50
Yɛnŋɛlɛ li gbɔgɔlɔmɔ jɛmbɛ
1 Asafu†50.1: Asafu wìla pye yurukɔɔlɔ to wo wa wunlunaŋa Davidi wi wagati wi ni (1 Kuro 6.16-17,24; 25.1; 2 Kuro 35.15), ma taga naŋa ŋa pàa pye na yinri Hema wi ni (Yuuro 88.1); konaa Yedutun ni (Yuuro 39.1). Yɛnŋɛlɛ gbɔgɔyurugo.
Yɛnŋɛlɛ na yawa pi ni fuun fɔ, Yawe Yɛnŋɛlɛ le, lì para.
Lì tara woolo pe ni fuun pe yeri, maga lɛ wa yɔnlɔ yirisaga fɔ ma saa gbɔn wa yɔnlɔ tosaga ki na.
2 Wa Siyɔn ca, ko ŋga ki tiyɔnwɔ pi yɛn ma pi yɛɛ yɔn fili,
Yɛnŋɛlɛ lì li yɛɛ naga wa li gbɔgɔwɔ yanwa pi ni.
3 Yawe Yɛnŋɛlɛ li yɛn na paan, li se pyeri;
kasɔn ki yɛn na yaraga pyew ki sori wa li yɛgɛ,
tifɛliŋgbɔgɔ ki yɛn na gbɔɔn mali maga.
4 Yɛnŋɛlɛ li yɛn na naayeri wi yinri wa go na,
konaa na tara ti yinri ti pye sɛrɛfɔ mbe kiti kɔn li woolo pe na.
5 Lì yo fɔ: «Yanla lesinmbele pe gbogolo na yɛgɛ sɔgɔwɔ,
poro mbele pè saraga wɔ na yeri ma yɔn finliwɛ le na ni we.»
6 Naayeri wi yɛn naga yari fɔ Yɛnŋɛlɛ li yɛn ma sin,
Yɛnŋɛlɛ lo jate, lo li yɛn kiti kɔnfɔ we.
Wɔnmatigiwɛn laga.
7 «Na woolo, ye logo na yeri, sɛnrɛ yɛn na yeri mbe yo ye kan;
Izirayɛli woolo, mi yaa ye jɛrɛgi!
Muwi mi yɛn Yɛnŋɛlɛ, ye Yɛnŋɛlɛ le.
8 Mi woro na ye jɛrɛgi ye saara nda ye maa woo to kala na,
ye maa saara sogoworo woo na yeri suyi.
9 Mi se napɛnɛ shɔ mbe yiri wa ye go ki ni,
mi se ka sikapɛnɛ yigi mbe yiri wa ye sikaala jasaala pe ni fun.
10 Katugu yan woŋgaala pe ni fuun pe yɛn na woolo,
yaayoro waga lɛgɛrɛ nda wa yanwira ti na, ti yɛn na woro.
11 Sannjɛrɛ nda fuun ti yɛn wa naayeri, mìri jɛn,
yanyaara nda fuun ti yɛn wa yan, ti yɛn na woro.
12 Ndɛɛ ki pye fuŋgo yɛn na na, mi se jɛn naga yo ye kan,
katugu dunruya wo naa wi nawa yaara ti ni fuun ti yɛn na woro.
13 Naga yɛn ma, mi maa napɛnɛ kara kaa wi le?
Naga yɛn ma, mi maa sikapɛnɛ kasanwa woo wi le?
14 Ŋga kìlan ndanla, ko yɛn fɔ ma sharaga kan mi ŋa Yɛnŋɛlɛ na yeri paa saraga yɛn,
mi ŋa Yɛnŋɛlɛ na yaara ti ni fuun ti go na, yɔn fɔgɔlɔ ŋgele mà lɛ na yeri, ma ke tɔn ma ke yɔn fili!
15 Kona ma jɔlɔgɔ pilige ki na, mala yeri mbɔɔn saga,
pa mi yaa ma shɔ, ma sila na gbogo.»
16 Ɛɛn fɔ Yɛnŋɛlɛ li yɛn naga yuun lepee wi kan fɔ:
«Ki tɔnli wo yɛn se? Mboro ŋa ma maa na kondɛgɛŋgɛlɛ ke kara,
ma koro naga yuun wa ma yɔn ko ni ma yo mà yɔn finliwɛ le na ni.
17 Mbe sigi ta, na yɛrɛwɛ sɛnrɛ to yɛn mɔɔ mbɛn;
a mà je na sɛnrɛ ti na.
18 Na maga yoo yan, ma maa pye ma pinlɛyɛnlɛ,
jataala poro pe yɛn ma cɛnyɛɛnlɛ wele.
19 Sɛnpere to ti yɛn wa ma yɔn ki ni,
lefanlaga sɛnrɛ to ti maa yinrigi wa ma yɔn.
20 Na maga sa cɛn pele ni, ma maa ma sefɔ wi sanga;
ma maa ma nɔsepyɔ ŋa wi yɛn nɔ yinnɛ nuŋgba ma ni wi mɛgɛ ki jogo.
21 Ko kapyere nda to maa piin, mi si para ma ni,
ki pye ma, maa ki jate ndɛɛ mi yɛn paa ma yɛn.
Ɛɛn fɔ koni, mi yaa ma jɛrɛgi, mbɔɔn kolomɔ kapyere ti tanli ti yɛɛ na ma yɛgɛ sɔgɔwɔ.»
22 «Yoro mbele ye yɛn na fɛgɛ mi ŋa Yɛnŋɛlɛ na na, yanla sɛnrɛ nda ti logo ye wali ti na,
nakoma mi yaa ye kɔɔnlɔ curo curo curo, lere kpɛ se ya mbe ye shɔ.
23 Lere ŋa wi ma sharaga kan na yeri, ko ki yɛn saraga ŋga ki maa na gbogo,
lere ŋa wi maa wi tangalɔmɔ pi kɔrɔsi, mi yaa ki naga wi na fɔ mi ŋa Yɛnŋɛlɛ mi yɛn wi shɔfɔ.»
†50:1 50.1: Asafu wìla pye yurukɔɔlɔ to wo wa wunlunaŋa Davidi wi wagati wi ni (1 Kuro 6.16-17,24; 25.1; 2 Kuro 35.15), ma taga naŋa ŋa pàa pye na yinri Hema wi ni (Yuuro 88.1); konaa Yedutun ni (Yuuro 39.1).