2
Wunluwɔ ŋa Yɛnŋɛlɛ lì wɔ ma tɛgɛ
1 Yiŋgi na cɛngɛlɛ kè si yiri ma je ma?
Yiŋgi na tara woolo pe nɛɛ yɔn nii wagafe ma?
2 Tara na wunlumbolo pe yɛn na pe yɛɛ gbɛgɛlɛ mbe malaga gbɔn,
tara teele pe yɛn na pe yɛɛ gbogolo mbe yiri Yawe Yɛnŋɛlɛ li kɔrɔgɔ,
konaa wunlunaŋa ŋa lì sinmɛ kpoyi wo wi na maa wɔ wi kɔrɔgɔ†2.1-2: Ki laga ŋga ki yɛn na para Izirayɛli tara wunlunaŋa wo sɛnrɛ na, kana ŋa pàa pye na yinri Davidi; puŋgo na tagafɛnnɛ pe kaa naga laga ŋga ki jate ma yo ki yɛn na para shɔfɔ Zhezu ŋa Yɛnŋɛlɛ lì wɔ wo sɛnrɛ na (Kapye 4.25-26). Kìla pye, pe kaa jaa mbe lere tɛgɛ wunluwɔ, pe ma sinmɛ kpoyi wo wa wi go ki na mbege naga fɔ pòo tɛgɛ wunluwɔ..
3 Pè yo fɔ: «Ye pan we pe manda ti kɔɔnlɔ we yɛɛ na,
yɔngɔwɔ mba pè le we na, woo kɔɔnlɔ kporo kporo kporo†2.3: Ŋga kì yo fɔ: Ye pan we pe manda ti kɔɔnlɔ we yɛɛ na, yɔngɔwɔ mba pè le we na woo kɔɔnlɔ kporo kporo kporo ko kɔrɔ wo yɛn fɔ ye pan we je pe fanŋga ki na, we pe tegere ti laga we yɛɛ go na..»
4 Ɛɛn fɔ ŋa wi yɛn ma cɛn wi wunluwɔ jɔngɔ ki na wa yɛnŋɛlɛ na, wi nɛɛ tɛgɛ pe na,
we Fɔ wi yɛn naga la koo pe na.
5 Kona, wi nɛɛ para pe ni naŋgbanwa ni,
a wi naŋgbanwa ndorogo ki nɛɛ pe sunndo wi kɔɔn pe na.
6 A wì sho fɔ: «Muwi mìlan wunlunaŋa wi tɛgɛ
wa Siyɔn yanwiga ki na, na yanwiga kpoyi ye.»
7 (A wunlunaŋa wì sho fɔ:)
«Mi yaa Yawe Yɛnŋɛlɛ li kakɔnndɛgɛlɛ li yari ye kan.
Lìlan pye fɔ: ‹Ma yɛn na pinambyɔ,
a mì pye ma to nala†2.7: Kapye 13.33; Ebu 1.5; 5.5.
8 Na yɛnri, pa mi yaa cɛngɛlɛ ke ni fuun ke kan ma yeri kɔrɔgɔ,
pa dunruya wi ni fuun wi yaa pye ma woo.
9 Ma yaa ka ya pe ni tugurɔn kanŋgala ni,
ma yaa ka pe tɔngɔlɔ paa yɛgɛ ŋga na cɔgɔ ma kaa yaari we†2.9: Naga 2.26-27; 12.5; 19.15.› »
10 Koni yoro wunlumbolo wele, ye tijinliwɛ ta!
Ye yɛnlɛ ki na paa ye yɛrɛgi, yoro mbele tara ti teele wele!
11 Ye go sogo yaa tunŋgo piin Yawe Yɛnŋɛlɛ li kan, yaa fyɛ li yɛgɛ!
Yaa yɔgɔri yaa seri li yɛgɛ!
12 Yeli pinambyɔ wi kanŋguuro ti yigi yoo gbɔgɔ,
jaŋgo liga ka nawa ŋgban ye ni,
ye kɔ wa konɔ na yè lɛ li ni;
katugu li mbe ya mbe nawa ŋgban yɔnlɔ nuŋgba!
Mbele fuun pe mali pye pe larasaga, fɛrɛwɛ yɛn pe woo!
†2:2 2.1-2: Ki laga ŋga ki yɛn na para Izirayɛli tara wunlunaŋa wo sɛnrɛ na, kana ŋa pàa pye na yinri Davidi; puŋgo na tagafɛnnɛ pe kaa naga laga ŋga ki jate ma yo ki yɛn na para shɔfɔ Zhezu ŋa Yɛnŋɛlɛ lì wɔ wo sɛnrɛ na (Kapye 4.25-26). Kìla pye, pe kaa jaa mbe lere tɛgɛ wunluwɔ, pe ma sinmɛ kpoyi wo wa wi go ki na mbege naga fɔ pòo tɛgɛ wunluwɔ.
†2:3 2.3: Ŋga kì yo fɔ: Ye pan we pe manda ti kɔɔnlɔ we yɛɛ na, yɔngɔwɔ mba pè le we na woo kɔɔnlɔ kporo kporo kporo ko kɔrɔ wo yɛn fɔ ye pan we je pe fanŋga ki na, we pe tegere ti laga we yɛɛ go na.
†2:7 2.7: Kapye 13.33; Ebu 1.5; 5.5
†2:9 2.9: Naga 2.26-27; 12.5; 19.15