2
Yariyanga shyɛn wogo ŋga
Yɛnŋɛlɛ yɔn sɛnrɛ yofɔ wìla yan:
Yɛnŋgɛlɛ tijɛrɛ naa fɛnlɛ nambala
kala
1 Ko puŋgo na, a mì silan yɛgɛ ki yirige ma wele; mbe ka wele, a mì si yɛnŋgɛlɛ tijɛrɛ yan. 2 Mɛrɛgɛ ŋa wìla pye na para na ni, a mì suu yewe ma yo fɔ: «Ki yɛnŋgɛlɛ ŋgele koro yɛn na yiŋgi wogo nari?»
A wì silan yɔn sogo ma yo fɔ: «Ki yɛnŋgɛlɛ ŋgele koro ke yɛn cɛngɛlɛ fanŋga wogolo ŋgele kàa Zhuda tara woolo, naa Izirayɛli tara woolo konaa Zheruzalɛmu ca woolo pe gbɔn ma pe jaraga we.» 3 Ko puŋgo na, a Yawe Yɛnŋɛlɛ lì si fɛnlɛ nambala tijɛrɛ naga na na. 4 A mì si yewe ma yo fɔ: «Mbele poro na paan mbe yiŋgi pye?»
A mɛrɛgɛ wì silan yɔn sogo ma yo fɔ: «Ki yɛnŋgɛlɛ ŋgele, ke yɛn cɛngɛlɛ fanŋga wogolo, ŋgele kàa Zhuda tara woolo pe gbɔn ma pe jaraga, ali yɛrɛ wa kpɛ si ya mbe go yirige, ki fɛnlɛ nambala mbele pè pan, jaŋgo mbe fyɛrɛ wa ki cɛngɛlɛ fanŋga wogolo ke na, mbe ke fanŋga ki kɔ.»
Yariyanga taanri wogo ŋga
Yɛnŋɛlɛ yɔn sɛnrɛ yofɔ wìla yan:
Taanlamana kala
5 Ko puŋgo na, a mì silan yɛgɛ ki yirige ma wele; mbe ka wele, a mì si naŋa wa yan, taanlamana la pye wi kɛɛ. 6 A mì suu yewe ma yo fɔ: «Maa kee se yeri?» A wì silan yɔn sogo ma yo fɔ: «Mi yɛn na kee sa Zheruzalɛmu ca ki taanla, jaŋgo mbege gbɔgɔwɔ naa ki titɔnlɔwɔ pi jɛn.»
7 Kona, mɛrɛgɛ ŋa wìla pye na para na ni, wi nɛɛ kee, a mɛrɛgɛ wa yɛgɛ si yiri wa ma pan ma fili wi ni. 8 A wì suu pye fɔ: «Fe ma saga yo ki lefɔnŋɔ ŋa mana li ni kɛɛ wi kan fɔ:
‹Mbogo se ka kan mbe Zheruzalɛmu ca ki maga,
katugu lelɛgɛrɛ naa yaayoro lɛgɛrɛ yaa ka pye wa ki ni.›
9 Yawe Yɛnŋɛlɛ lìgi yo, ma yo fɔ:
‹Mi jate mi yaa pye paa kasɔn mbogo yɛn, mbe Zheruzalɛmu ca ki maga.
Mi yaa pye ca ki gbɔgɔwɔ yanwa.› »
Mbele pàa koli ma kari pe ni
wa kulowo pi ni
pe yaa ka sɔngɔrɔ mbe pan
10 «Ye yiri, ye yiri!
Ye fe ye yiri wa yɔnlɔparawa kamɛŋgɛ kɛɛ tara ti ni.
Yawe Yɛnŋɛlɛ lo lì yo ma.
Katugu mìla ye gbɔn ma ye jaraga ma kari ye ni fɔ wa dunruya wi go tijɛrɛ ki na.
Yawe Yɛnŋɛlɛ lo lì yo ma.
11 Yoro Siyɔn ca fɛnnɛ ye yiri!
Ye fe ye shɔ, yoro mbele ye yɛn ma cɛn wa Babilɔni ca we.»
12 Yawe Yɛnŋɛlɛ na yawa pi ni fuun fɔ lìlan tun, ma fanŋga kan na yeri.
Cɛngɛlɛ ŋgele kè ye kɛɛ yaara ti koli, pa lì yo yɛɛn ke kan fɔ:
Lere ŋa fuun ka jiri ye na,
kì cɛn ndɛɛ ki fɔ wuu yombɛlɛ li le wa lo jate li yɛnlɛ li ni.
13 Li yaa ka kɛɛ yirige ki cɛngɛlɛ ke na, mbe jɔlɔgɔ wa ke na.
Ki cɛngɛlɛ kàa leele mbele koli kulolo, ke yaa sɔngɔrɔ mbe pye poro kulolo.
Pa kona ye yaa ki jɛn fɔ Yawe Yɛnŋɛlɛ na yawa pi ni fuun fɔ lo lìlan tun.
14 Siyɔn ca fɛnnɛ yaa jɔrɔgi nayinmɛ ni, yaa yɔgɔri;
katugu mi yɛn na paan mbe cɛn laga ye sɔgɔwɔ.
Yawe Yɛnŋɛlɛ na yawa pi ni fuun fɔ lo lì yo ma.
15 Ko pilige koni, cɛngɛlɛ lɛgɛrɛ yaa ka taga Yawe Yɛnŋɛlɛ li na.
Pe yaa ka pye Yawe Yɛnŋɛlɛ li woolo.
Kona, Yawe Yɛnŋɛlɛ li yaa ka cɛn wa ye sɔgɔwɔ.
Ki ka pye ma, ye yaa ki jɛn mbe yo fɔ Yawe Yɛnŋɛlɛ na yawa pi ni fuun fɔ lo lìlan tun ye yeri.
16 Yawe Yɛnŋɛlɛ li yaa Zhuda tara woolo pe ta li woolo wa li tara kpoyi ti ni,
mbe Zheruzalɛmu ca ki wɔ naa fɔnŋgɔ ki pye li wogo.
17 Ki daga sɛnwee pyew wi pyeri Yawe Yɛnŋɛlɛ li yɛgɛ sɔgɔwɔ,
katugu li yɛn na yinrigi wa li cɛnsaga kpoyi ki ni, wa yɛnŋɛlɛ na na paan.

© 2014 WBT