2 Yawe Yɛnŋɛlɛ, na shɔ lepeele pe kɛɛ,

na go sige lewɛlimbɛlɛ pe na.

3 Kapege ko cɛ pe maa jate wa pe kotogo na mbaa piin,

pe maa maara kɔɔn pilige pyew.

4 Pe maa pe ŋgayinŋgele ke yinrigi na ke piin pyembye paa wɔɔgɔ yɛn,

pe yɔn sɛnrɛ ti yɛn paa mɛrɛgɛ shɔnrɔ yɛn.

5 Yawe Yɛnŋɛlɛ, na shɔ lepeele pe kɛɛ,

na go sige lewɛlimbɛlɛ pe na,

poro mbele pe yɛn naga jaa mbanla jan we.

6 Mbele pe maa pe yɛɛ gbogo, pè pɛnɛ le na na, ma mana yanŋga na na,

pè mɛrɛ jan na na konɔ yɔn ki na;

pè leele lara paa na singi.

7 Mìgi yo Yawe Yɛnŋɛlɛ li kan fɔ: «Mboro ma yɛn na Yɛnŋɛlɛ le.»

Yawe Yɛnŋɛlɛ, nuŋgbolo jan mala yɛnrɛwɛ gbɔɔ pi logo!

8 Yawe Yɛnŋɛlɛ, we Fɔ, mboro ma yɛn fanŋga fɔ ŋa wìlan shɔ,

mboro ma mala go sige malaga gbɔnpilige ki na.

9 Yawe Yɛnŋɛlɛ, maga ka ti ŋga lepee wi yɛn na jaa ki pye!

Maga ka ti kagala ŋgele wì kɔn ma tɛgɛ mbe pye ke yɔn,

nakoma wi yaa la wi yɛɛ nari!

10 Na juguye mbele pànla maga,

tipege sɛnrɛ nda pè gbɛgɛlɛ na mɛgɛ ni,

ki tipege ki sɔngɔrɔ ki to poro jate pe na.

11 Kasɔn naŋganra mbe wo pe na,

pe pe wa kasɔn ka ni,

wetijuro ta ni, nda pe se ya yiri wa ti ni naa fyew!

12 Lere ŋa wi maa sɛnpere yuun, wiga ka yeresaga ta laga tara ti ni,

jɔlɔgɔ ki taga lewɛlɛwɛ wi puŋgo na sanga pyew!

13 Mìgi jɛn ma yo Yawe Yɛnŋɛlɛ li yaa ka mbele pe yɛn tege na pe kiti wi kɔn, mbe ŋga kì sin ki yo;

mbe tanga ki kan fyɔnwɔ fɛnnɛ pe yeri.

14 Kaselege ko na, lesinmbele pe yaa lɔɔn shari mbaa ma sɔnni,

leele mbele pe nawa pì filige pe na, pe yaa ka cɛn wa ma yɛgɛ sɔgɔwɔ.