiyopi tara naa Seba tara ti kan ye yɔnlɔ, mbe ye shɔ.
4 Kì kaa pye ye kala li yɛn ma ŋgban na ni,
ye kala li yɛn ma gbɔgɔ na yeri, ye si yɛn mala ndanla,
ki kala na, leele pele yɛgɛ mi yaa kan ye yɔnlɔ,
mbe cɛngɛlɛ kele yɛgɛ kan mbe ye go shɔ.
5 «Ki kala na, yaga ka fyɛ, katugu mi yɛn ye ni.
Mi yaa ka ye setirige piile pe yirige wa yɔnlɔ yirisaga kɛɛ yeri, mbe pan pe ni,
mbe ye yirige wa yɔnlɔ tosaga kɛɛ yeri, mbe pan mbe ye gbogolo.
6 Mi yaa kaga yo yɔnlɔparawa kamɛŋgɛ kɛɛ tara ti kan fɔ: ‹Ye pe kan na yeri,›
mbege yo yɔnlɔparawa kalige kɛɛ tara ti kan fɔ: ‹Yaga ka pe yaga wa ye yɛɛ yeri naa.›
Yanla pinambiile pe yirige wa taleere ti ni, pe pan,
yanla sumborombiile pe yirige fɔ wa tara ti kɔsaga ki na, pe pan.
7 Poro mbele fuun na mɛgɛ ki yɛn na yinri pe na,
poro mbele fuun mì da paa na gbogo,
poro mbele fuun mì fanri ma pe gbegele we.»
Izirayɛli woolo poro pe yɛn
Yɛnŋɛlɛ li sɛrɛfɛnnɛ wele
Yɛnŋɛlɛ li sɛrɛfɛnnɛ wele
8 Ye ki leele mbele pe yaga paa paan,
poro mbele pe woro na yaan, ma si yala yɛngɛlɛ yɛn pe na;
poro mbele pe woro na nuru, ma si yala nuŋgbogolo yɛn pe na.
9 Cɛngɛlɛ ke ni fuun ke daga mbe gbogolo,
leele pe ni fuun pe daga mbe pile pe yɛɛ na.
Pe ni ambɔ wila ki kagala ke yan ma ke yo?
Ambɔ wila kagala ŋgele kè pye ma toro faa ke sɛnrɛ yo we kan?
Pe pan pe sɛrɛfɛnnɛ pe ni, pege naga fɔ tanga yɛn pe yeri;
ki sɛrɛfɛnnɛ pe logo pe yeri, pege yo pege filige fɔ: «Kaselege yi.»
10 Yawe Yɛnŋɛlɛ lo lì yo ma fɔ: Yoro Izirayɛli woolo, yoro ye yɛn na sɛrɛfɛnnɛ wele;
yoro ye yɛn na tunmbyeele mbele mì wɔ,
jaŋgo yege jɛn; ye taga na na,
ki filige ye kan fɔ muwi mi yɛn Yɛnŋɛlɛ le.
Yɛnŋɛlɛ la yɛgɛ sila pye wa na yɛgɛ,
la yɛgɛ se si pan mi puŋgo na.
11 Muwi mi yɛn Yawe Yɛnŋɛlɛ le,
mbe wɔ mi wo ni, shɔfɔ wa yɛgɛ woro wa naa.
12 Muwi mìla ki kagala ke yo, muwi mì ye shɔ, muwi mìla ke yo ma ke naga;
yarisunndo nambannda nda wa ye sɔgɔwɔ ko ka ma.
Yoro ye yɛn na sɛrɛfɛnnɛ wele,
Yawe Yɛnŋɛlɛ lo lì yo ma.
Muwi mi yɛn Yɛnŋɛlɛ le.
13 Mi yɛn Yɛnŋɛlɛ wagati wi ni fuun ni,
lere se ya yaraga ka shɔ na kɛɛ.
Mi ka kala na pye, ambɔ wi mbe ya mbeli kanŋga?
Yawe Yɛnŋɛlɛ li yaa sagafɔ
torogo Izirayɛli woolo pe yeri
torogo Izirayɛli woolo pe yeri
14 Yawe Yɛnŋɛlɛ na li yɛn ye go shɔfɔ we, Izirayɛli woolo Yɛnŋɛlɛ kpoyi le, pa lì yo yɛɛn fɔ:
«Yoro kala na, mi yaa lere wa torogo wa Babilɔni tara malaga ni,
wi sa Babilɔni tara fɛnnɛ pe tirige wi pe jan;
pe yaa ka ye wa pe tɔnmɔkɔɔrɔ ti ni mbe fe,
to nda pàa pye na jɔrɔgi wa ti ni nayinmɛ ni.
15 Muwi mi yɛn Yawe Yɛnŋɛlɛ, ye Yɛnŋɛlɛ kpoyi le,
yoro Izirayɛli woolo dafɔ we, ye wunlunaŋa we.»
16 Faa Yawe Yɛnŋɛlɛ lo làa kologo wɔ wa kɔgɔje wi ni,
ma torosaga wɔ wa tɔnŋgbɔɔ mba pi yɛn fanŋga ni pi ni.
17 Lo làa malaga gbɔnwotoroye poro naa shɔnye pe yirige, ma pe torogo malaga ki na,
konaa maliŋgbɔɔnlɔ ŋgbelege naa maliŋgbɔɔnlɔ kotogofɛnnɛ pe ni.
Pè toori ma sinlɛ sinlɛ, pe se ka yiri naa,
pè figi paa fitanla maŋga yɛn†43.17: Ki laga ŋga ki yɛn na nandowo kaan Moyisi sanga wo na, paa yɛgɛ ŋga na Yɛnŋɛlɛ làa Izirayɛli woolo pe shɔ Farawɔn wi kɛɛ, ma ti a pè Kɔgɔje yɛɛn wi kɔn ma yiri we (Ɛki 14.1-31)..
18 Pa lì yo yɛɛn fɔ: «Yaga kaa nawa tuun kagala ŋgele kè pye ma toro faa ke na naa,
yaga kaa jatere piin faa kagala ke na naa.
19 Ye wele, mi yaa kala fɔnnɔ la pye,
li yɛrɛ lɛ na piin makɔ, ye woro na li yaan wi le?
Mi yaa konɔ wɔ wa gbinri wi ni,
mbe ti gbaanla mbaa fuun wa lawaga tara ti ni.
20 Yan woŋgaala pe yaa kaa na gbogo,
poro pe yɛn dabaala poro naa kɔnrɔsogolo ye wele;
katugu mi yaa ka tɔnmɔ yirige wa gbinri wi ni,
mbe ti gbaanla mbaa fuun wa lawaga tara ti ni,
mbe ta mbe tɔnmɔ kan na woolo pe yeri poo wɔ, poro mbele mì wɔ we.
21 Leele mbele mì gbɛgɛlɛ na yɛɛ kan,
pe yaa kaa na gbɔgɔwɔ wogo ki yari.»
Yawe Yɛnŋɛlɛ li yɛn
na li woolo pe jɛrɛgi
na li woolo pe jɛrɛgi
22 «Konaa ki ni fuun, yoro Zhakɔbu setirige piile, ye sila na mɛgɛ ki yeri mbanla gbɔgɔ,
yoro Izirayɛli woolo yè te na ni.
23 Ye sila ye simbapiile pe wɔ na yeri saraga sogowogo,
ye sila pye na ye saara ti woo mbaa mi gbogo;
mi sila ye ŋgbanga mbe yo fɔ yaa yarikanra kaan na yeri,
nakoma mbe ye te wusuna nuwɔ taan saara wɔgɔ ni.
24 Ye sila penjara wɔ mbe gbagara kanŋgirɛ nuwɔ taan woro lɔ na kan,
ye sila na nawa pi yinŋgi ye yaayoro saara yanlaga lara ti ni;
ɛɛn fɔ yàa ye kapere tuguro ti taga na go na,
yàa na te ye kambasinnde ti ni.
25 Konaa ki ni fuun, mi jate, muwi mi yɛn na ye kapere ti kala yari ye na, na yɛɛra gbɔgɔwɔ pi kala na;
mi se jatere pye ye kapere ti na naa.
26 «Yanla nawa to ŋga mì pye ki na, we yo we yan we yɛɛ yeri;
yoro jate ye para yege naga fɔ ye tanga ta.
27 Ye tɛlɛ koŋgbanŋa wìla kapege pye,
a ye sɛnrɛ yofɛnnɛ pè yiri ma je na na.
28 Ki kala na, mìla shɛrigo gbɔgɔ kpoyi ki yɛkeele pe tifaga,
ma Zhakɔbu setirige piile pe tɔngɔ, ma poro Izirayɛli woolo pe kan paa tɛgɛ pe na.»
†43:17 43.17: Ki laga ŋga ki yɛn na nandowo kaan Moyisi sanga wo na, paa yɛgɛ ŋga na Yɛnŋɛlɛ làa Izirayɛli woolo pe shɔ Farawɔn wi kɛɛ, ma ti a pè Kɔgɔje yɛɛn wi kɔn ma yiri we (Ɛki 14.1-31).