141
Yɛnŋɛlɛ, tanla kɔrɔsi
1 Davidi Yɛnŋɛlɛ gbɔgɔyurugo.
Yawe Yɛnŋɛlɛ, mi yɛn nɔɔ yɛnri, ma fyɛɛlɛ ma pan mala saga!
Na mi kɔɔn yeri mala saga, ma nuŋgbolo jan ma logo na yeri!
2 Ma ti na yɛnrɛwɛ pi tanla ma ni paa wusuna nuwɔ taan yɛn;
na mi kanla kɛyɛn yi yirige wa ma yeri mbɔɔn yɛnri, ki tanla ma ni paa yɔnlɔkɔgɔ saraga yɛn.
3 Yawe Yɛnŋɛlɛ, tanla yɔn ki kɔrɔsi sɛnpere yogo ki na,
na yɔn ki yingiwɛ jɛn sɛnpere yogo ki na!
4 Maga ka ti na jatere wila na tilele mbaa kee kapege pyege ki kɔrɔgɔ,
maga ka ti mbe kɛɛ le katijangara pyege ni,
mbanla jele li migi kambasinŋge pyefɛnnɛ pe ni,
maga ka ti mbe pe liwɛn gbɔɔ suro ta li!
5 Lesinŋɛ wo mbanla gbɔn, ko yɛn kagbaraga na yeri;
na wi kanla jɛrɛgi mbanla le konɔ kona kì cɛn ndɛɛ wì sinmɛ nuwɔ taan wo wa na go ki na;
mi se je ki sinmɛ pi wogo na wa na go ki na.
Ɛɛn fɔ sanga pyew mi yɛn na Yɛnŋɛlɛ li yɛnri lepeele pe kapyere tijangara ti jɔgɔ.
6 Yɛnŋɛlɛ sa ti pe pe kiti kɔnfɛnnɛ pe wɔnrɔgɔ pe pe jaanri walaga ka na!
Na ki ka pye ma, pa pe yaa na sɛnyoro ti logo, mbege jɛn mbe yo ti yɛn ma tanla.
7 Yɛgɛ ŋga na kɛrɛ kɔnfɔ wi kaa palaye pe wari wi ma tara ti walagi mberi jaraga,
pa pe kajeere ti yaa ka jaraga ma wa fanga ki yɔn na wa kuulo tara†141.7: Mbege lɛ vɛrise kaŋgurugo mbe pan mbe gbɔn kɔlɔshyɛn, ki laga ki sɛnrɛ ti woro ma filige Eburuye sɛnrɛ ti ni, ti kɔrɔ wi logowo pi yɛn ma ŋgban..
8 Yawe Yɛnŋɛlɛ, na Fɔ, mboro mi yɛn na wele,
pa mìlan yɛɛ karafa mboro na; maga kanla yaga mbe ku!
9 Pɛnɛ na pè le na na, na shɔ li ni,
mala shɔ kambasinnde pyefɛnnɛ mbele pè lara nala singi pe kɛɛ!
10 Yɛnŋɛlɛ sa ti lepeele pe yɛɛra mɛrɛ ti pe yigi,
ɛɛn fɔ, mi wo na, mbe shɔ pe yeri!
†141:7 141.7: Mbege lɛ vɛrise kaŋgurugo mbe pan mbe gbɔn kɔlɔshyɛn, ki laga ki sɛnrɛ ti woro ma filige Eburuye sɛnrɛ ti ni, ti kɔrɔ wi logowo pi yɛn ma ŋgban.