26
Lembigewe kala
1 Were tii daga kafugo sanga ni,
tisaga kii daga yarilire kɔnsanga ni;
ki pyelɔmɔ nuŋgba pi na fun, gbɔgɔwɔ pii daga lembige ki ni paa ki gbogo.
2 Karikana li ma yiri ma kari yɛgɛ ŋga na,
nakoma ndinɛ li ma yiri sire na na toro yɛgɛ ŋga na,
ki pyelɔmɔ nuŋgba pi na, maga lere daŋga go fu, ki ma toro kila wi yigi.
3 Sapige ki daga shɔn wi ni, karafe wi daga sofile wi ni,
gbɔnkanŋgala li daga lembige ki pɔgɔlɔ ke ni mbege koro.
4 Maga ka lembige ki yɔn sogo mbe yala ki lembigewe sɛnyogo ki ni,
nakoma ma yaa ka pye mbe yala ki ni.
5 Lembige ki yɔn sogo mbe yala ki lembigewe pi ni,
nakoma ki yaa la ki yɛɛ jate kajɛnŋɛ.
6 Lere ŋa ka tijinliwɛ fu fɔ tun tunŋgo ni,
ki fɔ wì lembigewe kala pye, paa yɛgɛ ŋga lere ma kaa wi yɛɛra tɔlɔgɔ ki kɔn we,
katugu wi yɛn na kaŋgbanra lagajaa wi yɛɛ kan.
7 Jejɔgɔlɔ fɔ wi jele li ma pye fanŋga fu yɛgɛ ŋga na,
ki pyelɔmɔ nuŋgba pi na, yomiyɛlɛ li woro fanŋga ni wa lembige ki yɔn.
8 Mbe lembige ki gbɔgɔ,
ki yɛn paa yɛgɛ ŋga na lere ma sinndɛlɛgɛ pɔ gbafurugo na mbe si yo wi yaa ki wa.
9 Yomiyɛlɛ li ma pye wa lembige ki yɔn
paa wuuro sanwiga ma kaa pye sinwɔɔ wi kɛɛ mbe gbɔn.
10 Lere ŋa wi ma lembige ki lɛ tunŋgo na,
nakoma mbe torofɔ wa lɛ tunŋgo na,
wi yɛn paa sandiga fɔ yɛn, ŋa wi yɛn na lere pyew wi wɛlɛgi.
11 Yɛgɛ ŋga na pyɔn wi ma sɔngɔrɔ wi tuguro ti kɔrɔgɔ nari kaa†26.11: 2 Pyɛ 2.22,
ki pyelɔmɔ nuŋgba pi na, lembige ki ma sɔngɔrɔ mbaa ki lembigewe kapyere ti piin.
12 Na maga lere yan wi yɛn naa yɛɛ piin kajɛnŋɛ,
kona mɔɔ jigi wi taga lembige na ko mbɔnrɔ ma wɛ wo na.
Tiyanŋa kala
13 Tiyanŋa wi ma yo fɔ: «Cɛngɛ yɛn wa konɔ!
Jara yɛn wa ca nawa koŋgolo ke ni!»
14 Yɛgɛ ŋga na kɔrɔ pyɔ wi maa sunrugu sunrugu wa sariyɛnye pe na,
pa tiyanŋa wi maa sunrugu sunrugu wa wi sinlɛyaraga ki na ma.
15 Tiyanŋa wi maa kɛɛ ki le wa sogbolo li ni,
ɛɛn fɔ mbege sɔngɔrɔ mbe kari ki ni wa yɔn ki yeri, wi maga yan ki yɛn tege ni.
16 Tiyanŋa wi maa wi yɛɛ jate wi yɛn kajɛnŋɛ
ma wɛ leele kɔlɔshyɛn na, mbele pè yɔn sogomɔ kanga jɛn tijinliwɛ ni.
Maara kɔnfɔ wi kala
17 Torofɔ ŋa wi maa yɛɛ le malaga ka ni, ŋga ki woro wi wogo,
wi yɛn paa lere wa yɛn, ŋa wi ma pyɔn yan wila toro, mbe si yo wi yaa wi yigi wi nuŋgbogolo ke na.
18 Yarafɔ wi maa kasɔn sumboyuro ti waa,
na wangala ke wɔnni, na legbogo kagala piin yɛgɛ ŋga na,
19 lere ŋa wi maa lewee yɛnlɛ wi fanla mboo puŋgo,
mbe si sɔngɔrɔ mbe yo fɔ: «Sagbasi mì pye na waa ma ni;» pa ki fɔ wi yɛn ma.
20 Na kanŋgirɛ ti ka kɔ wa kasɔn ki ni, ki ma figi;
ki pyelɔmɔ nuŋgba pi na fun, na lesangara fɔ woro wa, malaga ki ma kɔ.
21 Naŋganra ti kaa yiin ti ma pye kasɔn naŋganra,
kanŋgirɛ ti maa yiin ma pye kasɔn;
ki pyelɔmɔ nuŋgba pi na fun, maara kɔnfɔ wi maa malaga ki seregi.
22 Lesangara fɔ wi yɔn sɛnrɛ ti yɛn paa sutanra yɛn,
nda ti ma tigi ma ni fɔ ma gbɔn wa latiire ti na.
23 Yɔn sɛntanra yofɔ ŋa wi nawa pi yɛn ma pe wi na,
wi yɛn paa pe ma kaa warifuwe ŋa fire ni wa yan mboo fa joro cɔgɔ na.
24 Lere ŋa wi maa leele panra, wi maga lara wi yɔn sɛnrɛ ti ni,
mbe sigi ta tipewe po pi yɛn wa wi kotogo na.
25 Ali na wi kaa yɔn sɛnrɛ ti tanla yɛgɛ o yɛgɛ, maga ka taga wi na;
katugu jatere tijangara lɛgɛrɛ ti yɛn wa wi nawa.
26 Wi mbe ya mboo lepanraga ki lara wi tijinliwɛ pee pi ni;
ɛɛn fɔ wi tipewe pi yaa ka yiri funwa na janwa wi yɛgɛ na.
27 Lere ŋa ka titɛgɛ wɔ lere mɛgɛ ni, wo jate wi ma kaa to wa ki ni;
lere ŋa kaa sinndɛlɛgɛ koŋgi mbege wa lere na, ki ma kaa sɔngɔrɔ ma to wo yɛɛ jate na.
28 Yagboyoo wi ma finlɛlɛ ma ye leele mbele ni, wi ma pe panra fun;
yɔn ŋga ki maa leele lɛlɛ, ki maa jɔgɔwɔ piin.