Yɛnŋɛlɛ gbɔgɔ
YUURO
sɛwɛ
Sɛwɛ wi nawa sɛnrɛ
Yuuro sɛwɛ wi yɛn Zhufuye poro Yɛnŋɛlɛ gbɔgɔyuuro naa pe Yɛnŋɛlɛ yɛnrɛwɛ sɛwɛ. Ki yuuro ti yɛn cɛnmɛ naa nafa shyɛn ma yiri kɛ (150), ti wɔfɛnnɛ pe yɛn pe yɛ pe yɛ; ti wɔmɔ pòo pye yɛgɛlɛ lɛgɛrɛ ni. Ko puŋgo na, a pè si kaa ti gbogolo ti yɛɛ na mari le sɛwɛ kaŋgurugo ni.
Ki yuuro ti yɛn na para sɛnrɛ yinrɛ lɛgɛrɛ na nda ti yɛn ti yɛ ti yɛ: Yɛnŋɛlɛ li gbɔgɔyuuro naa li sɔnmɔ woro wa. Mbeli yɛnri lɔɔn saga ko yuuro yɛn wa, laa ma go singi ko woro yɛn wa, lɔɔn shɔ nakoma lɔɔn kala yaga ko woro yɛn wa. Yɛnŋɛlɛ li sharaga yuuro yɛn wa li kajɛŋgɛ pyege ki kala na, konaa mbeli yɛnri li jɔlɔgɔ wa juguye pe na ko woro yɛn wa. Ki yɛnrɛwɛ yuuro ta yɛn na leele nuŋgba nuŋgba jatere nari, ta yɛn na gbogolomɔ woolo pe jatere wo nari, ma si yala, ta yɛn wa, to yɛn na Yɛnŋɛlɛ woolo pe ni fuun pe jorowo kagala koro nari konaa ŋga ki yɛn wa pe nawa ki ni.
Leele mbele pège yuuro nda ti wɔ, wee ka jɛn jɛŋgɛ pe wogo na. Wagati lɛgɛrɛ ni, wee jɛn yiŋgi na ki yurugo ŋga nakoma yurugo ŋga ko yɛn sɛwɛ ŋa nakoma sɛwɛ ŋa wo ni. Wagati wa ni, sɛnrɛ go jɛɛlɛ la ma pye yurugo ka lɛsaga na, na kala la yɛgɛ nari we na ki wogo na. Wa sɛwɛ koŋgbanŋa naa shyɛn woo wi ni, yuuro lɛgɛrɛ yɛn wa, pe yɛn na to kaan wunlunaŋa Davidi wo yeri (Yuuro 52-65; 67-71). Wa sɛwɛ taanri woo wi ni, yuuro ta yɛn wa to yɛn Kore go gbogolomɔ woolo poro woro (Yuuro 42-49; 84-88) konaa Asafu woro (Yuuro 73-83). Wa sɛwɛ tijɛrɛ woo wi ni, yuuro nda ti yɛn na para wunluwɔ wi sɛnrɛ na pa ti yɛn wa (Yuuro 93-99) ti ni. Wa sɛwɛ kaŋgurugo woo wi ni, yuuro nda tìla pye na shoo tangala gbɔgɔlɔ ke na mbe kari wa Zheruzalɛmu ca sa Yɛnŋɛlɛ gbɔgɔ, to ti yɛn wa (Yuuro 120-134) ti ni. Sɛwɛ wi nuŋgba nuŋgba pyew wi ma saa kɔ Yɛnŋɛlɛ li sɔnmɔ yuuro ni.
Sɛwɛ wi yɛn ma kɔɔnlɔ yɛgɛ ŋga na
Sɛwɛ koŋgbanŋa wi yuuro 1–41
Sɛwɛ shyɛn woo wi yuuro 42–72
Sɛwɛ taanri woo wi yuuro 73–89
Sɛwɛ tijɛrɛ woo wi yuuro 90–106
Sɛwɛ kaŋgurugo woo wi yuuro 107–150
SƐWƐ KOŊGBANŊA
1
Yuuro 1–41
Konɔ sinnɛ na li maa fɛrɛwɛ kaan
1 Lere ŋa wi woro na tanri lepeele pe yɛrɛwɛ sɛnrɛ ti na,
wii si kapere pyefɛnnɛ pe konɔ li lɛ,
wi si woro na cɛɛn mbele pe maa tɛgɛ Yɛnŋɛlɛ na pe ni,
fɛrɛwɛ yɛn ki lerefɔ wi woo!
2 Yawe Yɛnŋɛlɛ li lasiri sɛnrɛ to ti yɛn maa ndanla,
wi maa jatere piin ki lasiri sɛnrɛ ti na sɔnlɔ naa yembinɛ.
3 Ki lerefɔ wi yɛn paa tige yɛn, ŋga pè sanri lafogo yɔn na,
ki maa sɛni ki sɛsanga wi na,
ki wɛrɛ tila fanla.
Kala o kala ki lerefɔ wi ma pye li ma yɔn wi kan†1.3: Zhere 17.8.
4 Ɛɛn fɔ lepeele poro wogo ko woro ma.
Pe yɛn paa yan sigire yɛn, ŋga tifɛlɛgɛ ki maga lɛ ma kari ki ni.
5 Ki kala na, lepeele pe se ka yeresaga ta kiti kɔnpilige;
poro mbele kapere pyefɛnnɛ pe se ka cɛnsaga ta wa lesinmbele pe gbogolomɔ pi ni.
6 Katugu Yawe Yɛnŋɛlɛ li maa wele lesinmbele pe konɔ li na,
ɛɛn fɔ lepeele pe konɔ li yaa pe jɔgɔ mbe pe wɔ wa.