51
Yɛnŋɛlɛ yɛnrɛwɛ
mbe kapere kala yagawa ja
mbe kapere kala yagawa ja
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
2 Naa Davidi wìla sinlɛ Uri jɔ Batisheba wi ni, ko puŋgo na, a Yɛnŋɛlɛ yɔn sɛnrɛ yofɔ Natan wì si kari wa wi yeri ma saa para wi ni ki kala li wogo na. A Davidi wì sigi yɛnrɛgɛ ŋga ki yɛnri†51.2: 2 Sami 11.1–12.15.
3 E, Yɛnŋɛlɛ, na yinriwɛ ta ma kagbaraga ko kala na;
ma yinriwɛ tawa gbɔɔ pi kala na, na kambasinnde ti kɔ mari wɔ wa.
4 Na woli mala kajɔɔgɔ ki laga na na pew,
mala kapege ki kɔ mala pye fyɔngɔ fu.
5 Katugu na kambasinnde mìri jɛn;
mi yɛn nala kapere ti yaan na yɛɛ yɛgɛ sɔgɔwɔ sanga pyew.
6 Mboro nuŋgba pe, mboro mì kapege pye ma na,
ŋga ki yɛn tipege ma yɛgɛ na, ko mì pye.
Ki kala na, tanga yɛn ma yeri, na maga ŋga fuun kɔn mbe tɛgɛ na mɛgɛ ni;
ma yɛn jɛrɛgisaga fu wa ma kiti kɔngɔ ki ni na na†51.6: Ɔrɔmu 3.4.
7 Wele, pànla se wa kambasinŋge ki ni.
Maga lɛ na nɔ wìlan kugbɔ ki lɛ, mi yɛn wa kapege ki ni.
8 Ɛɛn fɔ ma maa ki jaa kaselege mbe pye wa sɛnwee wi kotogo na.
Ki yaga ma kajɛnmɛ kan na yeri wa na nawa pi ni fuun pi ni!
9 Na kapere ti laga na na yizɔpi†51.9: Yizɔpi tipile lali. Kìla pye pe mali wɛrɛ ta kɔn ma tɔnmɔ nakoma kasanwa mba pi ma yaraga nakoma lere pye fyɔngɔ fu pi yanragi yanragi ti ni. wɛrɛ ni, pa mi yaa pye fyɔngɔ fu.
Na woli pa mi yaa laga mbe filige yege yege yege.
10 Ki yaga mbe nayinmɛ naa yɔgɔrimɔ sɛnrɛ logo,
jaŋgo mi ŋa mà kaari, mbe yɔgɔrimɔ ta naa!
11 Maga kanla kapere ti wele,
na kambasinŋge ki kɔ maga wɔ wa!
12 E, Yɛnŋɛlɛ, kotogo kpoyi kan na yeri,
jatere jɛnŋɛ fɔnŋɔ le na ni, ŋa wi yaa koro ma na!
13 Maga kanla wa lege mbanla lali ma yɛɛ ni!
Maga kɔɔn yinnɛ na li yɛn kpoyi li wɔ na ni!
14 Shɔwɔ mba màla shɔ ki yɔgɔrimɔ pi kan na yeri naa fɔnŋgɔ,
ma kajɛŋgɛ pyege jatere le wa na nawa!
15 Kona, mi yaa kaa leele mbele pè yiri ma je ma na pe nari ma koŋgolo ke ni,
pa kona kapere pyefɛnnɛ pe yaa sɔngɔrɔ mbe pan ma kɔrɔgɔ.
16 E, Yɛnŋɛlɛ, na shɔfɔ Yɛnŋɛlɛ, na shɔ kasanwa mba mì wo ki kapege ki kɛɛ,
pa kona ma yɛn ma sin yɛgɛ ŋga na, mi yaa laga yari nayinmɛ ni!
17 Na Fɔ, na yɔn ki yɛngɛ,
jaŋgo mbe ya mbaa ma sɔnni!
18 Saara ma ti yɛn mɔɔ ndanla mbe wɔ ma yeri,
nakoma mi jɛn na ta wɔ ma yeri;
Saara sogoworo ma ti yɛn mɔɔ ndanla.
19 Saraga ŋga ki yɛn mɔɔ ndanla Yɛnŋɛlɛ,
ko ki yɛn lere ŋa wi kapege kì ye wi go na.
Lere ŋa wi kapege kì ye wi go na, maa nawa pi tanga wi na,
Yɛnŋɛlɛ, maa je ko fɔ wo na.
20 Wa ma kagbaraga pyege ki ni, kajɛŋgɛ pye Siyɔn ca ki kan;
ko ŋga ki yɛn Zheruzalɛmu ca ye, ma ti pege malaga sigembogo ki kan naa fɔnŋgɔ mbege maga!
21 Kona saara nda ti maa woo na yala kasinŋge ki ni ti yaa pye mbɔɔn ndanla,
to ti yɛn saara sogoworo to naa yarikanra nda pe ma sogo pew ti ni.
Kona pe yaa kaa napɛnɛ woo saraga wa ma saraga wɔsaga ki na.